交友app嘅萬事屋: 開端

開端
28/4/20

由於琴日嘅發生嘅事，阿銀嘅心情就好似熱鍋上的螞蟻一樣，而且佢已經有好耐冇試過有咁嘅感覺 ，所以阿銀琴晚都冇教好瞓，下一日差唔多成12點先起身。而且佢呢一刻從來都冇諗過Hebe會有呢一個反應，同埋佢之後會遇到嘅事，而呢一件事就係佢成立萬事屋嘅其中一個嘅原因。

哈～好攰啊，琴晚淨係喺度諗Hebe啲嘢都冇覺好瞓，嘩成12點啦嗱嗱臨叫過外賣食先好鬼肚餓。睇吓Hebe有冇搵我先，咦原來佢message左我喎，嘩咁早！今朝成8:00 就同我講早晨，係喎我記得佢講過話今朝要上堂，問吓佢上完堂未先。我心諗如果佢每日都同我講早晨就好啦～ 之後我就問佢你係咪下晝都有堂要上？佢就答咗我係呀，咁我就同佢講今晚再傾電話啦，跟住佢就冇覆我。

食完野啦咁我又喺度無聊撳手機啦，當我覆完我屋企人WhatsApp嘅時候，我走過去望吓Hebe覆咗未啦，佢呢嗰度就寫住佢在線上嘅，但係呢佢又冇覆我喎，咁我就問咗佢一句 係咪想完堂啦，你忙完喇？不過佢都係冇覆，冇幾耐佢就落左線啦。佢而家搞到我乜都諗唔到，乜都做唔到，本身其實我要上堂都冇心情上，我個腦入邊一直都喺度諗緊究竟我一陣間同佢講咩好呢，不如問吓佢啲興趣呀？ 定係應該問吓佢鍾意食咩啦？定係還是問吓佢以前啲男朋友嘅嘢？ 呀呀呀呀呀！ 我唔知啊，我淨係知道我依家好想同佢繼續傾偈，好掛住佢。 突然間鈴聲一響，我睇一睇手機又唔係佢，又係Cody，佢問吓我學業上嘅嘢，同埋吹左一陣水，不過我都完全冇心機覆佢，我諗佢應該都唔多唔少都知道，所以佢好快就話有事再講啦。當我扮上緊堂嘅時候，我根本完全冇心機上就攤左係張床度，不知不覺地唔知係咪因為我太攰我就瞓着咗。

突然之間我聽到我個手機響，我攞起個手機睇嘩，原來已經五點啦我有兩點瞓到五點瞓咗三個鐘。我睇返個通知中心見到今次真係Hebe搵我，佢話佢啱啱先落堂，而家準備去食飯啊今晚再傾啦。咁我就即刻覆返佢話咁好啦，晏啲再傾。原來佢一直都忙緊上緊堂，所以先覆唔到我，而唔係有其他原因。唔知點解我心入邊好似越嚟越掛住佢，越嚟越擔心佢。





當我食完晚飯嘅時候，我都係百無聊賴咁係度上吓YouTube ，不過一直都喺度諗，其實我應唔應該主動去搵佢，但係咁快去搵佢會覺得我煩住佢呢，然而佢對我嘅好感會下降呀⋯⋯唔緊要啦我都係等吓佢先，睇吓睇吓就12點啦。係我睇YouTube 睇到就嚟瞓着嘅時候，佢終於搵我啦。

「Hi~，Gordon，你喺度搞咩呀？」

「冇啊食完飯沖咗個涼啱啱喺度睇緊YouTube囉」

「係喎話說你真係delete咗個交友app 呀？」

「係呀好似我琴晚咁話齋我諗，有原因可以令我delete 個app 」





「我想問你呢，如果啦即係假設，你真係喺交友app度識咗個女朋友，咁你會唔會仲俾佢玩交友app？」

聽完佢呢句我心諗，佢咁講我諗都係得兩個情況嘅啫，一係就係其實可能佢都對我有啲意思然後就咁問，一係就佢完全對我冇意思仲想繼續喺交友app度玩。點算呀我應該點樣答佢啊，我好迷惘啊⋯⋯

「我諗我唔會想佢繼續上交友app囉，咁我諗如果佢上交友app嘅目的係搵男朋友，佢個目的都達成咗啦，點解佢仲要上交友app呢？」

「咁你咁講都啱嘅，正常都唔會想佢另一半識咗佢之後仲會想交友app嘅」

「係呢點解你突然間咁問？」





「冇只不過好奇問一問姐，我諗你都係一個認真嘅人唔適宜玩交友app，我哋有緣再見啦。」

「下你咁講即係咩意思啊，乜嘢有緣再見呀？」

「Hebe 不如你解釋吓，我唔明喎」

「我係咪做錯啲咩定係講錯啲咩啊，Sorry 呀」

從此以後佢都冇再覆過我，其實我都係想認真咁搵吓人傾計，原來我一直都冇估錯，上交友app嘅人就係咁，10個有8個都係玩玩下，邊有咁多人得閒同你認真呀。跟住呢幾日我又過返以前嘅頹廢生活模式，直至到有一日我又down返交友app，諗住搵吓人吹水。

今日已經係我冇玩交友app嘅第二日30/4/20 ，我喺呢兩日已經諗通晒，其實一直都係我入世未深，太天真，其實邊有人想交友app係會認真㗎，通常都係玩玩下嘅啫，咁我諗如果我抱住呢個心態，搵人吹吓水應該唔會再受傷啦掛。如是者我今次就用（認真傾吓計呀）嚟做標題，我碌吓碌下就見到一個寫住（如何從灰色找到黑白）咁我就喺度諗，邊個會用埋啲咁複雜嘅標題，呢個人都幾有趣，咁我就禁咗入去同佢開始對話⋯⋯

係呢個時候佢就出現咗，佢將會係影響阿銀上交友app嘅目的，佢亦都會完全顛倒晒阿銀對交友app嘅睇法，佢就係阿銀成立萬事屋，做樹窿嘅主要原因。