[校園][幻想] 那天自殺後，我被逼體驗第二次人生: 6. 浩仁同學，我有事相求！
「哎呀！」雪凝用筆大力戳了我背後一下
「咩事呀！？難得呢堂可以訓下教」
「上堂就精神啲」
「唯獨是唔想比你話，你日日都好似好眼訓咁」
「唔關你事」
「唔關我事？呢幾日每上一堂要拍醒你一次咁都叫同我無關？」
「可以掂我，係你既榮幸」雪凝一臉平靜地說
「⋯⋯」我無言了，她臉不改容地說這句說話，到底有多自戀？
那件事之後，已經過了一星期。
那天我和雪凝翹課一整個下午，她到更衣室洗澡換衣服後，便陪她到花園在旁邊陪著她午睡，一直到放學。
當天雪凝對我態度是有好轉的，但第二天就打回原形。
可不可以還我小貓般的雪凝？
「雪凝，lunch一齊食飯好無？」
「依家先岩岩上第二堂咁快講到食lunch，你好肚餓？」
「約定你先啫，洗唔洗下下窒住哂」
「以我所知你係去飯堂食，而我係帶便當，一齊食好唔方便。」
「咁我可以外賣拎走嫁嘛」
「既然你無問題就隨便你，就算我話唔好你都會跟住我嫁啦」
「咁一陣去花園旁邊啲餐枱等」
「嗯」
為什麼我要約她一起吃午飯？我是受人所托的！
自那件事後，雪凝態度沒有改變，同學們的態度也一樣，變的是班上大多數的同學都對我添加了一點畏懼，以及雪凝再沒有要求我不要理她。
約好雪凝後，我又再一次趴在桌面上好好的享受「睡眠堂」。
「浩⋯浩仁同學⋯出面⋯有人搵你」
我半睡半醒地感覺到耳邊傳來了一把女生的聲音
「林浩仁同學」她又再一次叫我，並輕輕搖動我肩膀
「咩事呀」我聲線有點沉
上完課了嗎？這個時候應該是小息。
這回我睡醒了，我睜開了右眼，斜望著她。
她是誰？我只知道與她是同一班，為什麼要叫醒我？
不是我記性差，而是我沒有用心記住其他人的名字。
「對⋯對唔住，我唔⋯唔係有心打搞你，請⋯請你原諒我⋯」她有點口吃，對著我九十度鞠躬道歉
為什麼要向我道歉？我做了甚麼？
她偷偷地抬頭瞄了我一眼，看見眼泛淚光的她我更加搞不清狀況。
是我剛睡醒的眼神嚇到她嗎？
「等等先，係咪有啲咩誤會」我站了起來，並捉著她雙肩扶她起身
她站直起來抬頭與我正視，現在才看清楚她臉孔，黑色長髮，綁了一個高馬尾，楚楚可憐的雙眼。
她雖然沒有爾柔的可愛，沒有韻晴的氣質，沒有雪凝的標緻臉孔，但平平凡凡有種鄰家女孩的感覺。
「誤會⋯？」她依然眼泛淚光，嘴巴也在發抖
「做咩咁驚我？」
「眼⋯眼神，同⋯同埋⋯語氣，好惡⋯」
「Er⋯嚇到你唔好意思，可能岩岩訓醒把聲沉左小小，我唔係有心。」
「我⋯以為你想鬧我」
「我唔會無啦啦鬧人，話說搵我做咩？」
「呀！係呀，出面有人搵你」她指著門口
「搵我？咁唔該你先！同埋我無記哂全班人既名，你係⋯？」
「我⋯我叫可怡⋯」
「嗯，可怡，我會記住喇！bye」
「再⋯再見⋯」
到底是誰找我？我在這間學校認識的人十根手指也數得完。
我打算走出課室時，安生和三名男生靠在半開半掩的門後偷偷望出面。
「生仔，你地做咩」
「有個靚女企左係出面，之前未見過，應該係其他班既轉校生。」
「靚女？等我睇過！」
雪白的肌膚，黑色長直的秀髮，配上黑色的過膝襪。等等！她不就是凜嗎！？
「凜！？點解你會係到」我嚇得不自禁地大叫起來
