呢個係用數值黎追女仔既世界: 7. 學有初成

我係阮施玲.
今日第一次作為紅社啦啦隊既副隊長, 出賽陸運會啦啦隊比賽.
紅社啦啦隊一向都只係第二, 因為綠社有張善玲, 即係現任校花.
最少我入學後呢4年, 都係綠社攞啦啦隊冠軍.
而啦啦隊比賽佔全場總分四成, 而其他比賽各社成績差唔多, 所以呢幾年綠社唔係全場冠軍就係亞軍.
不過今年藍社B Grade, 係田項同徑項都突然勁咗.
因為劉偉強.
上年都唔覺佢咁勁, 今屆佢一個人攞咗100米, 200米, 110欄, 同跳遠四個冠軍, 加埋跳高亞軍.
連陳sir都話睇漏咗佢, 無揀佢入接力隊同學界比賽, 蝕哂.仲話睇下趕唔趕得切換人.
不過聽講我地學校田徑一向係D2都係魚腩, 可能都無乜分別吧.





我都要俾心機, 啦啦隊比賽唔可以輸太多分.

----------------------

我係張善玲.

今日呢兩個人又黎我屋企補習.
估唔到偉強個衰仔, 竟然為咗追女仔, 自修考多科歷史.
ICT我無能為力, 歷史我都幫到吓佢.




作為校花既我, 解題同答題能力係一流既, 趙sir話我而家去考DSE歷史科都5以上.
不過偉強好似唔太掌握到答題方向:
"要答論述題, 唔可以一味講優點, 要全個時期的優點缺點都講..."
"史料題唔可以只係講卷入面既資料, 要加埋自己資料才可以答齊..."

或者咁講, 理科生習慣睇卷答, 唔似文科係睇資料之前已經諗好會問咩同答咩.
一個數學同物理全級第一既人, 講歷史黎做乜?
不過施玲同佢同科, 學歷史又有紋有路.
總之兩個都係咁教, 你自己執生啦!





-----------------------

經過咗三個月既辛苦學習, 終於考完試.
天使長今朝考完生物就返咗去.
好正常, 要留低既就只有我同司令員.
全級得我地係考完生物再考ICT.
加上前日朝早考化學, 晏晝考歷史, 阻咗老師唔少時間.
Miss張都話我地揀自修都騎嗱過人, 學校從來無遇到有人咁讀法, 連老師開會時間都要就我地兩個而改期.

考完出課室時, 司令員係我前面兩步行, 伸個懶腰, 擰轉身問我:
"考哂試, 你估吓我地邊個考第一?"
"吓? 我覺得自己考得好差喎?"
"咪扮啦, 你係歷史同ICT差D, 但係自修係唔計入成績表."
"咁我中英文同通識都無你咁好嘛."
"咁等下星期對卷就知啦. 你等陣去邊呀?"




"無呀, 掛住考試, 都無諗, 淨係覺得好肚餓."
"咁去食雪糕啦!"
"唔好老M喇, 我識有間手作雪糕仲好食."
"咁去啦!"
 
好耐無去過觀塘廣場, 不過考完試就唔怕啦.
"Sandy姐, 考完試喇, 好掛住你."
"咁好口, 想食咩雪糕..."
老闆娘Sandy發現今日我唔係一個人黎:
"同學仔?"
"你好呀, Sandy姐, 你呢度有咩好食呀?"
"女朋友仔?"
"唔係呀, 我係班長."
"拒絕得咁快?"
"唔係呢, 啱啱考完試咋."





突然間, 警鐘響.
火燭? 
左邊有人大嗌:
"打劫呀!救命呀!捉賊呀!"
我一望去左邊, 就俾個人撞到正.
賊?
跑緊上去港鐵天橋條梯.
望定D:
dir
朱子誠
fget(Line, 44, 朱子誠);
printf("%s\n", Line);
最尾兩個係38,39.
速度咁慢, 學人做賊?




printf(sky_moving(3, 322, 9, 950));
狀態視窗出現"1".
1秒後, 我已經一個飛踢踩低佢.