［真人真事改篇］《有一種鍾意，係我鍾意你鍾意我。》/《初戀1000天》: 第三章下 「如有點情迷意亂 讓我許個願 轉注地眷戀 而恒心亦不耗損」 〈終身學習〉

https://www.youtube.com/watch?v=fnMj-38nMbI
第三章下下午三時多，下課鐘聲剛響，Jessie正忙着做剛才老師派的數學功課，這樣回家就不用做功課，也不擔心自己會忘了。

這時，Joey、Tina、Andy、Chloe都背着書包走了過來。

「喂，行得未呀？成村人等你呀。」Andy對還在執拾書包的Jonathan說道。

「我等緊Jessie做埋題數咋。」Jonathan說。



「Jessie唔係唔去咩？」

「我都想唔去。」Jessie抬起頭，臉上掛起一個難看得可以的假笑，然後低着頭，繼續埋頭苦幹，藍色的墨水在白紙上龍飛鳳舞。

「唔想去你又去？聽日旅行日你去咩？」

「我緊係⋯⋯」Jessie以堅定的目光看着Andy，可語調很快就變得氣餒，無生氣地說：「去啦。」

「哇，世界變，你竟然話去，你對上嗰次去係幾時？兩年前？定三年？」Andy驚訝得雙手拍在Jessie的桌子上，完美地掩蓋了功課上的問題，使Jessie無法做下去，只得無奈地盯着神情誇張的Andy，說：「你依家係咪好唔想我去呀？」



Jonathan的嘴角微微上揚，卻不知Jessie令Jessie改變主意的會是James。雖然二人曾在一起過，但Jonathan知道這對Jessie而言，不過是一段她努力想抹去的Puppy Love，他還怎可能影響到她？

「你去就啱啦，你整野食咁叻，一於整啲甜品去食。」Andy說。

平日Jessie最愛做甜品，蛋糕、心太軟、泡芙、布丁、班戟⋯⋯無一不曉，而每次Jessie也會把製成品的相片放上Facebook。

「係喎，不如整泡芙呀？我係你Facebook見到好吸引！」Joey高興地說。

「但我屋企無焗爐喎，有無簡單啲架？」Chloe問道。



「一係整木槺布甸囉。唉，整咩都好啦，你快啲比我做埋題數先啦！」Jessie撥開Andy的手，繼續她未完成的運算。

「啱啦，咁你負責整木槺布甸，Jonathan負責整菠蘿腸同壽司卷，Joey、Tina你地就負責整燒賣，Chloe你就整魚蛋啦。嗯，就咁話！」Andy發號施令道。

「咁你呢？」Tina不滿地問道。

「我負責做監工囉，仲負責最後試食，幾偉大？」看到這樣大言不慚的Andy，Tina和Joey都禁不住反了個大不眼。

過了幾分鐘，看着還在做數的Jessie，Andy終於按捺不住，把她的文具都塞進筆袋，又把功課都塞到抽屜，完全沒有理會因為被人打斷，而氣鼓鼓的Jessie，說：「做做做，聽日返黎先做又唔會死嘅，行啦。」

「聽朝邊⋯⋯」未待Jessie說完，Andy已拿起她的書包，半強逼地拉着她離開了課室。


「好，終於買好料！你地快啲開工啦，唔係無時間架啦。」剛到Chloe家，Andy還未脫下鞋子，便已開始發施號令。



Chloe的家並不大，但間隔卻很實用，正方形的客廳放了一個電視櫃和沙發，而飯枱則是能摺疊的那種，所以剛脫下鞋子，Chloe便忙着把飯桌拉出來，以便大家工作。

「擺係到啦，你地去洗手先啦。」Chloe一邊忙着遞拖鞋給他們，一邊忙着把Jonathan他們手上的那堆沉甸甸的膠袋都放到長方形的飯桌上。整理好後，Chloe馬上跑去打開冷氣和電視，又從雪櫃拿出冰凍的飲料來給大家消暑，沒有停過下來，還補充道：「雪櫃仲有雪糕，你地鍾意就自己去拎啦。」

