交友app嘅萬事屋: 如何從灰色找到黑白

如何從灰色找到黑白
30/4/20

從前阿銀同父母嘅關係不嬲都唔係好好，成日都會有爭執，特別係喺學業上，唯一佢哋有一致嘅意見就係去外國讀書，不過當晚係交友app遇到呢個女仔之後，阿銀嘅心境同埋對父母嘅態度，會就此改變。

當我係公海見到呢個標題（如何從灰色找到黑白）嘅時候，我就諗點解會有人用個咁奇怪嘅標題，咁得意嘅，等我試吓咁入去同佢傾吓計先。如是者我就撳咗入去同佢展開對話⋯⋯

「Hello，你個標題會唔會難咗啲啊」

「我自己都覺得好難，你話認真傾講咩話題先？」





「都係諗住吹吓水講吓心事囉。」

「係呢你幾多大啊」

「我18⋯⋯咁你呢？」

「嘩我 阿婆嚟㗎」

「咁即係幾多歲先，話說通常我講咗自己18之後，一係呢就話太細啦走先，一係就問唔使考DSE咩?」





「我23⋯係喎你今日考邊科，同埋我以為你好大個添」

「我冇喺香港讀書好耐」

「咁幸福呀，好呀有機會擺脫香港呢個咁垃圾嘅教育制度」

「其實真係，我都覺得自己幾幸福可以出國留學，咁你呢讀緊大學定出嚟做嘢啦？」

「我同你相反屋企唔係咁好，一早冇讀書，成嚿飯咁」





「咁你又唔好咁講你只不過係沉澱緊姐」

「你要多啲錫屋企人，好好咁報答佢地，唔好好似我咁細個唔讀書，變咗冇出去做嘢，之後屋企人就過身，連報答嘅機會都冇」

「Sorry⋯⋯勾起你啲傷心事」

「呢啲遺憾我一日都會諗好多，唔差在你嗰幾句⋯⋯」

如是者佢就開始講佢嘅故事⋯⋯佢今年23歲，考緊護士牌，呢個護士姐姐嘅身世係悲慘，佢阿爸因為急性心臟病突然間走咗，佢同父異母嘅家姐都走埋仲要係一個月之內嘅事，冇計因為佢阿爸同家姐都大年紀，呢兩件事仲要係喺佢阿哥大學畢業一家人喺大學影相，嗰陣時仲好開心一星期之後佢又同阿哥慶祝生日，不過半個月之後，呢兩件事就發生左。佢真係經歷得太多，變咗舊飯，有時有啲嘢壓到埋身想做舊飯都冇得你做，佢日日都喺度擔心佢呀媽，佢日日都怕唔知幾時就會輪到佢阿媽，人都癲。

我聽完之後，完全唔知比咩反應好，因為實在好大衝擊。我完全冇諗過，真係有人係呢個世界上經歷緊一啲咁痛苦咁悲傷嘅事情，因為實在太似電影嘅橋段，不過聽完個心好痛，我唔淨止係因為心痛佢，我亦都心痛自己點解唔識珍惜同父母相處嘅時間，其實我去咗外國之後我都開始會掛住我屋企人，喺嗰邊成日自己孤零零，朋友又唔多，有時真係寧願比阿爸阿媽煩吓，我亦都好慶幸我父母仲係我身邊，聽完之後好似上咗一堂咁。

有啲人想報答佢父母嘅時候，已經冇呢個機會，而且我屋企都有呢啲情況，突然間有屋企人患上腸癌，我成日都好驚佢突然之間就會走咗，雖然由於我去咗外國留學，已經好少有機會可以同佢見到面，但係始終佢係我阿叔都算係幾親嘅親人。所以當我每一次放假返嚟香港嘅時候，我除咗會抽啲時間陪下阿爸阿媽，我亦都會搵時間搵吓阿叔飲個茶食個飯，因為我唔知道呢啲時間仲有幾耐，我唔知佢會唔會突然間走咗，聽完佢講之後真係有同感。當我地講到咁上下，佢就話：





