行山遇到三條女（少甜）: 快樂時光篇7

發左個美夢之後，就一覺瞓到天光啦，我自自然然就出去刷牙洗面。但係就見到梳化空無一人，Irene同芷晴都唔見左，廚房廁所都無人，我就心感奇怪，無理由粒聲唔出就走左去架。

我就自行腦補左個芷晴嬲嬲豬，尋日我放任佢哋不管，芷晴就再同Irene鬧交，一怒之下就將Irene殺左既畫面。

諗起都覺得毛骨悚然呀，不過突然又諗返起今日係父親節，佢哋會唔會係一齊去左買餸煮飯呢，所以我就隨便sent左個信息俾佢哋問下佢哋係邊就算。

我自己一個都無咩野做，又係打下switch咁，個Just Dance其實自己一個玩都幾悶，時間就咁一點一滴過去。慢慢都開始有啲肚餓，就打左通電話俾芷晴想叫佢買個飯俾我「嘟..嘟..嘟」入左忙音，姐係熄左機，打左通俾Irene，結果又係咁。

又無sent番信息俾我，搞到我真係有啲驚，究竟咩事呀。



係我搓手頓足期間，就有通電話打左過黎，係深田打過黎，我即刻接起電話。

我:「喂，做咩呀」

深田:「Irene要走啦」

我:「走咩呀」

深田:「移民去澳洲呀」



我:「吓，大佬你玩我咋，而家疫情邊有飛機呀」

深田:「自己諗啦，兩點鐘機，你無咩時間啦，你係唔係打唔通俾Irene呀」

我又到其實真係「咁我可以點呀」

深田:「出門口去機場啦，我一陣再sent資料俾你呀」

霎時出現嘅資訊突然湧入我腦海入面，令我思緒有啲混亂，Irene要去澳洲，一件咁大件既事我竟然唔知，變化有啲太大，真係好難接受到，但係我淨係知道，我要去機場。



我望一望手錶已經就黎成點鐘，我就咩都無換到，就咁踢拖落左街到，跑去路囗到隨手截左部的士。

我:「司機，機場呀，快」

司機就即刻開左車，飛快咁前進着，司機就撩我傾計:「點呀，靚仔激嬲女朋友呀」

我:「算係算唔係啦」

司機:「洗唔洗買束花俾佢呀」

我就黎俾佢煩死，就講「司機我俾多啲錢俾你，你安靜啲啦」

司機就即刻靜左落黎。

我望住電話顯示既時間一點一滴咁流逝，真係愈發緊張，估唔到依啲電視劇情節終有一日真係會發生係我身上。