行山遇到三條女(少甜): 浪茄灣篇8
第二日起身,大家都係精神不振咁。當然就包括我啦「早晨呀,咁多位」大家都係有氣無力咁回應我。
我地就逐個逐個咁出營,一出到去就見到兩隻柴柴係度玩緊,估唔到佢哋竟然無走到,不過我地都無咩精神去理佢哋啦。
之後我地就去左海邊簡單咁沖洗下,抹下面咁。
抹完就出番去,食下早餐咁。
芷晴:「我地玩到幾時呀」
我:「我本來諗住今日走,但係啲山路今日應該好多水,我一陣睇下先。」
Irene:「唔緊要呀,又可以玩多日啦」
我:「依樣唔係重點呀,重點係我地無野食啦差唔多」
Irene:「係喎」
可嵐:「荒島日記就靠你啦浩然」
希望唔使啦,餓壞你地咋。
食完之後,佢哋都有返氣力,就同啲狗狗玩。
但其實係啲咁既地方,就算咩都唔做都好正。我就靜靜咁搬左張櫈出黎,坐係度望住茫茫大海,放空身體。
隻眼就愈來愈攰,無錯其實我係眼瞓,瞓左唔知幾耐之後,芷晴就拍醒左我「起身啦」
我就溫溫燉燉咁起返身「中午啦」
芷晴:「係呀,我睇過啲食材可以食埋中午既,有啲麵同菜咁,不過就好勉強囉,你同Irene去睇下山路點先啦」
我:「好啦」
我就拉住左Irene行去山路到。「點呀十八歲咩感覺呀」
Irene:「都係咁囉,但係好似少咁啲野咁」
我:「你係咪第一次唔同屋企人慶祝呀」
Irene:「係呀」
唔知大家係咪都係咁,親情真係第一位,無可厚非真係血濃於水係唔同感覺。「無野架,你到時番個屋企就無事架啦」
Irene:「真係架」
我:「係呀」
行多左陣就到左山路囗,真係好多水氹,同啲沙同泥都幾跣下,行過去可能會濕哂身,同埋真係會幾危險下。
我:「算啦,咁樣我地都應該要留多日啦」
Irene:「唯有係咁啦」
之後,我地就行返去營地到。佢哋兩個就係度食緊野,我地都即刻加入戰團,我就一路食一路講「濕哂啦,行唔到呀,聽日先走啦。」
可嵐:「咁呀靠你啦,夜晚我地無野食啦」
我就係度諗究竟有咩方法呢。
芷晴:「啊,你地有無睇過啲野外求生既channel呀,佢哋好似可以捉到下蜆同青囗架,同埋揭開啲石,好似有蟹架。」
我:「好主意,依架就試下啦」我地就快快手食完啲野。
之後就一人一個膠袋,行左過海邊,佢哋就摸下蜆,我就搬下石頭,各司其職。
佢哋無幾耐就狂叫「搵到啦」
我就唔係見到啲寄居蟹,係佢哋行動真係好快,我想捉都捉唔到。
難得終於捉到,我就攞左俾佢哋睇「你地睇下,我捉到啦」
可嵐:「嘩好勁呀,咁細隻夠你食定我食呀」
我:「啊」隻蟹鉗左我一下,就放開左佢,佢就跌咗落地下,好快咁捐咗落沙入面。
可嵐:「無埋」真係呀,都唔知係咪踩到佢條尾,串到呢。
我就無理到佢,繼續努力捉蟹,捉到去下午四點,咁辛苦先捉到十幾隻,佢哋就捉到盆滿缽滿。
我:「你地攞啲野去洗下啦,費時一陣食到肚痛呀。」
佢哋就攞左啲野用水洗左洗,我就煮熟左個鍋。
滾左之後,就攞啲野全部落哂落去,大家都好期待咁。
我:「滾左啦,食得啦」
大家都急不及待起筷,可能因為係辛苦得黎既食物,食落真係特別好食,大家都露出左滿足既表情。