「算啦唔好再講呢啲啦，講完自己啲嘢聽埋你啲嘢，個人唔負都變到負。係呢你玩咗呢個幾耐呀？」

「我諗大概三至四日到啦，不過你都係我撳嘅第二個人，因為第一個女仔對我嘅影響都有啲大⋯⋯所以我隔咗兩三日先再上返黎呢度，因為我係屋企冇嘢做實在太悶。」

「搞咩啊，個女仔點樣影響你呀，你溝佢失敗咗呀？」

「咁又唔係，我連溝佢嘅機會都冇，不過我都叫做同佢講多一兩個鐘頭電話嘅，但係之後就差唔多冇咗音訊⋯⋯」

我就將嗰兩晚發生嘅事詳細咁話俾護士姐姐聽，不過佢個反應都出乎意料：

「唔係啩傾得個兩晚就沉船，你真係太嫩啦，你要知道呀上得去玩交友app嘅，通常都唔會同你認真㗎囉，除非佢要搵樹窿。」

「前面果幾句我都明嘅但係乜嘢為之樹窿？」

「樹窿顧名思義就係俾人塞啲問題落去，聽人呻吓，如果可以嘅話就會安慰下佢，同埋俾少少意見咯！」





「噢，原來係咁，咁我頭先算唔算喺度做樹窿？」

「你咁樣都叫做樹窿，咁你都幾唔專業㗎喎」

「咁點樣先可以做得專業啲啊？」

「首先要知道樹窿啊淨係聽人講心事嘅啫，佢就唔應該講自己嘅經歷出嚟，因為咁樣做可能會令人更加唔開心，除非嗰個人之後問你啦。」

「咁你咁講都啱嘅，其實本身我都冇諗住同人講，只不過係我見你都同我講啲私人野，咁我咪都同你講返下囉，加上我一聽完你講就好有同感呀嘛⋯⋯」

「不過我又係，叫個18歲同我分擔，好似有啲痴線，又諗起我個ex話我，搵件咁細個做男朋友腦都未生好，呀嬲咗 突然間諗返起。」

「不過話時話好多人都話我唔似18歲，我份人比較老餅，好似聽歌啊我都比較鍾意聽哥哥啊，陳百強啊嗰啲。」





「啱啊，一聽到你係18歲，正常呢就一早走鬼咗啦，18歲喎都唔知點溝通，不過同你傾又唔智障，定係還是你講大話，其實係38歲」

「又比你發現左添，使唔使比張身分證出身日期嚟睇吓」

「唔使啦，假身分證」

「不過話時話你拍過幾次拖？」

「兩次，試過同一個富二代拍拖不過冇feel就飛咗，仲俾阿哥話死港女」

「點解飛人呀，除咗冇feel之外真係冇其他原因？」

「咁你咁講又唔係嘅，個富二代品味奇怪先鍾意我，大把女追佢，而且同佢一齊壓力實在太大，個富二代啲屋企痴線，個啲咩餐桌禮儀啊，我頂唔順」

「都係嘅同富二代拍拖唔多唔少都會有好大壓力」





「雖然我睇落好似好斯文，但係我都係鍾意食大排檔，食一隻乳鴿 雞煲啊」

「正啊，我都勁掛住呢啲嘢食，當我喺嗰邊讀書嘅時候」

之後我哋吹多左一陣水之後就各自落咗線，同埋因為佢遲啲有重要嘅試要考，所以佢話8號之前都未必會再上嚟，佢就話有緣再見啦。其實我一開始係完全冇諗過，會係交友app上邊聽到啲咁認真嘅嘢，我亦都冇諗過我會有同感，同埋聽完之後會咁心up，我諗其實得閒上吓嚟做吓樹窿都未嘗唔係一件壞事啊。

呢一個就係阿銀嘅萬事屋第一位客人，佢之後會遇到更加多嘅人，聽到更加多唔同嘅故事，經過今次呢件事啊銀嘅心境已經有所成長，係之後嘅日子，佢會聽到各式各樣嘅故事，而佢將會繼續成長落去⋯⋯


作者的話：聽日會停更一日，呢排太攰要出去行吓，敬請原諒！