「Hi～林浩仁！我過黎搵你嫁，等左你好耐喇！」
「阿仁，識得嫁？介紹黎識下！」安生高興地說
我沒有立即回答安生，反而慌張地捉著凜的手腕拉走她。
我將凜拉到大樓天台，見沒有其他人的身影才冷靜過來。
「點解你會係到？你係到做咩？做咩搵我？」我變了十萬個為什麼
「洗唔洗變到慌失失奇兵咁！？」
我要笑嗎？這麼低級的爛笑話！
「我一來要監視你，二來係螢幕睇到有啲悶，有咩好玩得過同監視對象一齊享受校園生活！你唔覺成件事即刻變得好有趣咩？」
「又係為左玩⋯咁都唔洗黎到我班房搵我嫁，變到好起眼！」
「起眼？點解？」
「你唔覺有成班男仔偷望你咩？」
「真係唔覺喎，可能我今日先入學未見過我既原因掛！？」
「下！？你唔明我講乜？係你外表好引人注目呀！有人話門口有靚女，點知一望就係你！」
「嘿！咁你有無比我吸引住？」她微笑著一隻手放在我胸口，另一隻手放在她自己胸口
「我對高齡女士無興趣！」我擋開她的手
「你講咩呀！人家永遠16歲！」凜微微抬起右腿單腳站著，雙手做出V字手勢放在頭上並雙眼閉著微笑
她在裝怎麼可愛⋯
「那來的自信！真實年齡呢？」
「秘·密」她的食指貼近我嘴巴
「其實你過黎搵我做咩？」
「無呀，只不過係通知你我都係到讀書，過黎同你打聲招呼之嘛」
「打完啦嘛！咁我翻課室」
我轉身開門離開天台，凜隨我身後與我一同離去。
「乜你咁冷淡嫁，以後大家都係同學喇，Yeah Yeah！」
「我只求你唔好搞咁多野」
「盡量啦」
「如果其他人問起，點解釋我同你關係？」
「前女友？其實你答女朋友我都唔介意嫁～」
「我先唔會咁答，青梅竹馬算，人地問到你都要咁答」
「你份人真係好無趣！」
走到5樓時，我向凜打聽就讀那一班。
「你係咩班？」
「B班囉」
B班？那不就是與我同班嗎？但早會到小息也沒見過她出現。
「下！？同我同班？點解唔見你出現」
「我有講過同級咩？既然永遠16歲當然中四啦」她又擺出剛才裝可愛的動作
「算！拜！」我已經不想理她了
「ByeBye～遲啲見～」凜很有活力地向我揮手
她那個舉動令走廊周圍的同學紛紛地討論我，大約是為什麼我會認識這個漂亮女生等等。
走到座位時，安生跑到我面前抱著我⋯
「嗚呀！！點解咁多女仔圍住係你身邊係咁轉！我係到讀第五年，點解無發生過係我身上！從實招來，你地係咩關係！」
「轉校前就識，佢知我都係到讀先過黎同我打招呼」
「咁你地拖住手跑上天台做咩？偷情？做啲唔見得光既野？」
「阿仁，你又對無辜女仔落手？」韻晴在旁邊加入話題
「唔係你地諗咁樣嫁！只係朋友！佢都轉左黎呢到讀書，我比佢嚇親先所以拉左去第二到傾咋！」
「明明之前先對我表白，依家又對其他女仔落手，負心漢！」韻晴裝傷心地說
「欸！！！你向韻晴表白！？」安生和爾柔異口同聲
「誤會呀！全部都係誤會呀！話說爾柔你幾時出現嫁？韻晴你都快啲解⋯哎呀！」
雪凝用力地踢我的凳腳一下
「你又咩事呀！又想誤會我！？」
「誤會？我先無咁得閒誤會你，你好嘈。」雪凝好像有點傲嬌的味道，是我錯覺嗎？
「係喇係喇，嘈住你訓教好對唔住，最好永遠長眠啦你」
「哎呀！！」我又再大叫是因為雪凝用筆插我背後
