晴。朗。: 6

第二天，還是來到了宜晴家樓下，在遠處又已經看到她了。不同的是，她戴了眼鏡，將她身上的書卷味更加地散發出來。
“準備好未啊P牌妹” 我恥笑
“睇吓點，魔鬼教練” 她瞪著我

我們來到了人煙稀少的公眾停車場。顯然宜晴開車時仍然緊張，被車控制了自己，所以我著她先坐到附駕駛座。

“你睇下你，揸得軚盤咁實，濕晒喇” 我說
“邊度濕晒啊” 宜晴咬咬嘴唇，要是把持力少一點，早就忍不住了。
“我講個軚盤啊，你諗乜啊” 我反起白眼
“都唔知你係唔係太監，咁都無反應” 她好奇地問


“專心睇住我示範啦，講” 我說
“嗱，揸車最緊要放鬆啲。係你控制架車，唔係架車控制你，唔好成日踩brake，有需要先踩，你成日都踩遲早壞車” 我一邊解說一邊示範
“但係...我都係好...驚喎” 她緊張地說
“唔使驚，我喺度，有事我救妳” 我看著她說
－－－－－－－－
“但係...我都係好...驚喎” 我緊張地說
“唔使驚，我喺度，有事我救妳” 皓朗看著我說

這次我有信心，因為是他鼓勵我的。不知不覺，我好像越來越喜歡他，不知道他感受到嗎？
－－－－－－－－


終於開始練習，先從最簡單的繞圈著手。明顯看到宜晴經常偷位不足，導致有機會撞到別人。然後，發現她的倒車技術也是一般，不禁搖頭嘆氣。

“你好多野唔得喎，你個牌淘返嚟㗎？” 我問
“咩喎，我合格㗎” 她嘟起小嘴
“宜家練習泊位，就後面呢個啦，記得睇位睇車cam” 我說
“到未啊，仲有無啊？” 她問
“自己睇啦” 我說
“啊啊啊啊啊啊啊啊啊啊啊” 她驚叫
“叫乜嘢啊” 我煩惱地問
“仲有無啊，我驚撞啊” 她很緊張地問


“睇cam啦” 我搖頭嘆息

車停定了。於是我下車查看，還泊得不錯。

“泊得幾好喎，下次帶啲道具嚟練習更加有效” 我說
“咩道具？” 她不解地問
“嗰啲唇膏啊、遮瑕、手袋，全部擺白線嗰度，包保唔會撞” 我自豪地說
“哼，你好好咩？你都唔係揸咗好耐咋喎” 她說
“仲好講，因為你我架車花咗啊，到宜家都唔捨得整” 我欲哭無淚地說
“對唔住咯，借俾你揸喇。話時話，今晚你去邊度”
“去旺角party room，都係嗰啲同學聚會” 我說
“我可唔可以一齊去㗎” 她雙眼發光地問
“無話唔得嘅，但係好悶㗎喎” 我說
“得啦”



於是，我倆驅車前往旺角。時間尚早，女人天性難移，一個箭步就去了精品店看首飾。

“哇，呢條好靚啊” 她指著一條項鍊說
“睇過。係嘅，靚過你” 我笑著說
“哼”
“2位，呢條係今季最新嘅設計，戴出嚟高雅而有文青感覺，都係1200蚊咋” 店員說
“有啲貴喎，算啦都係唔買喇” 宜晴依依不捨地離開店舖
“我想去個廁所，喺呢度等我一陣” 我說
“哦” 她並不知道我的用意

我一路狂奔回到那間店舖，找回那位店員
“唔該，我想要返嗰條頸鏈，幫我包起佢吖” 我氣喘吁吁地說
“有你呢個男朋友真係幸福” 店員說
“邊係吖，我哋朋友嚟㗎咋” 我苦笑說
“祝你好運，下次帶你個女朋友過嚟幫襯啊”


“好”

我連忙將項鍊收好在車上，再去找宜晴。

“乜你去廁所都咁耐㗎？” 宜晴不耐煩地問
“對唔住咯，行啦” 我說
“我想去買啲日用品，你去先啦” 她說
“唔使我陪你？” 我問
“係唔係我買M巾你一齊吖” 她沒好氣的問