這大概就是Andy喜歡來Chloe家玩的原因，因為貼心的她總會把一齊準備好。

「有無雪米糍？」Andy問道。

「有呀。」

「係咪抹茶味？可唔可以拎比我？」

「你黎過咁多次，明明知係邊，自己去拎啦。」Chloe雖然嫌棄，但身體卻自動走了到雪櫃旁，把Andy最愛的抹茶雪糕遞到他手上。



「都係你屋企最好，次次都有我最鍾意嘅抹茶雪米糍，你要唔要試下？」Andy把包裝撕開，用裏面附贈的膠叉把其中一糰遞到Chloe眼前。

Chloe嫌棄地別過頭——Andy又忘記了，Chloe其實不喜歡抹茶味的東西。

「我又要，有無雲尼拿味？」剛洗好手的Jessie從洗手間走出來問道。

「無喎。」Chloe說。

「乜你咁偏心架，次次都有Andy鍾意嘅抹茶味，但就無我鍾意嘅雲尼拿味。」Jessie不爽地看着Andy。

「Chloe屋企無人食雲尼拿味咪無囉，有得你食仲嫌三嫌四。」Andy把冰涼的雪米糍放到嘴裏。

「Chloe屋企無人食抹茶味架，明顯係特登買比你啦。」

「係咩？抹茶咁好味都唔食？咁奇怪。⋯⋯Chloe下次繼續買返依隻牌子呀，好味過上次嗰隻喎。」說着說着，Andy很自然地就把頭靠在了Chloe的肩膀上。



特登買比你仲話我奇怪？Chloe心想，便故意聳聳肩，使Andy的頭從自己肩膀上滑下來，說：「咪搏我懵呀你。」

「鬼得閒搏你懵，係都搏Jonathan啦。」Andy壓低聲亮說，唯恐其他人聽到。

「邊個嗌我？」這時，Jonathan也從洗手間走了出來。

「我話呀，Jonathan幾時先洗完手可以開始整野食？」Andy不慌不忙地說。

「開始啦，不過你個廚房咁細，都容納唔到我地咁多個人⋯⋯」Jonathan想了想，續說：「其實要燒賣魚蛋腸嗰啲dum落水就熟架啦，算啦，不如我整埋佢啦，唔好煩。」

「唔洗我做緊係好架，Chloe你個搖控係邊？我想睇《無頭東宮》。」Tina說。

「好喎，木槺布甸其實都好易整你將啲餅碎同忌廉溝埋就係，我係到等你好消息。」Jessie說。



當Jessie準備攤坐在沙發上看《無頭東宮》時，Jonathan卻故意走到她面前，用身軀阻擋她的視線，說：「唔得，你個布甸咁麻煩，你自己整。」
「啊，唔好啦，好攰呀⋯⋯」Jessie抱怨道。

「唔得呀，快啲行呀。」Jonathan說。

Jessie只好不情願地離開涼爽的客廳，來到蒸爐似的廚房。

Jonathan把材料從膠袋拿出來，再拿出剪刀，剪開食物的包裝，然後把水注注進鑊裏，再放到爐頭上，開火並蓋上。

在待水滾的同時，他拿起開罐器，放到菠蘿罐頭上，熟練地開起來。

「哇，你平時真係有煮開野食架喎，有板有眼咁。」Jessie一邊把餅乾放到密實袋，一邊看着Jonathan。

「似得你呀，成日都唔返學。」

「兩樣野有咩關係？況且我都無成日唔返學！我只係偶爾一、兩日無返咋嘛。你話啦，旅行日又熱又曬，有咩好玩？又學唔到野，留係屋企訓多陣好過啦。」一眨眼的功夫，Jessie已用玻璃瓶把餅乾壓成碎。

