(短故）《二月十四號嗰日，我收到一份情人節禮物》: 11.

由事情發生後，我和他除了在咖啡室上班時會見面之外，他幾乎每天都陪著我。

有時候是吃一頓飯，有時候是一整天的陪伴。
他連酒也沒有再喝，因為他把所有時間都奉獻了給我。

即使我們沒有見面，他也很著緊我的一切。

「你返工小心啲，啲粗重嘢叫老闆娘做，你唔好做啦。」他總是這樣叮囑著我。

「得喇，你都知無咩粗重嘢做㗎。」



「總之你攰就休息下，唔好操勞咁多啦。」

「你係關心我身體，定係個bb？」我忍不住問他。

「你。」

所以我的世界也就只剩下他一個。

「今日你想去邊？」阿宇放學後到我的宿舍接我，這已經成為我們的日常。



「周圍行下啦，我唔想再成日瞓係到。」懷孕以後我經常卧在床上，一睡就是十多小時，很久都沒有外出走走。

「咁我地去沙田個邊行下啦，有個城門河，個環境都幾舒服。」

我們坐上巴士到沙田。這個地方對我來說很陌生，因為我家住在九龍的關係，很少機會來到這一區，因此我完全不熟路。

「你住沙田㗎咩？」我們下車後向著斜路走下，旁邊就是城門河。

「我姨媽就係住沙田。」他始終都認為這是「姨媽的家」，不是他的家。



「哦...」我望向河邊：「呢到都幾啱散步喎。」

「係呀，我有時都會落嚟跑下步。」

「如果我住呢頭，我都應該會成日落嚟行下。」

下午的城門河人流不多，有些放了學的小學生在跑；有些老人在慢走；這種交錯就像一個快鏡和慢鏡在重疊。

我們在一座橋的前面停下了，他望著河說：「好似無好好同你傾過件事。」

「吓？」我有點驚訝，沒有想過他會主動提起這個話題。

「其實我真係好對你唔住。」他嘆了一口氣：「呢段時間辛苦你啦。」



「唔好又講對唔住啦...你都好好，又無走咗去，又日日陪我。」我衷心地說：「我好多謝你，真心嘅。」

「傻啦，呢啲係我應份㗎。」他摸著我的頭：「我地都將第一次奉獻咗畀對方。」

「嗯...估唔到會咁。」我輕輕靠在他的肩膀上：「雖然我哋決定咗唔要，不過我會好感激有過呢段經歷。」

「我都係。其實諗深一層，無論發生好定唔好嘅事，都係我哋人生嘅一部分。所以我地要學識接受佢、面對佢。」他繼續順著我的髮絲向下摸，另一隻手輕輕摟著我的腰部。

「我相信呢件事過咗幾耐都好，都係對我哋往後人生一個好好嘅體會。」我轉身回抱他說。

「細個嘅事，本身已經令我覺得生命好脆弱，話無就無。我無諗過去到而家我又要經歷多一次...」他輕輕放開我，然後點了起煙：「但真係無辦法，我哋都無能力要...如果夾硬生佢出嚟，對大家都唔好。」

「如果當初我好堅持話要，你會點？」我好奇地問。

「我會勸你唔好要。」他輕笑了一下。



「咁我死都話要生呢？」

「如果你好堅持，我都無計嘅。」他聳聳膊：「不過我真係會叫你唔好，因為我地真係承擔唔起呢個責任。」

「我都係問下，我都知要唔到。」我沒有向他坦白，其實我對孩子有很深的感情。

突然一下胶痛，我忍不住彎下身來。

這是懷孕初期經常會發生的事，已經不是第一次發生，所以我也不太驚慌。

反而我的舉動嚇壞了他：「喂，做咩呀？好痛呀？」

「係呀...有時候唔知點解會好肚痛。」我捂住肚子說，然後扶著欄桿對他說：「唔使擔心，一陣就無事。」



他不知所措地扶著我，直到我慢慢挺直身子，他才鬆一口氣。

「嘩，畀你嚇死。」他抱著頭問我：「我可唔可以...摸下佢？」

「好呀。」

然後他蹲下身，輕輕撫摸了我的肚子數下後，對著孩子說：「BB，你要乖乖地。媽咪陀你好辛苦㗎啦，唔好整痛佢，知唔知呀。」

我沒有想到他會說這種話。

一陣溫熱在眼眶裡幾乎傾瀉而出，我眼前是一個很愛護我和孩子的爸爸。

到這刻我才忽然意識到，我們之間的身份和關係，不是情人也好，至少是一家人。

我們三個是真真正正的家人。