交友app嘅萬事屋: 沉船

沉船
27/4/20

當阿銀一心諗住同Hebe 傾計嘅時候，期待緊會唔會有進一步的發展，而且佢已經決定要忘記她面對現實。但係事情嘅發展係阿銀從來都冇聯想過，呢一件事將會係佢對交友app嘅態度改變嘅開端。

係食完晚飯嘅時候個陣時大概8:30左右咁我就喺度諗，究竟佢係咪仲喺度食緊飯呢，我諗我都係抖一陣睇吓YouTube先然後晏少少再搵佢啦，唔好煩住佢啦而家。如是者咁我就喺度睇吓YouTube，上吓社交媒體咁啦，突然間手機鈴聲一響，等我仲滿心期待睇吓會唔會係Hebe，點知唔係佢，原來又係我個老死Cody。 佢係同我一齊去英國讀書，一個識咗都差唔多有五年嘅一個兄弟，雖然我哋唔喺同一間學校到一齊讀書，但係我哋都成日有保持聯絡。咁佢搵我呢就問我：


「喂你啱啱食完飯啊？都差唔多過咗一個禮拜啦喎，我記得我同你都係同一日返嚟啊有咩搞啊，好鬼悶呀喺屋企。」





「屌 有咩搞姐咪又係係屋企到上吓堂打機囉，不過話時話我啱啱琴日呢我見太無聊呢就down咗個交友app嚟玩啦」

「噢 你個衰仔喺度識女仔，你條友仔冇記錯對上一個都成三年前啦喎，終於肯的起心肝去識下人啦咩？」

「唔多唔少啦不過你都知啦成三年囉係時候放低佢，唔開心嘅嘢記咁耐都冇用㗎喇，咪當係一份回憶擺喺心入邊囉」

「聽你咁講就放心啦，而家咪幾好囉上去識下人啦，識咗你份人咁耐你知㗎喇你條友真人係粒聲唔出，係同你熟絡左先知，原來你咁鬼多嘢講把口咁臭，你而家竟然肯上網主動識女仔，你冇事呀係咪食錯野啊？」

