(短故）《二月十四號嗰日，我收到一份情人節禮物》: 7.

見醫生的前一個晚上，阿宇跟我說：「我好似發燒。」

「係呀？咁一係聽日你唔好陪我啦，你休息下。」我不想麻煩別人，這是我難以改掉的性格。

「我聽日會無事㗎啦。」

「係咪㗎？如果你聽日仲係好唔舒服，真係唔使勉強喎。」

「唔得，一定要陪。」



「我怕辛苦你啫...」

「定係你唔想我陪？」

「唔係啦。咁如果你真係頂唔順就話我知啦。」

「得㗎啦。」

他一直很堅持要陪我，最後他戴著口罩出現了。



我發現街上好像特別多情侶，而且不少人手上都捧著鮮花之類的東西。

我看一看日期，原來今天是情人節。

回想這二十多年來每個情人節，有時候有男朋友，有時候沒有。

沒有想到有一天會以這樣的心情過這個日子。

「今日情人節喎原來。」我跟戴著口罩的阿宇說。



「係囉，今日原來係情人節。」他抬頭望望街上的情況：「周圍都係情侶，哈。」

我沒有再說什麼，和他走進了一棟商業大廈。

診所內有很多人，大部份都是和我年紀相若的少女。

有些少女身邊也有一個男人陪著，有些則沒有。

「沈卓怡！」登記後幾分鐘，診所姑娘遞了一個小盒子給我：「你去放小便呀，一陣幫你驗多次。」

我點點頭，然後去洗手間把尿液排進小盒子中。

「我入去啦。」護士又再一次喊我的名字，因為只能自己進入護士房和醫生房：「你係到等我啦。」

他點點頭，然後再捉著了我的手：「無事嘅，唔好擔心。」



我也微笑著點頭，然後轉身進了護士房。

「沈卓怡係咪呀？」護士看了看手上的資料後，指著我手上的尿液說：「坐啦。你畀我呀，我幫你驗孕先。」

然後她抽出一枝驗孕棒，直接把它插進尿液中，再將它平放。

就像我前幾天一樣。

「咁我同你講解下啲流程先喇。如果你真係有bb，你係咪打算做人工流產手術嘅？」她開朗的聲線與對話內容非常格格不入，我聽起來很不舒服。

「係。」我果斷地說。

「好啦，咁其實我地就有提供兩種選擇嘅，包括藥物流產同人工手術流產嘅。」之後她拿了兩份單張出來，詳細向我解釋兩種方法的流程和風險。



「好啦，你有無唔清楚嘅地方？」她講解完畢後問我。

「無啦。」

「好，咁我睇下個結果先。」她抽起那枝驗孕棒：「咁而家確定咗沈小姐你真係懷孕嘅。」

雖然一早已經知道結果，但聽到診所護士的肯定後，依然像一枝棒棍倒頭就敲下來般。

「我幫你量埋血壓，一陣你出去等入醫生房，佢會幫你做個基本嘅檢查嘅。」

「好。」

我拿著兩份單張出走護士房，阿宇馬上站起來問我：「點呀？」

「真係有。」我深了一下呼吸：「一陣入醫生房做檢查。」



他好像已經預料到這個結果：「咁一陣睇下醫生點講，唔好驚，我係到。」

「唯有係咁喇。」

家計會內的環境跟一般診所無異，唯獨是有一部電視，不斷重播著宣傳性和愛的觀念、話題之類的影片。

其中一段令我很深刻的是講有關愛的訪問片段。

「我覺得愛係，你願意為對方無條件付出之餘，都唔會埋怨同後悔你做過嘅一切，甚至係自己受傷都覺得心甘情願。」

和阿宇一起聽著這些話，其實內心或多或少都有一份尷尬。因為我們不是情侶，但又處於這個情境下。

「沈卓怡！」再次聽到自己的名字，終於要見醫生了。



「喂。」阿宇在我進房前又說：「我係到等你，好快無事。」

「好，你等我。」