[校園][幻想] 那天自殺後，我被逼體驗第二次人生: 1. 那天，我自殺了
「永別，殘酷醜陋嘅世界」————
——————6小時前(18:00)——————
「阿仁，2030年度計劃書你做左啲乜鳩出黎？屌你老母犯啲咁低級嘅錯誤！你呢幾個月到底做過啲乜鳩？打少幾個飛機做好啲你既工作得唔撚得？」老闆怒火沖天地說
「吓？我明明Double check過無問題嫁！我諗可能有人搞過我份文件⋯」
「邊有咁多人想害你！定還是你想話我屈你？」
「我唔係咁嘅意思⋯對唔住，我下次唔會再犯！」雖然真的有人在我的文件做過手腳，但我想盡快平息這件事，我還是一邊九十度鞠躬一邊道歉
「下次？你覺得你仲適合做落去咩？」
「對唔住呀老細，我唔可以無左份工，我就黎要結婚咩都準備好哂，唔可以呢個時候失業嫁，比多次機會我呀求下你。」我立即跪下求饒，兩眼的淚水也忍不住流下來
「都30幾歲人啦，做人做撚到你咁撚廢死撚左去好過，你同我死翻出去好好反省下啦，廢仁」老闆將桌面上其中一個文件飛向我身上
「係⋯我番出去先」我雙手緊握拳頭然後行出房門
——————4小時前(20:00)——————
「你唔係話今晚要開會咩？點解依家又走得？呢個男人又係邊個黎？」我跑上前攔截我未婚妻與不知名男士的去路
「我上司，我咪叫左你唔洗黎接我囉」
「拖哂手喎，啱啱又攬又錫喎！」
「既然你都見到哂，咁仲有咩好講？」
「點解要咁？我地過多半年就結婚，你同我玩啲咁嘅野？」我雙眼又開始不自主地流下眼淚
「原本我都諗住過多排同你講，我唔想同你結婚呀，我唔想同你挨窮呀，得未呀？我地分手」
他們拖著手離開，我也只能站在原地看他們的背影離去⋯
——————5分鐘前(23:55)——————
為什麼？為什麼要我遇上這種事情？工作失利都算了，還要同一日愛情失意⋯
我在一座大廈的天台邊喝酒邊思考，看著地上十多個空的啤酒罐開始有鬼影，此時就知道自己同時也開始醉了。
人到底為什麼要生存？比較幸運的人就是生活，那不走運的人呢？生存也稱不上，對我來說只是苟生，現在我⋯已經不想再活了。
我鼓起勇氣坐在石壆邊，腳下就是30層的高空，回想我35年來的人生。我望望手錶踏入12點鐘的一刻⋯我跳了。
「永別，殘酷醜陋嘅世界」
｜
｜
｜
｜
｜
｜
｜
｜
｜
砰─！！
——————現在——————
我掙開眼睛，發現自己在飄浮，四圍漆黑一片。嗯，對了，我已經死了，可能這裡就是人們所講的「自殺的人會落地獄」
過了一會，我眼前看見一點光開始慢慢擴大，然後聽見「撻」一聲，好像「瞬移」般的去了另一個空間，這裡是個全白色的房間，牆上排列著數百塊細小的銀色牌，我正前方有一張灰色的電腦枱，以及一名正托著頭的女生望著我，她看上去很年輕，大約不超過20歲，擁有雪白的肌膚，自然黑色長直的秀髮，很標準的美人胎。
「劉俊仁，歡迎你黎到呢到，唔係個個都好似你咁幸運。」她拍手地說
「下？即係點？」
「呢到有個規則，要你所在嘅世界零時零分自殺死嘅人先可以黎呢到，而我就係掌控住咁多個世界既管理者。呀！唔係，與其叫掌控，不如叫監視會好啲，因為我都唔想過份干預，總之就係呢個空間既主人，即係好似你地世界所講嘅「神」一樣。」
「咁我黎呢到做乜？」
「對你地自殺身亡既人黎講，可以話係懲罰，就係要體驗第二次人生，不過你都可以揀有限期同無限期嘅。」
「痴線，我就係唔想再做人唔想再留係呢個咁醜陋嘅世界先自殺，你依家話要比第二次人生我？play9me？我唔會應承！」我此時退後幾步想離開這裡
「你無得揀，呢個係規矩，你唔體驗嘅話就由我幫你決定之後既去向，會比做人更辛苦，唔好忘記呢到係我話事。再講，最短時間都係兩年姐，可能遇到同上次不一樣既人生呢。」
「你玩哂啦，我仲有得say no咩？」
「咁就由你死後嘅十年後開始重生，以免其他人見到你會引起恐慌，因為重生後你個樣都會同依家一樣，十年後應該會開始淡忘。」她彷彿像告訴我就算死後也沒有人記得我
「咁點解唔可以去另一個世界？」
「去另一個世界就無意思，唔係點叫懲罰？更何況我最鍾意睇啲有趣嘅事。」她笑著對我說，雖然她笑得很美，但同時我覺得很心寒
「十年後可以依家即刻就去到咩？」
「可以，你地叫做「世界」，但我覺得叫「數據」或者「檔案」會貼切啲，我可以將佢拉前，拉後，甚至將佢分裂出另一個「檔案」，同時亦因為分裂出黎既檔案係新檔案，所以我無辦法預知。雖然我可以做到好多野，但亦有做唔到嘅事，例如你再死一次就無辦法再黎呢到。」
我靈機一觸，即是我再自殺一次就可以了嗎？
「我知你諗咩，我會想盡辦法唔會比你再自殺多次，就算死都會係期限後死。」她手指尖碰著我胸口心臟位置
「變態⋯⋯其實我一直想問，牆上啲銀色牌係咩黎？」
「係之前重生過既人名，期限後佢地兩次人生既記憶，方便我無聊時可以重溫，亦記錄我到現在做過幾多單case。」
此時我無言以對，一個人有多變態才能達到這個地步⋯
「講翻正題，你想要咩身份，開始工作定還是做學生重拾校園青春？」
「當然學生，翻工咁辛苦。」
「咁就由中五開始啦，留意翻唔好同你生前所識既人接觸，就算你用第二個身份生活，你個樣都係一樣，只係變後生左，唔好搞出麻煩。」
「知喇知喇，出左黎社會我都無乜邊幾個交心朋友。」
「最後問多你一次，真係揀有限期人生？無得再更改嫁喎。」
「係！」
「唔會後悔？」
「唔會！」我堅決地說
「咁現在開始，你嘅第二次人生。」
她右手放到我面前，手指作出「撻」一聲，我眼前又再一次全黑。