行山遇到三條女（少甜）: 重燃篇10

我諗左一陣，就決定上去搵芷晴講清楚，一路搭lift，一路就係度忐忑。

企係佢屋企門口又蹉跎左陣，行黎行去，都諗唔到點講。過左陣，芷晴間屋就傳出左啲開門聲，原來咁啱芷晴出黎揼垃圾，就見到我。

佢就攞住袋垃圾，好愕然咁望住我講「bb你係度既。」

我：「er...，我咁啱放完學咪上黎探下你囉。」

芷晴：「哦，咁你快啲入黎啦，唔敲門企係出面做咩呀。」



我就乖乖地跟左佢入去坐左係梳化到，明明只係一句說話，原來要講出黎個心理壓力係咁大，所以都係遲遲未講。

繼續都係閑聊家常，講下老闆老闆娘最近點呀。不知不覺我同芷晴既熱戀期原來已經慢慢離開左，變到好似老夫老妻咁。

話題同說話中都少左熱愛時既激情。

芷晴：「你應該都未食野啦，不如我整個我最近既拿手好菜俾你啦。」

我自己都真係有少少肚餓，所以就答佢「好呀，多謝bb」



等佢入左廚房之後，我就自己行下芷晴屋企，其實我都已經好耐無上過黎，入到佢間房就見到好多既相框，好多張都係同我影既相，其餘就有同深田同Irene影既相。啲點點滴滴慢慢又湧現返黎。

依一年都無咩睇過Irene既相，見到真係有啲莫名既傷感，真係好想見返佢，樣貌可能逐漸遺忘，但係感覺一直都係度。

芷晴就入左黎，問我「睇緊咩呀」

我：「無呀，睇緊啲相囉」

芷晴又走黎同我一齊睇「真係好多回憶呀，唔知Irene依架過成點呢」



我：「係囉，無端端就del哂我地聯絡方式，都唔知佢依架究竟點樣。」

芷晴就有啲開玩笑咁講「你好掛住人喎」

我就無答佢講既野，因為話掛住真係好衰，唔掛又好似好假咁，所以就講「咁你呢？」

芷晴：「我好朋友當然掛住啦，真係好想知佢依架過成點呀。」

我聽到之後，就唔知點解鼓起左勇氣同佢講「咁不如我地一齊去澳洲呀」