那一天我成為了練習男友: 【II】邀請

『你傻架？』

「我好認真架喎。」佢仲笑笑口咁。

「話說，妳點知我叫咩名架。」我冇自我介紹過喎。

「Miss Li 同我講嘅。」一個奸笑聲緊隨其後。

心都寒一寒...



「首先，我同你係今日第一次見。其次，坦白啲講，呢度全部人都知，拍拖會阻住我賺錢還債，所以我寧死不屈絕對唔妥協。」我都係回應番佢個問題先，其他嘢吾好諗住啦。

「咁有信心？」

「當然，咁樣同自殺沒乜分別。」

「但我要嘅只係一個用嚟練習嘅男朋友炸。」

「咁同ptbf有乜嘢分別？」



「分別梗係大啦，我都係有原則架嘛。」

「聽吓又無妨，反正唔會打動到我，即管講嚟聽吓。」

「好簡單，我哋係唔會做啲踩過界嘅嘢，最多咪拖下手仔咁，我都唔會蝕底比你啦講真。仲有你係會有錢收架，以月計，好穩定架。」

「我又有疑問，你唔想蝕底咁點解要一個有風險嘅練習男友呢？」

「我係大公司千金，理應可以自由自在所以我想點就點，吹咩。」呢個理由，一個字，屌。「唔練習下，第時點搵男朋友呀，我係想攞個經驗姐，越有難度越好，尤其是你尼啲唔尊重人嘅人。」佢補多咗一句。



完全九唔搭八...眼瞓啫，使死咩...

「咁你憑咩覺得我會接受呢？」

「你夠膽當著全班面窒我啦，所以我就係要咁樣措下你銳氣，迫到你服我為止咋嘛，其實沒十足嘅把握令你接受㗎。」

「雖然成件事好迷，但結論就係我點都唔接受，你吹我唔脹㗎喎。」其實成件事仲係太戲劇性，我都唔知俾咩反應好。

「唔好意思呀，但實不相瞞，我其實冇諗著比你揀㗎。」

「我唔信拒絕左你會有咩損失囉～」我輕描淡寫地回答。

「嗯⋯⋯冇乜野嘅，輕則頭破血流，重則粉身碎骨，應該冇事嘅，你自己諗下啦，我就出名絕不食言嘅。」

你吾係覺得我會驚你呀話？



「好啦，咁我要問嘅都問完啦，但我依然冇興趣。」嘥晒我啲時間，夠薑咪打到我入廠囉。

「何出此言？」她疑惑。

「你咁樣咪真係嘥我時間，我仲要份兼職去還債呀，你唔好玩啦。」

「我咪講咗有糧出囉。」

「我而家有份穩定嘅點解要妥協？」

允天月舉咗一只手指出嚟。

「一千就想收買我，講笑咩？」



她搖了搖頭。

「一萬？都係唔夠我而家份糧多喎。」

她又搖了搖頭。

『一口價，十萬，deal？』

十萬？認撚真咩？

咁如果十個月嘅話咪已經夠還？

但係咁樣同放棄尊嚴有咩分別？

但係還債都冇話尊唔尊嚴架啦，有錢咪得囉。



但係咁同做一隻鴨差唔多咋喎，值得咩。

但捱十個月就可以還晒啲債。

但咁樣我同隻狗有咩分別，都有嘅，有錢收啦。

咁多個但係之後，我猶疑了...

