行山遇到三條女（少甜）: 搵工篇

我同Irene都同時間睇一睇，發現係阿傑問「大家都考完試啦，有無興趣去party room玩下呀。」

阿豪就覆:「有呀有呀，如果你搞既話。」

深田:「我ok呀。」

我望一望Irene講「你去唔去呀」

Irene就答話「去，點解唔去呀。」然後，我同Irene都打左去。



依架芷晴應該返緊工，唔知佢去唔去呢，一陣問下佢先，夜晚再接下佢放工，正。

然後，我同Irene就係鑽石山到搵左間黃店黎食，叫熨烤達人。間店無咩人，所以老闆娘都特別留意我地。過左陣，佢就過左黎撩我地講野，都傾得幾開心，佢知道我地今日考dse仲送左碗泡菜豆腐湯俾我地。

我地都食得幾開心，食食下Irene就問我「浩然呀，你有無諗過你返咩工呀。」

我就答佢「依架都無工返，我可以揀咩，有人請就唔錯啦。」

老闆娘唔知偷聽定唔小心聽到就同我地講「我唔小心聽到，你地係咪想搵part time呀，我依到請人喎。」



我聽到之後有小小感動，不過我再望一望周圍空哂既位，講「老闆娘，但係市道咁慘淡，人都唔使咁多，你唔專登俾工我地返喎。」

老闆娘就講「你都傻既，依架先十一點幾，梗係少人啦，等多陣就多啦，不知幾多手足幫襯呀。我同我老公午市同晚市真係忙到呢。」

我就講「真係既，咁我黎呀。」

Irene都接住講「我都黎呀老闆娘」

然後，老闆娘就俾左佢電話我地，話「你地幾時得就黎啦，不過盡快啦，我地真係好攰啦。」然後扮一扮可愛，真係得意呀老闆娘，睇黎有個好老細啦。