《足印》-從幼稚園開始，對你的心意原來一直是愛情-: 07
老媽離開後，我也繼續查看不同新手行山路徑的資料。不得不說，我的內心開始逐漸對這個運動感到興趣，很想親身體驗一下行山的感覺、想親眼目睹沿路以及山頂的景色，總之就是希望可以好好感受一下大自然的氣息。
看過一些新手行山徑的資料之後，我又查看了一些有關行山的用具。根據這個網站所說，原來行山所需的用具也挺多的，例如有雨具、簡單急救用品、地圖、指南針、求救用的哨子、足夠乾糧和水等等，再將所有物品全部放進一個大背包。雖然我不知道是否每個行山客都會做足以上的準備，但要是真的話那就大大顛覆了我對行山的認知。…我以前一直以為帶瓶水就可以起行了。
「叮~」手機訊息的提示聲。
林芷柔：「三十秒後開門，本公主駕到~~ (´･ω･`)」12：19
這麼快就到了。
「咔嚓」我把大門打開，說：「歡迎柔柔公主~」
「哈哈，」阿柔把小食指輕碰我的鼻尖，「算你準時~」
「入嚟先講啦，傻妹。」說罷我便拿著阿柔的背包入內。
「唔該天仔~」阿柔從背包拿出一套後備衣服，「我去沖個涼先啊~」
「唔起屋企沖埋先過嚟？」我一邊為阿柔打開自動熱水器、一邊問。
「費事煩啦，一來一回~」阿柔用另一隻手輕戳著我臉頰，「係咪唔沖得啊！」
「得~」我正在回答的同時，卻傳出了另一個聲音：「咕~」
……肚子餓了。
「哈哈哈，天仔你仲未食嘢？」阿柔轉為輕捏著我的臉頰，「沖完涼出嚟煮畀你食啦傻佬~」
「咁我都幫手洗碗~」總不能每次都吃霸王餐吧。…雖然小時候吃了很多次。
「呵呵，係至好啊天仔你個懶鬼~」
阿柔洗澡的同時，我便繼續看看一些行山需知及必要時的急救小知識。對了，等阿柔出來問問她意見也好。
「天仔你睇緊咩啊~」洗完澡出來的阿柔把頭伸向我的手機前，瞧瞧我在看些甚麼，「嘩，行山需知？呵呵，你個懶鬼都有興趣架咩？」
「啱啱睇咗啲網上資料，有少少興趣~」我把電風筒遞給阿柔，「同埋聽阿柔你講，我都想試下作出轉變。」
「…」阿柔先是呆了一呆，接著便大笑起來，「哈哈哈哈~天仔你係咪又發燒啊？你個超級大懶鬼都會對呢啲戶外活動有興趣架咩~」
「又係你個衰妹叫我嘗試改變~」我輕輕彈了一下阿柔的額頭，「快啲吹頭。」
「哎呀呀…有啲難以置信呢~」阿柔說完便開始把頭髮吹乾。
頭髮乾透後，阿柔便準備走到廚房。
……要嘗試改變。
「阿柔啊，有冇邊日你得閒可以陪我去行次山？我想試下行一次。」
「咁呀…不如就聽日啊天仔？擇日不如撞日啊！」…這個回答是我意想不到的。
「吓，但係你今日先行完喎，唔會太辛苦？」我如實問道。
「呵呵，唔洗擔心我~」阿柔用小食指輕碰我的鼻尖，「天仔你快啲做埋啲功課先啦，未做晒點去行山！我去煮嘢畀你食啊~」
「仲有啲唔識做啊…」昨天晚上就因為這幾道難題，使我不能完成所有功課才去睡覺。
「天仔你試下先啦！」阿柔把圍裙套上，續說：「我出嚟再教你啦~」
隨著阿柔打開煤氣爐，我也開始繼續挑戰昨天未完成的難題。如果把我的數學比喻作天災級別，我其他科目也大概會是暴雨級別。看著眼前的一行行英文句子，甚麼被動語態、甚麼過去完成式…莫名其妙。
在我絞盡腦汁之際，耳邊傳來可以令我暫時放鬆腦筋的一句。
「食得喇天仔！啲功課移埋一邊先~」
「係嘅~咩嚟架？」雖然我完全不擔心阿柔的手藝。
「普通出前一丁，你最鍾意嘅綠色~」阿柔慢慢放下兩碗公仔麵，「仲有煎蛋一隻~」
「唔該阿柔大廚~」
「唔洗，慢慢食啦！」阿柔邊甜笑著邊問：「係呢，盧姨姨呢？」
「喔…佢同佢啲師奶朋友去咗打牌啊。」
「哈哈，姨姨佢仲係咁鍾意打牌~」阿柔用手肘輕輕撞了我一下，「天仔你啲功課進展又點啊？」
「仲差英文嗰份嘅少少啊…其他科琴晚臨瞓前做晒啦。」我一邊嘴嚼著口中的麵線、一邊伸著懶腰的說。
「哈哈哈哈！世界變啦世界變啦~」阿柔雙手捏住我的臉頰、打趣的笑說：「你個天仔竟然唔做deadline fighter！？仲以為你星期日先會做添~~」
「要嘗試改變自己呀嘛，」我苦笑一聲、用手指戳一戳阿柔的臉，「阿柔你教我嘅。」
「呵呵，天仔都會有成長嘅呢一日呢~」阿柔笑得甜甜的說。
吃完即食麵過後，我便如剛剛承諾的去了洗碗，而阿柔則說她會在這段短短的時候內替我檢查一下我的英文作業。期間，我不斷從廚房聽到阿柔的大笑聲。…傻妹瘋了？
「笑咩啊阿柔，」洗完碗過後，我走到阿柔背後輕力的對她後腦使出彈指神通，「笑得咁鬼大聲嘅你。」
「哈哈哈天仔，你啲答案…」阿柔依然笑不攏嘴，「你啲答案錯得好搞笑啊！哈哈哈哈哈~~」
…衰妹，原來是在笑我的答案。我很認真的寫上去的。
「冇陰公，」我躺在沙發，伸著懶腰的說：「我都有認真嘗試過架，衰妹仲笑得咁大聲…」
「哈哈哈，我知道啊~」阿柔又用她的招牌動作輕碰我的鼻尖，「我都同你講過作為旁觀者，有啲嘢係睇得清楚啲架~天仔你信唔信啊？」
「真係咁犀利？」
「天仔平時唔識做嘅題目肯定會留空佢唔做等我之後教~」阿柔向我戚一戚眼皮，「有冇講錯？」
…絲毫不差。「哈哈，咁醒嘅你。」
「識你幾耐啊傻佬~」阿柔捏捏我的大腿，「坐好啦！教你做喇，專心啲聽啊你！」