「可唔可以比小小時間我諗下。」究竟我應該揀錢定尊嚴？好矛盾。。。

「聽日，聽日放學之前，我要一個我滿意嘅答案，不論你做唔做，我生平最憎人hea我，所以麻煩你諗清楚。」

我點了點頭。



之後我地一齊入返班房，比無知嘅世人望著認真有啲難頂。

「你地出去私了？哈哈好似好刺激咁喎，講嚟聽吓啦！」阿基係度問。

「無嘢好分享呀，專心啲上堂啦你，淨係掛住gup女。」

第一堂係悲劇嘅中文堂，身心疲累。。。

又要比大肥婆恰，放過我啦。

「同學仔，今日我哋會重溫學月下獨酌，要留心呀。」

屌你，今日完全無心情去上堂，依家成個腦都係關於允天月所開出嘅條件。

人生未試過咁猶疑不抉。

「凌希神，又發吽哣，作死呀？」大肥婆又嚟料啦，講真唔知仲以為佢暗戀我添呀。

冇錯，大肥婆就係人稱魔鬼文言講師嘅Miss Chung，由我一入泥呢間中學嘅時候已經聽過佢嘅大名。

只係諗都冇諗過，我高中嘅三年竟然係交咗俾佢。

唔係話唔好，以成績為前題嘅話係好事，但以高中生活為前提嘅話，基本上係斷送咗中文堂嘅日常，尤其對我尼啲本來已經冇乜學校體驗嘅人更為傷心。。。

「你答我，李白飲酒做乜？」

哦，好簡單姐，但係我冇乜心情答你囉。

「爆人樽。」我微笑道。

「唔緊要，答錯罰企15分鐘，順便抄十次主旨，落堂前交比我。」她也報以一個意味深長嘅微笑。

仆街，又玩大咗。。。

不過都好嘅，咁樣或者可以令我冷靜下都唔出奇。

抄下嘢俾自己冷靜下。

「叮噹叮噹。」下課鐘聲響起，終於完咗尼一堂，實在太辛苦啦。

我企咗起身，緩緩地行過去小食部。

「你跟住我係想點呢允天月小姐？」比我抖下氣都好丫大佬。

「冇呀，我今日第一日入嚟，唔熟路阿嘛，咪想搵個人幫我攞，唔知你肯唔肯呢？」

「是但啦。我而家去小食部，你系咪跟？」

呢度再次補充下先，因為呢間係一間私立直資學校嚟，學費都8000一個月起跳，當然我係全額資助果批啦。係因為成績優異先有得入，所以學校嘅窮人認真唔多，可能十節手指已經可以數得晒，仲要其中一個係我。

聽落又無乜點仇富嘅，因為命運呢家嘢，好難講嘅，一出世已經係整定架啦，所以我都冇乜所謂嘅。

之不過離譜嘅係學校啲嘢認真貴到一個點，至少對我一定係，其他人我吾知啦。

一個包要廿蚊，簡直係打劫，燒賣十五蚊得五粒，荒謬。

「好呀，我都有啲肚餓，行啦！仲有呀，可唔可以叫我阿月呢？係咁叫全名有啲怪囉。」

佢又真係跟住嚟，咁樣只會令我腦轉得更加混亂。

小食部設置係5樓，而我嘅班房就係6樓，所以行一層就已經到。

今日有我最愛嘅流心芝士漢堡呀！

我之前一個月淨係俾自己食兩次架咋...

成廿蚊個呀大佬。

然而銀包得番一張一百蚊，已經唔可以亂洗錢，算啦我都係唔食啦，等到真係有需要嘅時候再算啦，仲忍到。

我一個月賺過萬五，會有萬四攞咗去還債，一千係我一個月嘅僅餘嘅生活費。

所以唔可以亂咁使錢，真係會出人命。。。

銀包淨番一舊水，要節制呀凌希神，唉。。。

「你企係度做咩呀？唔去買野食你上嚟係做乜架？」阿月疑惑地望著我。

「鬼叫我窮咩，一舊水要過多三日，要節制下，你當我係負責開路嘅就算啦。」

「我請你啦，當係多謝你帶我嚟，事先聲明，呢樣嘢唔關我嘅委託事呀，我都唔想影響你自己嘅判斷。我生平最憎欠人嘢架啦。」

「估唔到你都會有講正經嘢嘅時候呀。」

「乜我啱啱好失禮咩！咁你食唔食呀！」

那張因生氣而紅的臉，其實咁樣望又真係幾可愛嘅。。。

唔得唔得唔得，唔好諗呢啲嘢。

「嘩，你睇下佢哋friend到，影低你先。」阿基在一旁偷窺著，心中打著如意算盤。「放上學校網爆爆佢先～」

「咁我唔客氣啦，我要一個流心芝士漢堡啊，多謝你。」

不過咁樣真係好咩，要成為一段假感情入面嘅男朋友。。。

哩樣係我唯一擔心嘅嘢。

的確，就算接受咗，一切都只係一場戲嚟，只涉及金錢與利益嘅嘅大戲。