行山遇到三條女（少甜）: 失去篇1

第二朝起身，成個人都軟奶奶咁，無咩精神力氣，可能真係操勞過度啦。

「汪汪」兩隻狗係度吠我，尋日又唔見佢地，今日又係度既。

之後又過黎爬我隻腳，用一個好可憐既眼神望住我，估都估到佢哋肚餓啦。

我就摸一摸佢哋講「你地肚餓就自己搵野食啦，遲早你哋都要靠自己架啦，兼且我都無野食啦。」

佢哋好似真係好似識聽我講野咁「嗚~~」咁叫住走開左。



我就自己去左刷下牙洗下面咁，無幾耐芷晴佢哋都起左身，過左黎一齊刷牙「早晨呀」「早晨」

可嵐就同芷晴係我左手邊刷，我右面就係Irene。

Irene就細細聲講「你地尋日好大聲呀」

我就調戲佢講「係咩，芷晴佢忍唔住呀嘛，點呀，你又想試下呀」

Irene就面有紅暈講「唔係呀，你地尋日嘈到我地瞓唔到呀」



我:「你唔整到我尋日咁，我洗咩氹番芷晴姐」

Irene:「唔好意思囉，欸，你依度紅左一噠既」

我:「er...尋日俾蚊叮咋嘛」

Irene:「扮哂野，以為我真係唔識咁」之後佢就走左番營到。

我快快手梳洗完之後，就返返去營地到。



我:「都已經無野食啦，不如依架走睇下西貢有咩食啦，一陣我請。」

大家都好開心咁答左句「好呀，多謝浩然哥」唯獨可嵐個樣好似有啲悶悶不樂咁。

其實每日都至少有條女唔開心，你都咪話唔煩呀。

大家就收拾左下啲野，好快就可以出發啦。

「汪汪」啲柴犬一路過黎就一路叫，睇得出佢哋都好唔捨得我地，可能唔包括我啦。

芷晴就烏低身抱左佢哋幾下「柴柴~~可唔可以帶佢哋走呀」

我:「下次再返黎先帶佢哋走啦，無理由就咁攞走架，兼且你自己都未養掂，養唔養得到佢哋先」

芷晴:「咁算啦，拜拜啦狗狗，下次再黎探你啦」



好快我地攀山涉水，終於就出到有野食同有車既地方。

我地就隨便係間酒家到食左啲野，間酒家主要就賣海鮮，夠哂新鮮，老闆見我地咁細個，仲送左幾隻扇貝俾我地。

都真係幾好食下，可嵐個為食妹，頭先仲好唔開心咁，依架就又嗌左龍蝦，又叫蟹咁，不過算啦，大家食得開心就得啦。

食到咁上下，伙記就攞左張單黎，我仲係到吮緊蟹膏。

Irene就拍一拍我「喂，浩然，你睇張單」

我:「唔得閑呀，大家食得開心就得啦」

Irene就好緊急咁叫我「唔係呀，你真係睇下先啦。」



我就一路食住一路擰轉頭望，差啲噴哂啲野出黎。「二..千..蚊」

Irene:「你小心啲食啦，唔好哽親呀，唔夠俾就一齊俾啦」

最後，我為左男人既尊嚴都係俾左二千出去「碌卡...啦唔..該」眼淚都就黎跌落黎啦

我真係唔知餐飯究竟值唔值咁貴。