「收皮啦你，我呢啲咪淨係可以上網識女仔囉，點同你呀日操夜操，操到副偈咁鬼fit」





「咁就梗係啦，不過我呢啲都係外表野姐，你有嘅係內涵呀嘛」

「呀屌你啊，都唔知你係明串我定暗串我」

「唔好講呢啲，咁點啊你係個app識到阿嫂未啫？」

「嘻嘻，啱啱琴晚開始有同個女仔計傾囉，不過都係傾吓啲家常便飯野，唔知佢食完飯未呢，可能晏啲再搵佢囉」

「喂 好心你照下鏡啦睇吓你而家個死人樣，笑䐘䐘咁 ，幾時介紹阿嫂俾我識呀？」





「咩阿嫂啊你講嘢呀，應該冇咁快嘅我諗，你都知㗎喇我不嬲對感情呢啲嘢，好認真㗎嘛。」

「係啦知啦，又唔係唔知你條友咁鬼長情」


電話鈴聲一響，我撳一撳去睇今次真係Hebe啦，有啲緊張添，好驚唔知陣間會唔會講錯嘢呢，佢就send 咗個message個嚟啦。


「Hi~ 搞緊咩呀？」

「我啱啱食完飯啦 你呢？」

「我都係喎，順便沖埋涼跟住咪嚟搵你囉～」

「咁好你冇係個交友app度識到其他人咩，你淨係同我傾計嘅」





「冇呀，我都唔係識咗好多人，同埋傾落我都係覺得同你傾最自然啲，其他人比我嘅感覺都係好似係咁sell 自己，又問三問四，好麻煩呀」


聽完Hebe 咁講我都暗中自喜，心諗好彩姐原來其他人仲更加奇怪，等我仲以為自己已經顯得好似好緊張咁，睇嚟今鋪真係可能有機會，唔得唔得要冷靜啲先睇定啲先。


「Gordon 呀 其實呢不如我哋唔好喺度傾呀，你介唔介意交換contact，然後傾電話呀？」


我心諗唔係哇！乜而家啲後生女咁open嘅咩，咁快就交換電話傾電話，不過都好嘅起碼我唔使抄佢牌好似好尷尬咁，死啦我都有好耐冇同女仔講個電話啦好緊張添，咁我就覆佢：


「好啊冇所謂啊嗱呢個係我電話xxxx xxxx ，你打俾我囉。」





「Ok~ 你等我一陣啦我去個廁所先。」


咦咪住先，呢啲咁似嗰啲騙徒嘅手法嘅，出事啦我會唔會中咗招啦已經。大概隔咗5分鐘突然間電話響，xxxx xxxx 的來電，跟住我就接通咗啦：


「喂喂，係咪Gordon 呀，我係Hebe 呀 聽唔聽到啊？」

「喂 hello 我係Gordon 呀 我聽到啊」


如是者打後嘅一個鐘頭都喺度傾緊啲日常野啊，家常便飯啊，再唔係就係喺社交媒體見到嘅得意嘢呀⋯⋯


「係呢Hebe啊你有冇養啲咩寵物㗎？」





「我冇呀你有咩，不過講開又講啊我都幾鍾意貓㗎，我都幾想養返隻，不過阿爸阿媽唔俾，唯有去同friend屋企玩下囉。」

「咦乜咁啱嘅我都好鍾意貓，我成日呢都係社交媒體呢見到啲貓嘅post呢，都覺得好正，唔知點解我好想索一索隻貓，好似見到啲人吸貓呢，成個人精神晒咁。」


死啦，我咁樣講會唔會顯得個人好奇怪呢，唔知點解同Hebe 傾偈真係好輕鬆，乜嘢都可以同佢講，我真係好想每一日都可以同佢咁樣講一兩個鐘頭電話，然後傾計傾到佢瞓著，之後我先去瞓。 唔通呢個係久違嘅戀愛感覺？正當我係心入面諗緊以上嘅嘢嘅時候Hebe 佢突然間問：


「係呢你咪同我講過你對上一個係三年前嘅，咁你有冇諗過開始一段新嘅感情，定係還是你仲未放得低佢？」

「哦，唔係呀我都已經完全放低咗佢㗎喇，不過我冇刻意去忘記佢囉，當係一份回憶囉！」

「哦係呀，咁⋯你呢你嘅理想女友呢係點㗎，有冇啊鐘意啲咩類型嘅女仔呀？」






Omg 點解佢會咁問嘅，我好緊張呀佢咁樣問係唔係⋯⋯有機會都對我有意思呢？我真係唔知啊好緊張呀，睇嚟我真係好耐冇同女仔溝通過，俾佢咁樣

講一講成個人都好緊張同崩緊添⋯⋯


「我諗呢我係鐘意一啲比較外向少少嘅，乜都會同我講嘅，肯願意去聽我講嘢，咁如果最好嘅話就當然投其所好啦。不過講開又講呀，其實你都幾似我嘅理想女友⋯⋯⋯」


點算呀我咁講會唔會太明顯呢，佢會唔會覺得有啲問題啊，我唔知呀好緊張呀，我個手心都出晒汗啦！隔左冇耐佢回覆話：


「我都明嘅，突然間俾你咁講都唔知講咩好添，我都好開心我可以達到你心目中嘅女朋友嘅形象，話時話呢我哋都傾左一兩個鐘啦，依家時間都唔早啦，我要瞓覺啦，我聽朝仲有堂要上 bye bye~」

「咁好啦你早啲唞啦聽晚再傾過啦，同埋呢 我覺得我已經搵到理由，俾我delete 個交友app，聽晚再傾過啦」

「係咪真㗎，不過依家真係幾夜啦，聽日再講啦，你都早啲休息啦唔好咁夜瞓啦 good night~」


跟住佢就落咗線，死啦頭先聽到佢咁答，都唔知係咪我講得太明顯同埋太快啦，同埋唔知佢明唔明我話delete個app個意思呢，不過佢都講咗聽晚再傾啦，我諗應該都冇嘢嘅，然之後我就滿心期待咁，走咗去delete個app然後就瞓着咗。


係呢個時候阿銀佢從來都冇諗過事情竟然會咁樣進展落去，呢一件事對阿銀嘅影響都好大，從此佢將會對交友app 改觀，而且呢一件事會係佢係交友app 成立
萬事屋嘅其中一個原因。