交友app嘅萬事屋: 吹吓水
吹吓水
1/5/20
係交友app上面乜嘢人都有，而今次阿銀遇到嘅人係佢意想不到，上去交友app嘅人未必個個都真係煩惱緊，或者有啲煩惱根本銀佢都唔會明白始終佢嘅人生經歷都唔係有好多，今次眼遇到嘅人佢從來都冇諗過其實會咁啱傾，年齡從來都唔係一個限制，係視乎你係一個咩嘅人，同埋你願唔願意同佢溝通⋯⋯
今日係紅日嘅第二日，因為琴晚聽完咁悲傷嘅事，加上自己又有同感所以其實都冇乜點瞓過。搞到成朝頭早六點先瞓得着，所以起身嘅時候已經係下午一點，阿爸阿媽已經買咗嘢食放喺枱頭，距離我完成家居隔離仲有三日，不過我諗而家因為疫情關係都未必會出街，最多唔使麻煩父母，可以自己落街買嘢食。當我喺度食緊野嘅時候，我就上咗交友app睇吓護士姐姐有冇上線，不過佢而家好似唔喺度，咁我就去公海睇吓有冇啲咩特別嘅標題吸引到我啦。跟住我就見到一個標題寫住（懷疑人生）我心諗上次個標題已經夠特別㗎啦，今次究竟呢一個會唔會有啲咩更加震撼嘅故事呢，咁我就撳咗入去然後就同佢展開左對話：
「Hello」
「揾我？」
「我見你標題咁寫，睇吓你會唔會有機會可以用到我呢個樹窿」
「又冇咩嘅，我自我調節咗啦」
「咁聽到你咁講都好嘅，有咩想傾吓呀？」
「咩都傾吓囉如果你唔介意嘅話⋯不過首先我問吓你幾歲先？」
「18歲，唔使問啦我考DSE，因為我係冇喺香港讀書好耐。」
「我唔係問呢啲⋯⋯」
「唔緊要囉，純粹話俾你聽，咁你呢請問你幾多歲？」
「我大你一倍，姐姐我30路」
「哦⋯都唔緊要㗎，都可以照傾㗎」
然之後我哋都吹左一陣水，傾吓啲日常生活野啊，時事野啊跟住就講到呢個感情話題，咁我都有同佢講Hebe嗰件事，以佢嘅講法就好似上次護士姐姐嘅講法差唔多，都係提點我，上得來玩嘅通常都唔係啲咩正經人，好少會同你認真講感情，真係認真發展落去，最多都係講吓心事。咁跟住我哋講到佢呢個拍拖嘅話題，佢就問我關於偷食嘅睇法⋯⋯
「係呢阿銀呀，其實你點睇有伴侶嘅人但係佢又偷食丫？」
「以我個人嘅睇法呢我就覺得都幾乞人憎，既然你都有伴侶就應該對佢一心一意啦，如果唔係點解你當初要溝佢」
「依家啲男人好貪新鮮感㗎嘛，呢個都係可能佢哋出去偷食嘅原因」
「不過我覺得如果係要出去偷食嘅話，照你咁講，佢一係就唔再對佢嘅另一半有興趣，一係就佢嘅另一半對性冷感，咁不如同佢嘅另一半清楚溝通下睇吓有啲咩問題」
「可惜我好專一，不過呢排都好似真係有幾多出軌嘅事件，我身邊嘅人都慘受遭遇」
「咁你朋友要勸你好快啲離開佢嘅另一半，有啲機會係唔值得比」
「我明啊，我諗佢應該同佢另一半分咗手，仲有呢我睇劇，小三都變埋正印，宜家呢個咩世界。」
「唔知啊可能世人對小三嘅形象唔同咗掛，不過我覺得咁樣只會鼓吹左小三嘅風氣，好有問題⋯」
「仲有嗰啲上網搵sp 嘅人⋯」
「呢個都係我都唔明白點解咁多人要搵sp 或者傾甜」
「如果呢啲人自己本身有老公老婆，有男女朋友嘅咁就好大問題」
「係呀我覺得如果你約炮都得嘅，但係首先你唔可以有對象」
「我絕對認同呀」
「咪就係囉」
「大家單身出嚟玩又唔同講法，成件事唔同晒囉好無，我好憎嗰啲明明有另一半都要出嚟偷食嘅人。」
「冇錯我完全認同」
跟住之後都傾左一陣計，吹左一陣水，其實以前我一直都覺得，我呢啲咁嘅年紀好難同啲大人溝通咁，好似有唔少代溝啊，一直都覺得佢哋唔會明白我哋年輕人點諗，可能我以前同父母嘅關係唔係咁好啦，所以根本就冇乜點溝通過，唯一一樣我哋達成共識嘅嘢，就係我去外國讀書。但係今次同呢位自稱30路嘅姐姐傾吓計，其實又唔係溝通唔到㗎喎，傾吓啲日常野啊，時事野啊，講吓煲咩劇啊不過話時話睇嚟上咗年紀嘅人，都係鍾意最小鮮肉啊，或者好似頭先上面嘅感情話題呀，發現其實我哋個價值觀都幾相似，又唔係真係咁難溝通啫。
「話說你喺呢個app度同嗰啲咩人傾過啲咩呢，有時候真係唔知有啲咩話題可以講吓。」
「咩都傾㗎，不過我又唔係成日上，但係首先起碼個名正正經經，先會考慮撳入去囉，四件我個名都係唔似有人撳入去嗰隻啦。」
「都唔係嘅，咪有我呢啲聲稱樹窿嘅撳下囉，不過真心講句啊同啲比我自己年紀大嘅人傾呢，我都係第一次覺得其實又唔係真係完全溝通唔到喎，反而個價值觀又幾相同。」
「係呀，如果真係遇到啲唔啱嘅咪同人講唔啱囉，不過你都算老成，識諗嗰啲。」
「同埋而家啲人呢14 15歲就已經想來玩，見到個標題呢都唔知撳唔撳入去好，都唔知佢哋而家點諗。」
「最細13我都見過⋯⋯」
「不過有陣時呢，一講年齡呢，我話我自己18歲有啲人已經自動走咗出去⋯」
「其實好正常啫，可能啲人覺得你仲細掛，我都係第一次同18歲傾，我又冇乜所謂，傾吓計要講年齡咩。」
「都係嘅，而家網絡世界唔同晒啦⋯」
「好啦，我要瞓啦，有機會再傾啦，聽日要返工⋯」
「好啦咁早唞啦 bye 」
今次係呀銀第一次同啲俾佢年紀大一倍嘅人傾偈，而佢終於開始明白俾佢大嘅人係點諗，其實只要你肯溝通就一定溝通到，只係視乎你有冇呢個忍耐力，同埋你係唔係明白事理，聽日下銀佢將會聽到呢位30路姐姐佢自己嘅故事，而佢又將會對感情有一個新嘅睇法同感慨⋯⋯
作者的話：星期五會再次停更，今次係為番外篇去作準備，敬請期待！