呢個係用數值黎追女仔既世界: 6. 一切既開始

時間返返去一個鐘頭前.
即係針炙室內, 劉偉強訓緊教既時候.
我係張善添, 強哥訓緊教.
條友就訓得安落, 我要幫佢填返病人登記資料.
啱啱填完返入黎, 見到班長望住強哥唔知發咩呆.
"做乜睇住佢?"我問班長.
"無呀, 你話佢成日整親架?"
"係呀, 佢成日都夾硬黎, 勉強自已唔知做乜. 以前咁輕輕鬆鬆咪好囉, 上年唔知發咩神經, 突然開始要讀書, 又俾佢讀到喎."
"又好似係, 原本次都係美儀考全級第二名, 上年下學期突然佢考第三, 先知道有劉偉強呢個人. 知唔知佢咩事呀?"
嘿!班長原來咩都唔知. 




"唔知呀, 佢又無講. 好似話有個目標, 好想做到喎. 我都擔心咗佢年幾, 點知佢越黎越誇張, 日日咪書, 幾乎搶埋你個全級第一名."
強哥, 好奇心呢樣嘢, 我只可以幫到呢度喇.

---------------------------------------

看眼前係司令員, 門外面係天使長同Kristy姐.
司令員, 突然蠱蠱惑惑咁笑:
"我終於估到你做乜!"
咩事? 咁笑容黎?
"你想考7科唔係唔得, 但ICT要交SBA, 你hand唔handle到先?"司令員繼續講.




然後司令員係本"7日學會C語言"後面拎咗本"最後一分鐘歷史"出黎:
"我都諗住考7科, 一齊努力啦!"
咪住, 我整理吓先.
我地學校課程只係4+2, 而且成績差既人係升中五時會被逼drop一個x.
最差既人仲會drop埋第二個x, 即係只考核心科目.
相反, 成績最頂尖既人, 可以自修第三個x.
而且可以參加埋果本科既考試, 不過無人會自修要交SBA既科目.
司令員突然走上黎, 係以為我想報第三個x.
但佢本"7日學會C語言"係咩黎架? 教科書?
都唔知咩科. 




另外, 原來佢想考歷史科.

好, 既然係咁, 將錯就錯, 認咗先無壞:
"都有諗過吓. 你又知既?"
"正話係病房見到你寫既."佢揚一揚張寫住sky_moving果張紙仔:
"Google下個syntax就知."
唔係吓話? 原來呢句嘢, 係有得學? 你仲要係Google?
點解我咁白痴.
"你好勁喎, 但咩係syntax?"
"你連syntax係咩都唔知? 仲話報ICT?"
我無諗過要報ICT呢! 
"諗吓啫..."
"我教你啦!"司令員仲要除鞋走入屋, 似乎真係想教我.
ICT讀咩架?





結果司令員一打開本書, 我就記得返發生咩事.
一切由中二下學期開始.
亦係遇上司令員既同一日.

我開始由司令員身上, 學識使用我特殊既能力.