韻晴在我和雪凝吵架同時，向安生和爾柔解釋我的表白只是互相惡作劇而已，同時課堂也要開始，小息中的鬧劇也結束了。
———————————————————
第四節課完結之時，就是午餐的時候！
「雪凝，記住去外面餐枱等我」
「得喇，知喇，煩！」她就算罵我，臉上也一點表情也沒有，一直以來也是這樣⋯
雪凝同時走到後面的保溫櫃拿走便當，而我就去飯堂買外賣。
走到飯堂後，爾柔與我一起排隊。
「阿仁，你約好左雪凝未？」
「約左喇！我叫左佢去出面坐低等」
「麻煩你呢個中介人喇」
早前爾柔想約雪凝一起用餐，從著全校中與雪凝感情比較「好」的我，爾柔看中這一點所以拜托我做中介人。
「佢同其他人打好啲關係對佢都好既，不過就睇佢幾時可以打開心扉」
「你都知咁樣會好啲？咁幾時到你打開心扉？」
「我係特別！唔需要搞咁多麻煩野」
「又講埋呢啲衰野！其實個件事你落左去搵雪凝之後去左邊？」
「秘密！」
那件事的後續我對其他人一字也沒有提過。
「唓！」爾柔鼓起臉龐
我和爾柔買過午餐後，便趕到花園旁的餐桌，她說不想雪凝等太夠，所以要急著去找雪凝。
看見雪凝坐在一旁，不過她沒有先用餐，而是安靜地看書等我。
我坐在雪凝旁邊，而爾柔就坐在我們對面。
「我以為你會食住等我」
「既然我應承得你同你一齊用餐，以禮貌黎講，我必須等埋你先開始」
「但⋯咁樣係咩一回事？」雪凝指著爾柔問我
「你好，雖然我地之前都有同班，但我諗你可能無留意到我，我就先重新一次介紹自己。我叫郭爾柔，可以叫我做爾柔，我係拜托阿仁幫我約你出黎互相認識。」
雪凝聽完爾柔說話後，便呆望著我。
雪凝啊！你這樣望著我是怎麼意思？我不懂讀心術啊！是擔心爾柔接近自己是有壞企圖嗎？
「你係咪驚？放心啦，佢比我所想仲要單純」我對著雪凝說
「我絕對無欺負你既企圖，反而我怕你唔接受我⋯以前我同你講野你都無理過我」爾柔急著解釋
「有啲咁既事咩？」雪凝皺著眉頭
「早前你比班女仔困係密室到佢都有想出聲阻止，所以我先接受佢委托」
「我最後都係無咁既膽量做到好似你咁⋯」爾柔低著頭說
「你真係好鍾意多管閒事！」雪凝斜望著我
「食飯先！唔好講咁多！」我轉移開話題
我們終於正式開食，雪凝打開便當時，爾柔一臉驚訝
「嘩～雪凝你便當好豐富，屋企人整定自己整？」
「我習慣每朝都早啲起身整便當，你試唔試下？」
「可以試食？」爾柔問
「嗯！」雪凝點點頭
爾柔夾子一塊蛋捲，並放入口中
「嗯～好好食呀！少少甜甜地仲有芝士係入面好得意，雪凝你煮野食好叻嫁？」
「麻麻，我屋企人唔得閒，所以每日三餐都自己煮」
「相反我完全唔識煮，我淨係識食，嘿！」爾柔伸舌頭賣萌
「你日日唔夠訓就係為左早啲整便當？」
「唔·關·你·事」
認識新朋友後也用不著將我拒之門外吧！
「問下都唔比，算數！」
當我們正「開心」地享受午餐時，班上那幾位問題女生也巧合地在我們旁邊經過。
「咦！？爾柔你都埋佢地堆？我勸你都係唔好同佢地痴咁埋」
我原本想開口還擊，但爾柔搶先我一步。
「雪凝同阿仁並唔係你地所講咁壞，我同邊個做朋友唔到你地說三道四！」
爾柔緊握拳頭，看似很有決心地說，但掩飾不到她內心的緊張感，我不知道她們是否看得出來，但至少騙不過我雙眼。