「咁你當初就唔應該話我知你醫生紙係假架啦。」Jonathan一臉得戚地看着Jessie。

Jessie先是疑惑地看着他，過了幾秒，她才明白Jonathan說話裏的意思，便忍不住笑了起來。

「笑咩呀你？」

「你唔係以為我真係驚你篤我背脊呀嘛？我去唔係因為你囉，同學，不要想太多。」Jessie笑着說。

「咁唔係因為咩？」Jonathan不解地問道。

「仲好意思問？你做咩爆我啲野比James知？」Jessie問道。

「吓？James？」Jonathan一臉黑人問號地看着Jessie。

「唔好扮無知啦你，佢知道我張醫生紙係假嘅，仲威脅我一定要去旅行日！我明明剩係同你講咗，唔係你仲有邊個？」Jessie瞪着Jonathan說。

「你地仲有傾計架咩？」Jonathan驚訝地問道，不自覺地停下了手上的動作。

然而，Jonathan的重點卻完全不同。

「佢不嬲都成日主動Msn我，我都好少覆，係最近⋯⋯」Jessie說到一半便停了下來。

「最近做咩？」

「最近唔知點解，成日練完波都撞到佢，咁咪傾咗幾句。」Jessie把餅乾從密實袋倒進一個大碗裏，再把忌廉的包裝剪開，倒進另一個碗裏。
「你地有咩好傾？」

「無架，咪傾下啲無聊野。」Jessie開始用電動攪拌器打發忌廉，沒有發現Jonathan的動作還凝在幾分鐘的位置。

「姐係咩？例如呢？」Jonathan追問道。

「咪講下打波攰唔攰呀，我又問下佢Re-quiz攰唔攰呀，叫我要去旅行日咁囉。」Jessie自動把一切Jonathan想知道的過濾掉。

「仲有呢？」

這時，水沸了，爭先恐後地從鑊裏噴出來。

「水都就滾瀉啦，你唔好咁八卦啦！」Jessie着急地掀開鑊蓋，卻沒留意鑊蓋的溫度該有多高，指頭馬上便被燙到了，喊道：「哇，好熱呀！」
Jessie連忙把鑊蓋放到桌上，眉頭依然緊皺着。

「你無事呀嘛？」Jonathan放下手上的開罐器，走近Jessie旁邊，抓着她的手，仔細看了看，說：「快啲用水沖下，降下溫先。」

Jonathan把Jessie的手拉到洗手盤，用水沖洗她的手。

「你做咩呀？」Jessie看着突然拿着手機走進來的Joey問道。

「影低你地咁Sweet嘅一幕囉。」說罷，Joey又拍了一張照片。

「你講咩呀？我漉親隻手咋。」Jessie沒好氣地看着Joey，手指不自覺地從Jonathan的手抽走。

「咁你當我影低同學間有愛嘅一面囉，反正去完旅行日Miss Yip都會叫我地交相。」Joey說。

「拿，你試下交依張，我一陣就係你嗰杯布丁到落毒。」Jessie威脅道。

「講笑咋，我諗住入黎睇下你地整成點，有無野要幫手咋。」

「啱啦，你幫手倒啲餅碎入啲膠杯到啦，我啲忌廉都就快打好。」Jessie走到裝滿忌廉的碗前，拿起打蛋器準備繼續打發之際，Jonathan卻把打蛋器從她手裏移走，說：「你隻手啱啱先整親，咁唔小心，仲愈幫愈忙，唉，唔洗你整啦，你出去睇電視啦。」

