《足印》-從幼稚園開始，對你的心意原來一直是愛情-: 28
「係喎，」阿柔牽著我的手、一揮一揮的問：「你仲記唔記得你細細個嘅目標啊？」
「做咩咁問？」
「呵呵，我見你咁努力改變緊，」阿柔甜笑著說：「睇下你會唔會嘗試埋你之前放棄過嘅目標呀嘛！記唔記得啫？」
「記得，我話過會學結他，自彈自唱一首五月天嘅歌畀你聽呀嘛。」我笑說。
「哈哈哈，估唔到你又真係記得喎~」阿柔舉起大拇指的說。
「有啲印象啦，雖然最後因為成績唔好而放棄咗，不過我嗰陣時都有認真學過架。」這樣想起來，當時老媽買給我作生日禮物的木結他仍一直放在我床下的儲物箱呢。
「DSE完咗再試下囉~」阿柔打趣的故意打量一下我全身，「我覺得呢，而家嘅天仔唔會咁容易放棄嘅~」
「傻妹，中五大考先就快到，咁快講DSE？」我笑著的戳戳阿柔臉頰。
「哎呀呀，話唔係咁講架，雖然DSE睇落仲有一年，但係其實得返半年多啲架咋！」阿柔也戳住我的臉說：「你都要擺多啲心機起學習上面啊…！」
「我知道~」我一邊以手做出OK手勢、一邊問道：「咁不如你幫我補習啊？放學同埋星期六、日都一齊溫書，可唔可以？」
「呵呵，當然可以啦~不過你要應承我唔可以中途氣餒架喎~」阿柔交叉著腰，笑說：「畀你見識下地獄式嘅訓練！」
「哈哈，放馬過嚟啦~」我輕輕彈了阿柔額頭一下，「可能我努力一啲，下年會同你一樣喺A班上堂添啊~」
「哎呀呀，咁大口氣！？」阿柔說著便作勢對我打出一拳又一拳。
「哈，咁你細細個訂嘅目標你又記唔記得？」我一邊擋著她的攻擊、一邊問道。
「記得~我嗰時話想試下打棒球呀嘛~」阿柔笑說：「因為一個好白痴嘅理由~」
「哈，我都記得嗰陣時嘅你好鍾意睇超棒球。」我戳住阿柔臉頰笑說。
「哈哈，我仲有兩個鎖匙扣喺屋企架，一個球棒鎖匙扣、一個棒球鎖匙扣！」阿柔甜笑著的說：「我每次出國旅行都會帶住架，就好似個護身符咁~」
對了，我說的超棒球是指《多啦A夢超棒球外傳》，是多啦A夢作者的弟子所編繪的一本日本棒球漫畫。
由於不久前才剛剛日出，一路上也沒有太多人的關係，我們可以一邊慢慢觀賞著沿路的景色、一邊享受著寧靜的環境。很多人都喜歡早起行山，我想這大概是因為早上人流較少，可以更輕鬆、更舒適的享受著大自然。
我們沿著行山徑，走著走著便走到了一片空地，起初我們都還在奇怪為何在這個小島上會突然有一片小空地，後來才發現原來這裏是一個舊時戰爭所用到的炮台的一個遺址。
「哎呀呀…有啲高…」阿柔雖然想爬上去，但就是力不從心的，怎樣努力也爬不上去。
哈哈，看著她這樣動來動去也挺有趣的。
「我抱你上去啦，」我先把阿柔抱住，再慢慢抬高雙手，好讓她更容易的爬上去，「上唔上到啊…？」
「上到！」阿柔先是在炮台上坐穩，接著便向前方舉起右手，笑說：「哈哈哈，我就係阿柔海盜！」
「傻妹，」我一邊笑著、一邊拿出手機的說：「望呢邊喇海盜，笑~」
待我也爬了上去和阿柔自拍一張後，我們便繼續起行。
相比起上一次在屯門徑行山，這次的環島則較為簡單，沒有梯級上上落落之餘，路也比較寬敞，即使是沒有太多運動底子的我也不會感到很辛苦。
不消一會兒，我和阿柔便抵達了一個小涼亭。雖說這次的山路不及上次來的難走，但始終我們都一起走了一段時間，所以便進了裏面稍作休息。
「畀你。」我把阿柔的水瓶遞向她，同時拿出自己的水瓶。
「哈哈，唔該天仔~」阿柔笑說：「乾杯！」
看著眼前笑著的阿柔，又使我想到心中未解的難題。
每逢看見你的笑容，我總會會心的微笑起來。
但是，原因又是甚麼呢…？
我一直都以為，只是因為看到妹妹的笑容後而不自覺的微笑。
然而，原因真的是這個嗎…？
會不會其實…我很喜歡你？
「係呢…」我想著想著，不自覺的問出一句：「你覺得阿峰佢份人點啊…？」
「佢啊？幾有禮貌，又幾有上進心咁囉…」阿柔托著下腮的思考著。
「喔…咁佢有冇話覺得你點啊…？」
「佢話我份人好多嘢講，又話我好樂天囉…」
「嘩，好似好好評價咁喎。」
「天仔你都覺得我好健談好樂天…？」
健談與樂天，相信是很多剛認識阿柔的人對她的感覺。
即使是對著剛認識的人，阿柔也總是在臉上掛著笑容的回答，總是在別人面前表現得樂觀豁達、安於處境。
可能正因如此，所以很多人都會有這個錯覺吧。
我搖頭。
「哈哈，咁你覺得我性格係點…？」阿柔笑說。
「你啊…私底下其實唔鍾意講太多嘢，唔鍾意同啱啱識嘅人扮到好好朋友咁分享心事；同時都好易會為咗改變現狀而擔心、有所憂慮。」我笑說：「有冇講錯？」
「呵呵，始終都係你最了解我…」阿柔躺下在我的大腿上稍作休息，說：「由細到大，我只係覺得應該要禮貌待人先成日笑，但就係唔知點解好多人都會咁樣睇我…」
「哈，好多人都誤會咗。」
「呵呵，明明樂天係你嘅專利嚟架嘛~」我知道，阿柔說的是我的名字。