【青春純愛+靈異】收音機裡的情人: 第十四章：挽救 （上）

「冇呀！啱啱諗緊去打咩暑期工好啫！」 

「誒.......入去先講啦！我叫你地入去呀！」孔子總是衆人中最不起眼的一個，連說句話都沒人爲意。 

就座後，桌上當然少不免有十碟牛肉和一人一支啤酒。哪有人喜歡在吃火鍋時吃菜的呀？ 

「係喎！放榜之前同暑假有咩打算呀？會唔會一齊搵暑期工做呀？我都等錢使喎！」星仔道。他作爲印度人，操的廣東話還比我們更正宗。

 「宜家咁嘅市道，有咩好工撈呀？我又唔想坐喺office 到hea，又唔想做sales 企餐飽！」榮少道。



 「榮少果然係少爺仔喎！乜撚你都話唔想做又學人打暑期工？叫你老母畀錢你算撚數啦！」豹哥總是喜歡粗豪地說話，儼如電影中的江湖大佬般。

「喂！你哋話我哋搵啲出版社工做好唔好呀？我見專出網故嗰幾間都有請排版嗰啲喎！或者佢哋嚟緊書展都請緊人睇檔喎！」我們衆人都是網絡故事愛好者，他們應該會覺得這提議非常不錯吧？

 「書展？好喎！我都想睇吓佢哋今年會出啲咩書。我想有墨巴簽名嘅病港呀！！」孔子道。他是奇幻故事的忠實支持者，病港應該是他暫時最愛的故事。

 「呢類型嘅故啲角色個個中二病上腦，有咩咁好睇啫！識睇梗係睇恐怖故啦！好似話莫斯科地鐵嗰個恐怖故都會喺書展賣呀！最緊要喺可以見到靚女作者，真係諗起都正！」星仔則是一個不折不扣的恐怖小說擁躉。 

「唉......可惜啲甜故永遠都出唔到書啦！淫謙，你話喇！好似呢排最紅嘅家姐的底底誤我終身，我真心鍾意睇㗎！又或者係中出副校嗰個故，又有劇情又夠重口味，刺激過啲恐怖故多多聲！」豹哥與我一樣，喜歡看愛情動作故事。



 「哦！是但啦！我呢排睇緊有個關收音機事嘅純愛故，買書就睇吓點先啦！」我與昕昕多交流後已經很少看甜故。 

「你睇乜鳩㗎？聽都未撚聽過！純愛？收皮啦！性同愛兩樣嘢係一齊㗎嘛！做咩呢排轉死性呀？好恨有女呀？」

 「你係dry 嘅咪介紹啲女仔比你識囉！我都識唔少彤彤嗰啲質素嘅有錢女㗎！」榮少好像意識到自己說錯話，便不斷盯着其他人，看看應該如何反應。 

「誒.......今晚係兄弟之夜呀嘛！女呢啲就唔好提喇！」孔子好心地打圓場，看來他們所有人都認爲我對彤彤心存芥蒂。

 「冇嘢嘅.......呢排轉左口味啫，關冇女咩事喎！」我裝作輕鬆，嘗試挽回尷尬的局面。



「屌！唔好理喇！啲丸熟咗喇！食嘢啦！飲勝！」豹哥趕快轉移話題，向衆人舉起啤酒罐。 

在這個夜晚，我們把考試，網故，足球，電玩，女優全都談過一遍，隨着酒意漸濃，我們說的話題也變得更語無倫次。 

，我對這些話題都不太感興趣，所以便把焦點轉移到飲酒身上。 

我拿着第三瓶啤酒，把最後一滴酒一飲而盡。 

「𡃁仔！我哋閂門喇喎！你哋轉場啦！」餐廳負責人有點不耐煩的看着這羣黃毛小子。 

「兄弟！上嚟我到呀！今晚老豆老母出嗮去，屋企無人呀！」榮少這樣說。當然，也只有他的家能容納我們五個人。 

「好！我去七仔買多打啤酒！」酒量最好的豹哥堅定的說。

 「翻......屋企......昕昕.......」我目前的畫面已是天旋地轉般混亂，也完全集中不了精神，只好無力地吐出幾隻字，可仍是微弱得沒人能夠聽見。 



「喂！淫謙好似飲咗四五支酒喇喎！可能要擡走佢先得喎！」我在模糊中聽到這席話。 

「咁帶埋佢去榮少屋企啦！」另一人這樣說。 

我在他們的攙扶下上了一輛的士，便完全失去記憶。

 甫醒來，額頭已傳來陣陣悶痛，但腦筋比起昨晚算是靈活了。 

我望着週邊看似熟悉的環境，緩緩走到開揚的露臺看着晨光。

糟糕了！我在這裏睡了一天嗎？ 

「死喇！昕昕見唔到我會唔會好擔心㗎？」 與一衆兄弟狂歡過後，我才爲剛才的行爲感到悔疚。



爲何我要拋下她獨守空房，孤獨地度過一夜呢？ 我回望後面的地板，五兄弟完好無缺地攤在光潔的地板上，而豹哥對着我眨了眨眼，看似也是剛醒來。 

「欣欣？新女呀？」他慵懶的伸着懶腰，卻能準確無誤地聽到我輕聲低語。

 「冇嘢！我都係走先喇！」我匆忙的摸着口袋裡的錢包，電話和鑰匙準備離開，豈料我雙腿一軟，整個人攤倒在地上。 

「你路都行唔到，點走呀？呢到咁隔攝，得居民巴士坐㗎咋！」看來我是忘記了榮少住的壹號雲頂在沒有私家車和居民巴士的情況下根本就是山旮旯地方。

 「喂！終於醒喇你？你知唔知你條友搞到我哋尋日鬼咁辛苦呀？淨係識嗌咩欣欣，但連一步路都行唔到！宜家重色輕友呀？」能在此時說得出這麼冗長的句子也只有屋子的主人榮少，因爲他昨晚只喝了一瓶酒。 

「佢......唔係我女朋友呀。」顯然我的理智還未恢復過來，所以才會回答些毫無關係的答案。