「咩呀，明明係你無睇火⋯⋯」

「係囉，你都整得七七八八，剩低倒埋一齊姐，應該好易整嘅，我整埋佢啦，你出去抖下啦。」Joey說。

「唔洗我做緊係好架，咁就交比你地啦。」說罷，Jessie便離開了。

廚房剩下Joey和Jonathan二人。當Joey準備把餅碎倒進膠杯時，卻被Jonathan阻止了，說：「要放忌廉先架。」

「係咩？我未整過唔知添，」Joey馬上放下餅碎，聽Jonathan的說話，拿起勺子把忌廉放進杯裏，續說：「同你地一組真係好，你地連甜品都識整。」

「平時無聊咪同細妹一齊整下囉。」

「哇，你有細妹架？做你細妹真係好。」面對Joey的讚賞，Jonathan只一笑置之。

「其實⋯⋯我有條問題想問好耐。」Joey猶豫地說。

「咩？」Jonathan正忙着把鑊裏的燒賣、魚蛋、腸仔撈出來。

「其實你同Jessie咩關係？」Joey鼓起勇氣問道。

聽到這句話，Jonathan手上的動作再次停了下來。

「做咩咁問？」Jonathan回過神，把手上的食物倒進一個大碗裏。

「見你地頭先咁Close，真係好似情侶，忍唔住問下姐。」

「你唔似咁八喎。」

Joey和Tina在班裏就像隱世避俗的高人，從不過問世事，Jonathan不太相信Joey竟會對他和Jessie的事有興趣。

「好啦，其實我都係幫人問。」被識破的Joey只好和盤托出。

「邊個？」

Joey默默把餅乾碎和忌廉一層一層地鋪在膠杯裏，沒有回答Jonathan的問題。

「唔係James吓嘛？」Jonathan猜想道。

「你點知架？」Joey驚訝地看着Jonathan。

「我隨口估架咋。」Jonathan 把罐頭菠蘿的糖水隔去，然後倒進一個大碗裏，再用牙術把腸仔和菠蘿串起來。

「所以你知James仲鍾意Jessie？」

「唔知架，不過佢成日擰轉面望Jessie，都估到啲嘅。」

「咁⋯⋯所以⋯⋯你地倒底咩關係？我要返去交功課架。」

「無呀，咪普通朋友囉，唔係你覺得我地咩關係？唔通捉住佢手沖下水就等於一齊咗咩。」Jonathan微笑道。

從Jonathan的語氣，讓Joey感覺自己好像問了一條很白癡的問題。

「但你地平時都好Close喎。拿，依句就唔係我講嘅，係有好多人咁講，我複述返一次姐。」

「睇唔出你都幾八卦，仲以為你同Tina同其他女仔唔同添。」

「唔係我八返黎架，係James自己講架。」Joey連忙澄清道。

「我講笑姐，但真係無關係呀嘛。可能咁啱佢坐我隔離，你地先咁覺得姐。」

「你⋯⋯真係無鍾意過Jessie？一秒都無咩？」Joey追問道。

我有無鍾意過Jessie？Jonathan在心底裏反覆問自己。可是，他尋遍了整個心房，還是找不到答案，因為他根本不知道喜歡一個人是怎樣的感覺。
即使Jessie總嫌他煩，常常一大清早就說個不停，可他還是喜歡把所遇到的一切有趣的新鮮事與她分享。她說她喜歡海綿寶寶，於是他回家把一百集的海綿寶寶都看了一遍，好融入她那幼稚的世界。她喜歡考第一的滋味，於是Jessie都要考的科目，他都會溫得滾瓜爛熟，好和她角逐第一名的寶座，卻同時會擔心她會不會忘了溫習，然後忍不住提醒她是時候複習了⋯⋯

細思了一遍，Jonathan還是覺得他們不過是志趣相投的好朋友。

「無、呀。快啲整埋啲木槺布甸啦，我趕住返屋企食飯呀。」不知不覺間，原來Jonathan已把菠蘿腸弄得七七八八，魚蛋和燒賣也都放進了盒子，續說：「我拎啲魚蛋、燒賣出去先。」

當Jonathan正準備把一個個食物盒搬出去、撥開簾布的時候，卻撞上正站在簾布前的Jessie。

「你做咩企係到呀？」差點打翻食物盒的Jonathan抱怨道。

「點解你唔答我地有野姐？」

「吓，無野做咩要扮有野？」Jonathan想了想，驚訝地看着Jessie說：「定係⋯⋯你想同我有野？拿，Jessie，雖然你⋯⋯」Jonathan端詳了Jessie一番，續說：「都唔差嘅，但係我⋯⋯」