「咁你自己好至為之」
「嘉琪，我希望你唔好再欺負雪凝，如果唔係⋯如果唔係⋯」爾柔聲線慢慢放輕
「如果唔係乜野呀？舉手話比老師聽呀？哈哈哈哈！」嘉琪與其他女生一同大笑
「如果唔係，我保證你黎緊日子都唔會好過」我托著腮插嘴
「你可以做得啲咩？打我一身？你敢打女仔咩？」
「咁好多事都唔一定自己出手既，校内校外都係」我嘴角微微上揚地笑
嘉琪她們聽完後，臉色變了。
不是吧！我只是誇大的說，也用不著那麼快就驚慌吧！
「睇下點！我地走！」嘉琪放下這句說話後，便和其他女生轉身離開
她們離開後，我和雪凝一臉平靜地繼續用膳。
「你咁做真係好咩？你唔怕又發生之前既事？」我問爾柔
「我諗⋯無問題掛！？先唔講我個筆，你真係諗住對付佢地？真係會搵人打佢地？」
「痴線！我大佢之嘛」
「哦⋯咩話！？佢地唔驚咁點算？」爾柔上一秒安心，下一秒驚訝
「到時先算啦，咁都大到佢地，惡得啲咩出樣！？」
「我都係咁話」雪凝突然開口
「你兩個真係樂觀⋯」爾柔沒精神地說
我不是沒把握的，雖然不是長遠，但至少短期內嘉琪她們不會有怎麼大動作找我們麻煩。
———————————————————
「我頂你個肺！依家先黎落雨！」
回家途中突然下雨，不是普通的雨，而是豪雨！
我跑到公園旁邊的簷蓬下躲雨，我又與她在雨中相遇了⋯
「雪凝，又係你！？」
我又再一次看見被雨淋濕她，今次還要比上一次更嚴重，全身也濕透了。今次她白色恤衫透出的不是水藍色胸圍，而是更淺的顏色，應該是粉紅色吧！
加上上次那件事，我是第三次看見全濕的雪凝⋯
「我前世做左啲咩壞事，落親雨都撞到你」她又一臉平靜地找我開戰
「落雨都燒埋去我個疊，不如你屙唔出屎都瀨埋我啦」
「總之見親你都無好事發生」
「係嫁！仲有兩年你挨呀，慢慢嘆啦！」
雖然我們正在唇槍舌劍，但我也不忘拿出外套披在雪凝上身。
「變態」
原來她早就知道自己上身透出了胸圍，那為什麼要說我是變態！？
「我係變態就唔會幫你遮啦！」
我們沉默的在簷蓬下躲雨，只聽見兩點落左地上的聲音。
雨勢沒有因時間而停下來，更不時有狂風吹襲。
「啊切⋯」雪凝打了一個輕聲的小噴嚏
我見雨勢開始有點緩慢下來，而我倆全身也濕透，所以向雪凝提出一個小建議。
「喂，不如去我屋企沖個涼先，我屋企可以呢到行翻去，等啲衫乾你先走，就算停左雨，你就咁濕住搭車好易吹到感冒」
雪凝沒有回應呆望著我⋯過了一會才有反應。
「死變態，你想點？」雪凝毫無感情地說，雙手抱胸遮掩自己的胸部
「下！？如果我要出手，一早就係用品室落左手，洗等到依家？我只不過係出於好心，確定權係你到，我無逼你！」
「好近？」
「我諗要行多五至十分鐘左右」
「咁⋯好」
我和雪凝冒著雨水在街道中奔跑回家，她可能不太擅長運動，好幾次要停下來等她追過來。
我倆到達大廈大堂時，早已變成了「水鬼」，就像剛在游泳上岸一樣，全身沒有一個地方是乾的。
我拿出鑰匙打開大門，邀請雪凝進來後。
「睇唔出你係有錢人」
「我唔係」
「住得呢到非富則貴」
我也不知道凜為何要給我住在這裡！
「你屋企人幾時翻？」雪凝接著說
「我一個人住，放心啦，我唔會對你做啲咩」
「如果你真係做得出，我會第一時間攻擊你男人最痛」
