行山遇到三條女（少甜）: 媽媽篇

望住大海，感受住船隻係度浮浮沉沉，真係有種鬱鬱不悶嘅感覺，原來十八歲就係咁既感覺。

生活既壓力真係好多，好多野都係無了期，沒完沒了，我再感受唔到坪洲嗰陣微微涼風啦，要返去城市既煩囂之中，真係好辛苦。

佢哋係度玩緊uno，我就係度發左四十五分鐘吽哣。

到左中環之後，我就同芷晴搭返去黃大仙，佢哋就返去觀塘。

芷晴就問我「你無野呀嘛」



我就答佢「無咩野既，係依兩日太開心，要返黎，所以樂極生悲姐。」

芷晴就講「你生日喎，開心啲啦。」

我格硬整左個笑容俾佢。

然後，芷晴就錫左一下我塊面，講「你瞓陣啦，可能太攰啦。」

我就靠左落芷晴既肩膀上面，瞓着左。



我再次醒左，就到左黃大仙。

芷晴就怕怕羞羞咁問我「bb，你今日上唔上黎呀。」

我就又再戴上個虛假既笑容講「唔好啦，你返屋企瞓陣啦。」

芷晴就都好體諒我講「哦，咁好啦，你都早啲休息啦。」

我:「好啦，拜拜啦bb」錫左佢一啖之後就走左。



返到屋企一打開門就見到關哂燈，應面而來既係空虛感，真係家唔成家既感覺，得返自己一個。

我坐係梳化到，開下電話睇下youtube，發現都係搵唔到心靈既慰藉。

明明有朋友，但就想一個人，感受孤單，但係又好傷感，種感覺真係難以言喻。

突然之間，廚房就傳出左開門聲，唔係又有pee呀。

媽咪就攞住個雪芳蛋糕出黎「阿仔生日快樂」

我見到之後慢慢熱淚盈眶，淚水係我既眼眶不停咁打滾，嗰種孤寂既感覺頓然無存。

我真係係度不停咁抹眼淚，但係佢仲係不停咁流。

媽咪就講「做咩呀仔，好地地喊咩姐。」



我無答到佢，只係趴係媽咪嘅肩膊上面。

自從老豆走左之後，媽咪就為生計，慶祝生日就買個雪芳蛋糕就算，或者我依架仲係唔鐘意雪芳蛋糕，但同屋企人慶祝先有感覺。

我今日先知親情既重要，所以我就講左句「多謝媽咪。」然後攬實咗佢。

媽咪就講「唔好講啦，食啦」

我慢慢先停止左哭泣聲，鬆開左手開始食個蛋糕，然後我地就分開左一人一半食。

途中我一路食就一路望住媽咪係到食，媽咪就好疑惑咁問「做咩呀，我塊面有野呀，神神化化既。」

我真係衷心咁微笑，同拎頭講「無呀，媽咪好靚呀。」



媽咪就唔領情咁講「依啲招攞去溝女朋友啦。」

食完之後，媽咪就摸一摸我個頭，「睇下睇下原來都咁大過啦，十八歲啦仔，生生性性啦知道嘛。」

人總有個階段係突然咁成長，突然咁重視親情，明明年年都聽同樣既野，但今年聽特別有感觸。

可能真係睇住媽咪既身體慢慢咁有明顯既衰退同 白髮蒼桑，開始識得珍惜，有時啲野真係一夜間既事，邊個都講唔定。

然後，我就去左沖涼瞓覺，係喎，聽日有新同事喎。