《足印》-從幼稚園開始，對你的心意原來一直是愛情-: 27
「嘩哈哈，多啲人一齊睇日出，熱鬧一啲！」阿柔把頭伏在我的肩說。
「真係唔少人喎…」想不到也有不少人故意早起觀賞日出。
「哈哈，快啲行去沙灘嗰度坐低啦~男‧朋‧友！」阿柔雙手捏住我的臉頰的說。
我馬上意識到阿柔又在玩著裝情侶的遊戲，便笑著的配合：
「係嘅係嘅~女朋友~」
當阿柔的男朋友。
如果不是這個遊戲，我又有過這個想法嗎？
有過…嗎？
我輕輕的放下背著的阿柔，隨即自己也坐在沙灘上。阿柔則是伏在我肩上，一起等待著日出的一刻。
「係呢，大約要等幾耐先日出架？」我問。
「天文台預測係五點四十分，不過你要自己預返一、兩分鐘嘅誤差~」阿柔微笑的答。
我看了看手機，顯示著05：36。
「咦，咁應該差唔多時間喇喎。」
「係啊~我之前都係同詩詩彤彤睇過一次日出咋，」阿柔一邊甜笑、一邊輕碰著我的鼻尖說：「第二次就係同你睇喇傻佬~」
「哈，咁我可以陪你睇人生嘅第二次日出，我咪好特別？」我笑說。
「天仔緊係特別啦~」阿柔向我戚一戚眉，「仲係獨一無二架喎~」
「衰妹，抄我對白！？」我邊笑說著、邊搔癢一下阿柔，逗得她哈哈大笑。
「哈哈…好痕啊…！哈哈哈哈…！」看著阿柔笑得燦爛，我都不自覺的微笑起來。
我們胡鬧了不一會兒後，東方的太陽總算冉冉升起。
金黃色的日光慢慢從水平線上探出頭來，照耀著世間萬物，彷彿一瞬間就能為地上的一花一草、一樹一木帶來生機。
「嘩…升出嚟喇…！睇唔睇到啊…？」阿柔雙眼發著光一樣的說。
「睇到…真係好靚…」我也跟阿柔一樣，全神貫注的凝視著初出的晨曦。
「天仔，我哋一齊影張自拍咯…！？」阿柔一邊拿出手機、一邊繞著我的手，「我哋第一次一齊睇日出啊…！」
「好啊，畀部電話我啊~」我接過阿柔的手機，舉起手作出自拍的姿勢，「笑~」
「咔嚓」
「哎呀呀，我唔記得咗會背光添…」阿柔伸出舌頭的說。
「傻妹，」我拍拍阿柔的頭，續說：「OK啊，都係背少少光，至少張相都尚算睇得清楚呀嘛。」
「嘩哈哈，呢張相我要好好保管先得啊~」阿柔一邊做出她的招牌動作、一邊笑說：「因為你個傻佬咁懶，都唔知仲會唔會有機會同我去睇日出呢~」
「你想嘅話，遲啲有機會我再同你睇日出囉。」我淺笑。
阿柔顯然是想不到我的這個答案，臉頰變得紅紅的。不過她很快便重拾一貫甜甜的笑容，同時向我伸出尾指，說：「嗯！你話架，勾手指尾！」
「勾手指尾，應承你。」我把尾指勾上，阿柔的笑容也笑得更甜了。
一同看過日出後，我便牽著阿柔一同慢慢走回營地，打算在環島遊之前先吃點東西，順便帶上一些待會行山需要的旁身乾糧和水，還有阿柔的登山杖。
回到營地，我和阿柔都自覺的降低了談話的音量，以免弄醒還在熟睡的四人。簡單吃了個即食麵後，我們亦隨即準備出發，卻看到阿彤揉著眼睛的從營中走了出來。
「哎呀呀…彤彤，係咪我哋吵醒咗你啊…？」阿柔不好意思的說。
「呵…」阿彤打著呵欠的說：「唔係啊…我只係咁啱醒咗又聞到啲香味，咪諗住出嚟睇下咩嚟囉，原來係你兩個喺度拍緊拖煮公仔麵食…」
「喂吔，又亂講啦你！」阿柔說著便跳了上阿彤身上，就像一隻樹熊一樣。
「係喎，你哋咁早起身做咩啊…？」阿彤依然睡眼惺忪的揉著眼睛。
「啱啱同天仔睇完日出！」「而家準備挑戰下環島行一圈。」阿柔和我一唱一和的說。
「喔…唔怪得你哋兩個琴晚咁早瞓啦…」阿彤邊向我單一單眼邊笑說：「呢度條山路唔難行，不過都萬事小心啦~天仔，好好睇實柔柔啊。」
「放心，我會睇實佢。」我摸著阿柔的頭回答。
「喂吔…彤彤又當人哋係細路女…！」阿柔鼓起臉頰的說。
「唔係當你細路女，係叫你小心~」阿彤又打了個呵欠，慢慢走回帳篷，「我瞓多陣先喇，柔柔同天仔小心啲啊~晏啲見。」
「好。」「晏啲見！」說罷，我也背著背包和阿柔出發。
為甚麼只有我一個人背著背包？這是因為阿柔說阿彤曾經告訴她，圍繞整個東龍島一圈的山徑多為平路，與上一次到屯門徑行山不同，因此不需要帶備太多的物資。
我和阿柔走了一會兒後，便走到了環島徑的開端。起點那裏豎立著一塊小木牌，簡單印著「此處開始環島一圈，約需三小時。」我們一起自拍一張過後便開始起行。
「係喎！」阿柔用肩膀輕撞我一下，「你呢牌做咩咁大轉變嘅…？」
「呵，唔變得？」我學阿柔的招牌動作，輕碰她的鼻尖。
「哎呀呀，緊係得啦~」阿柔甜笑著的說：「只係…自從大個咗之後，天仔你成日都係咁懶，所以見到你慢慢開始改變，嚇我一跳呢~」
「哈哈，充實下人生都幾好啊。」我笑說。
「你係至好講~」阿柔捏住我的臉頰說：「唔好淨係得把口~」
「係喇，行咯。」我向阿柔伸出手。
「嗯！」會意的阿柔也伸手牽著我。
跟阿彤說的一樣，沿路一直走著的大多都為平地，所以也不會太辛苦，反而十分輕鬆。一邊慢慢走著、一邊感受著小島的微風，也是個挺新鮮的體驗。