我走到衣櫃找乾淨的毛巾給她。
「嗱，毛巾同衫，前面走廊左邊邊第一間就係廁所。」
「嗯，唔該」
我用毛巾抹乾頭髮後，走到房間拿睡衣並換上。
「一陣出黎拎埋你套校服比我洗」我走到浴室門口敲門提醒雪凝
等待雪凝洗澡同時，我拿出暖風機吹向放左玄關的兩對皮鞋。
坐在梳化等待用浴室期間，凜突然瞬間轉移到客廳。
「Hi～我地又見面喇」
「嘩！做乜鬼突然用能力轉移過黎呀，下次正門入黎啦！」
「點解？呢間屋得你一個人住，都唔怕比人見到啦！定還是你係到做緊青少年既私人事？」凜奸笑望著打量我
「無呀！總之⋯」
「死變態，校服我放去邊」雪凝在浴室出來
雪凝留意到凜後，她們四目相對，我們三人沉默了一會
「就係咁既原因」我對凜做了口型
「Hi～我係咪阻住你地」凜尷尬地笑著問雪凝
「佢上黎避雨咋！無其他！」
「我叫司徒凜呀，係佢既⋯你既咩話？」凜忘記我設定好的關係
「青梅竹馬」
「呀！係呀，同佢青梅竹馬，我上黎拎翻啲野比佢咋，我走嫁喇，你地慢慢」
「你好，我叫袁雪凝」
「咁我走先喇，ByeBye～」
「再見」
「雪凝，你拎校服放去洗衣機隔籬個籃先，我送佢到門口」
「嗯」
我推凜到玄關輕聲交談
「你咁快搞男女關係」凜陰嘴笑著
「真係避雨咋，你上黎其實做咩嫁」
「我悶得擠上黎諗住搵你打發時間咋，不過比我發現更有趣既野，依家走喇，Bye～」
「下次正門入呀！」
「得喇，你都要做足安全措施呀，嘻嘻」
「放過我啦」我用力關上大門
我開了電視給雪凝解悶後，便走到洗衣機前打算清洗濕得滴水的校服。
我在洗衣籃中發現了一個大問題，校服中夾雜著一個粉紅色的胸圍⋯
「雪凝，你⋯真係打算比埋個Bra我洗？」
「無辦法，濕到咁好難繼續戴」
她真的打算在我家真空狀態與我獨處？令我最佩服的是竟然那麼冷靜回答我⋯
等等！她上身真空，那内褲呢！？
「你唔會比埋條底底我洗掛！？」
「內褲無濕得咁勁，而且比較薄又易乾，著多陣都無問題，估唔到你變態到想幫我洗內褲」
「我先唔想幫你洗，你諗多左」
「係就最好」
為什麼要弄得我真的像變態一樣？早知不邀請雪凝上來躲雨！
我將衣服掉進洗衣機，並叮囑雪凝不要隨便走進我房間，然後我就走到浴室洗澡。
———————————————————
「啊～」我洗完澡後坐在梳化舒服地嘆氣
雪凝突然站起來，並走到我前面。
雪凝單膝跪在梳化彎身哄過來，我嚇得背部全貼椅背，但她繼續貼近，我倆臉部只是相距約十厘米。
「仁，我有事相求」雪凝輕聲地說
太近了⋯但雪凝好像是第一次叫出我的名字。
她因為穿上了我的上衣，對女生來說碼數偏大，所以領口很自然垂下來，最重要的是她現在沒有穿胸圍！
我要冷靜⋯冷靜⋯冷靜！
「咩⋯咩⋯咩事？」我視線立即往天花板望
「我可唔可以係到住一排？」她雙手緊緊握著我的手，水汪汪的雙眼望著我
「下！？」
「我依家係西貢同嫲嫲暫住，翻學唔係咁方便，三個月後媽媽工幹完翻香港就會同我租地方住，所以我想係到打擾你一段時間」
我腦海一片空白，言下之意即是要與我同居嗎？與未成年少女單獨同一屋簷下？我不想被FBI邀請去喝咖啡⋯
「唔可以？」雪凝依然握緊我手，微微側頭疑問我，求我收留她