「我只係想James唔好再繼續搵我，不要想太多。」Jessie對於Jonathan的自作多情反了個白眼。

「其實點解James仲會鍾意你，你明明成日都西住塊面。」

「我點知姐？知就唔洗煩啦。」Jessie說，「唉，算啦，同你依個戀愛白癡講都係廢話，等你依舊木識鍾意人再同我講啦吓。」

晚上九時多，Joey拖着疲憊的身軀回到家，洗好澡後已十時多了，才緩緩打開電腦裏的MSN。

屏幕馬上彈出一則信息，是James傳來的一句「嗨」。

「嗨。」

「今日做咩咁晏？」

不知道從甚麼時候開始，James不時都會找Joey聊天，而且次數日漸頻繁，由起初只是有一搭沒一搭地聊着，到後來，幾乎只要Joey上線，James又剛巧沒有打機，都會和她打聲招呼。

「整聽日旅行日啲野呀嘛，你唔洗整咩？」

「我地食薯片同啲零食咋，啱啦，你地整咗，聽日就可以黎Jam你地啲野食。」接着，James又打了一句：「係呢，Jessie今日有無去到？」

「又真係比你講中咗，佢真係去咗，你係用咗咩法寶呢吳生？」Joey還未意識到是自己漏了口風給James，才逼得Jessie不得不去。

「用我嘅美色。」可是，James並不打算說出來。

「嘔死。」

「依兩日Jessie都無點覆我。」James終於把重點說了出來。

「緊係啦，人地有Jonathan啦嘛。」Joey想起今天在廚房，Jonathan拉着Jessie的手去沖水的畫面。

「係喎，之前叫咗你幫我留意下佢地，佢地真係一齊緊？」

「你覺得呢？」

「唔知呀，⋯⋯呃，⋯⋯係掛？」

「如果係你會點？係咪即刻放棄？」Joey竟沒立刻把事實說出來。

這次James沒有馬上回覆，而是過了幾分鐘才回覆：「我都想我可以放棄。但每次就放棄嘅時候，都忍唔住比佢吸引咗。」

「其實佢有咩咁吸引你？」

看到這問題，James腦海第一秒浮現的，便是Jessie那不溫不熱、不帶一點感情的臉，即是西臉。

「可能⋯⋯鍾意佢夠西掛，同你一樣囉，唔笑嗰陣好似個世界得罪咗你咁。」

「唔好攞我黎同Jessie比，我同佢唔同OK？正如你鍾意佢嘅西面，但你唔會鍾意我。」

「你唔比我鍾意你嘅？」

James這句話嚇到了Joey，使Joey過了近十分鐘都沒有回覆，James才察覺自己的口不擇言，改口道：「講笑咋。就算Jessie鍾唔鍾意我，我諗我都會繼續鍾意佢。」

「點解你仲要堅持？」

「我無特別堅持架，只係我都無辦法控制自己。而且⋯⋯可能有一日我真係打動到佢，佢會回心轉意呢？今次佢都為咗我去旅行日啦，仲肯食我買比佢嘅雞蛋仔⋯⋯」James一五一十地把那天的事告訴Joey。

「都話我條橋Work架啦。」Joey得戚地回覆。

「係呀係呀，Joey姐最勁啦。」

「洗乜講，你打算點報答我？」

「最多我免費教你打機啦，其他人我收錢架。」

「我都唔打機嘅。」

「你試下啦，好好玩架。」

「咩Game呀？」從來不打機的Joey對此半信半疑。

James傳送了一條連結給Joey。

「拿，你打開依條Link，Down咗隻Game先，槍Game黎嘅，要組隊玩，不過無得邊玩邊用Msn，⋯⋯不如一陣我打比你？⋯⋯」

就這樣，Joey聽了James的話，下載了人生第一款槍Game，還展開了和James傾電話的第一次。