我於是一人先來到party room。果然，不見多年的同學還是老模樣⸺那麼口賤。

“朗哥，好耐無見，又係一支公過嚟啊？26歲喇，仲係A0” 這是我的死黨阿明。
“唔好意思啊，佢成日都係咁” 這是她女朋友Jenny。
“你就好啦有個咁好嘅女朋友，溝到阿嫂係你福氣啊” 我揶揄他


“講呢啲，認真你都26歲，要唔要介紹Jenny啲friend俾你啊” 阿明認真地問
“一支公都幾好吖，唔好好似我咁慘，做老婆奴” 這是Thomas，結了婚的他有1個小孩
“你講乜嘢啊？” Thomas的老婆阿詩瞪著他
“無啊老婆” Thomas一副求饒的眼神逗得我們哈哈大笑。
“話時話，你唔打算識個女仔咩，你好似無乜女仔friend，鋪定路都好吖” 阿明說
“遲啲先……” “邊個話佢無㗎？” 我還沒說完，就已經被人打斷了。
“沈宜晴，上嚟又唔通知我” 我沒好氣地說
“咩啊，你當人路癡咩” 她說
“喔喔喔，有人話自己無女喎” 阿明說
“大家好，我叫沈宜晴，係李皓朗嘅女朋友” 她笑說

我一臉問號，然後沈宜晴把我拉到一旁，低聲說：
“我唔想你無面先友情客串㗎，你唔想咪走咯”
“咁又唔係，難得你肯嚟咪玩下咯” 我一邊挽留一邊說
“咁就差唔多”



沈宜晴被那些女生拉走了，我也走回了男生那裡。

“勁喎朗哥，無見一排溝到個咁靚嘅女仔” Thomas說
“咪係，唔聲唔聲突然一鳴驚人。點啊，得唔得先？” 阿明露出了一個別有用心的微笑
“咩啊，我哋唔會做嗰啲嘢㗎” 我尷尬地說
“各位來賓，宜家進入今日嘅遊戲時段，今日會玩考驗情侶嘅食百力滋”

一對對情侶都玩了，應該不會抽中我和宜晴吧。

“跟住我哋抽出壓軸嘅一對情侶：李皓朗同沈宜晴”

“吓？” 我望着宜晴，她望着我，一臉無奈。然後她便拉着我的手，說：“行啦”

“兩位，如果百力滋中途跌咗，你哋就要當住所有人面前接吻10秒㗎喇”

唉，我望着宜晴一臉無奈。

“開始！”

我倆一起咬著百力滋，嘴唇越來越近。眼看百力滋將會被吞進肚子，心裡放鬆了不少。怎料，宜晴一下鬆開，一段百力滋掉了在地下。我頓時呆了看著她，她攤攤手，表示無奈。

“哎呀，跌咗落地下喎，咁呢對情侶就要公然放閃喇，有請” 

我深呼吸，看著沈宜晴，著她放鬆。她好像比我還輕鬆，完全不害怕。眼見她的嘴唇越來越近、越來越近，我也閉上眼睛，接受這一切。碰上了，一陣如電擊一樣的感覺湧入我心。沈宜晴的嘴唇很厚，但是軟綿綿的。雖然這已經是我第2次吻她，但是很明顯我倆的距離近了，宜晴好像吻得更深情，而且讓我更怦然心動。

“哇，呢對情侶公然灑狗糧，盲喇” 主持人說

我倆才記得分開。我看着她，她也看着我，彷彿一切都不存在，只有我們倆。

“喂，朗哥勁喎” 阿明向我舉起拇指
“係咯，有阿晴呢啲絕世好女友” 嫂子說
“我哋轉場卡啦OK，去唔去？” Thomas問
“唔喇，我送宜晴返屋企” 我說
“拜拜” 

步出party room，只剩下我和宜晴，氣氛再度回復尷尬。

“喂” 她率先開控
“做乜？” 我問
“頭先，唔好意思” 她說
“我先唔好意思，第2次抽你水” 我低下頭
“咩啊，你請我願，無啲咁嘅事” 她天真地說
“我有啲過意唔去啫”
“乜你咁㗎。咁好啦，懲罰你陪我飲飲食食，最少一世” 她看著我說
“吓” 我問
“行去攞車啦，吽吽哣哣咁” 她對著我說

就這樣，在街燈映照下，有一對朋友以上，戀人未滿的在走著。