可不可以多點危機意識！我現在好歹也是個血氣方剛的男生，你竟然主動要求與我同居！？
「你翻學唔夠精神就係因為搬左去西貢？」
「嗯」
「係西貢要幾點起身？」
「五點」
五點！？天也未亮！還要堅持早起做便當！？好吧⋯敗給你了
「好⋯好啦」
「你應承左無得反口」雪凝立即摔開我手，便坐回原位
陷阱！這一定是陷阱！
「你呢啲算唔算色誘？」
「色誘？我洗色誘你？明明係你自己滿腦都係變態想法」
「唉，你鍾意點就點！不過你計漏左啲野，我雖然應承你比你係到住，但我無講過話唔收你租。」
「哥哥，雪凝我無咁多錢，求求你⋯」雪凝跪在地上抬頭用可憐的眼神望我
妹系？我何時當了你哥哥？這個女人一定是有人格分裂⋯
「叫多三聲哥哥先」
「哥哥⋯哥哥⋯哥哥」
現在的少女真現實！
「好啦⋯我講下笑，無諗過收你租」
「死變態」雪凝又變回佢原本性格
「咁幾時開始黎住」
「聽日」
「咁快？聽日仲要翻學喎，你夠時間執野？」
「我翻去執定先，翻學前過黎放低行李，唔洗來來回回，慳時間」
「咁你七點半上黎啦」
「嗯」
「你聽日直接搭的士過黎，你一個人拎住行李轉車等車咁麻煩，而且會快好多」
「但係的士好貴」
「得啦，錢解決到既問題就唔係問題」
聽見洗衣機發出咇咇聲，我便進廚房走到洗衣機前收衣服，然後拿出陶瓷乾衣機幫雪凝烘乾校服。
當我行出廚房時，雪凝已全身躺在梳化上睡覺。
真是一點警覺性也沒有！
我拿出薄被披在雪凝身上，看見她睡得像小孩一樣，我目光被她睡相吸引住，晶瑩剔透的肌膚，亮澤嫩桃的唇色，長彎的眼睫毛，這些是天生麗質的特性！但可惜配上她毒舌的性格，真是大殺風景！
先給她睡一會吧，畢竟每天五點起床上學，挺辛苦的。
那我也回房間休息一會⋯
原本睡著發了個好夢，但感覺到屁股好像被怎樣東西踩著，我就醒了。
我睜開眼睛，見雪凝已換好了校服，單腳站在我床邊，另一隻腳踩在我屁股上搖動我⋯
「點解要咁做呢」
「叫醒你，雨停左，我要走喇」
我望一望鬧鐘，原來已經七點
「好，洗唔洗我送你去搭車？」
雪凝「嗯」了一聲後就走出房間等我換衣服。
原本我有問雪凝要不要吃完晚飯才坐車回家，但她一口拒絕，說她嫲嫲會煮晚飯等她回家。
我和雪凝在巴士站等待，我倆其間一直沉默。
巴士快到站時我才問雪凝拿聯絡方式。
「雪凝，比你電話號碼我」
「下？點解？」
「聽日你唔早啲通知我落黎點比的士錢呀？」
「你又有啲道理」
我們在巴士到站前，趕快地交換電話號碼，並將我手上的雨傘給她，以防途中又再下雨。
她上到巴士，我們揮過手道別後，巴士就開駛了。
手機突然響起來，
———雪凝給你一個新訊息———
雪凝：今日唔該哂你，日後都要麻煩到你，請多多指教
————————————————
她真的不夠坦率，明明面對面不是給臉色我看就是挖苦我，一到隔著電話就誠實起來。
手機又再次響起，
———爾柔給你一個新訊息———
（語音訊息）爾柔：（嗚呀！阿仁，你今次真係要幫幫我呀！如果唔係我死都唔掂呀！）
我：咩事？
（語音訊息）爾柔：（我要做學生會會長，我想你幫我諗下辨法，詳情聽日翻學見面再講）
————————————————
怎麼？學生會會長？那麼突然？為何你們老是找我幫忙！