行山遇到三條女（少甜）: 快樂時光篇2

我地就開始左酒局，佢哋都一致對付我依個外敵，不停咁針對我，得閑就密密針講戰術，當我無到咁。

但係有我依個猜枚，撞機高手係度，佢哋又點會得呈呀。

我:「十呀」

芷晴:「吓，又要飲啦」

我:「係呀」芷晴就乖乖地攞起酒杯。



我:「仲有你呀，唔好扮野呀」Irene以為唔出聲就無事。但係依度得你地兩個係度，我酒場刑警又點會唔記得關照你呀。

Irene都已經飲到塊面都紅紅到，有少少不勝酒力咁「浩然，你幫我清左佢啦」又傻傻咁望住我笑。

我份人最衰就係心軟，就幫左佢飲左。「多謝浩然」

我:「到邊個抽呀」

芷晴:「你呀」



我就係牌堆到攞左隻牌出黎，我見到就呆左，係陪飲員呀，則係佢哋邊個輸，我都要陪佢哋飲呀。

佢哋兩個見到我攞左陪飲之後，就突然精神哂，係度陰陰嘴笑一笑，齊齊就攞起酒杯好似啲衙差咁，一下一下咁敲落枱到「碰碰碰」

因為大牌檔有個規矩就係放杯要嗌多謝，無嗌就要飲，我依個做陪飲既當然要陪佢哋啦。

一世風流，估唔到都係敗係女人手中，果然媽咪講得無錯，漂亮的女生最會騙人，頭先仲醉醺醺，依架又咁精神。

我:「夠啦，你地都要飲架」



Irene:「飲咪飲，我就唔信我地兩個唔夠你飲」

芷晴:「今日唔係你死，就係我地亡」

唔講仲以為我係啲咩大奸角，要佢哋替天行動警惡懲奸添呀。「兩位女俠饒命呀」

最後，大家都兩敗俱傷，都係酩酊爛醉咁，但我都叫做自我感覺良好，都算講到下野，不過我都極限啦。

我:「唔好再飲啦你」

Irene:「我...都..未醉，酒...呀」

大家未到八點鐘已經係度胡言亂語咁，真係唔得掂呀「我去沖涼先啦，你地瞓陣覺先啦」

佢哋就糊里糊塗咁又擰頭又點頭咁。



我順便安置左下佢哋係梳化到，佢哋就互相當大家係攬枕咁攬埋一舊，嘴唇又就黎貼嘴唇咁，感覺上我睇少陣佢哋就會磨豆腐咁。瞓得好舒服咁。

不過佢哋一陣唔起身都要起架啦，個身咁污糟。但係依架唔理住，去沖涼先。

我就落左去個浴缸到，浸左個熱水浴。「嘩真係爽」估唔到芷晴屋企麻雀雖少，但係竟然有個浴缸，都係第一次用咋。

浸到我唔想出黎，都唔知係入面浸左幾耐啦。