「我都未問你就喺度澄清?睇嚟唔係我想像中咁簡單喎!」我用盡心神集中着榮少的模樣,才發現他在模仿着神探伽利略的招牌手勢。這小子以爲自己這樣做就很帥嗎? 

「唔好扮型啦!我不知幾重色輕友!.......啊啊唔係唔係......」唉,我還是不說話了。

 「你條死友,又真係認㗎喎!果然係我哋嘅最佳男友!又長情又放條女喺第一位!」 

「咁咪好囉!唔使再齋睇愛情動作片,可以落場打喇!唔係嘅話就睇幾多都彌補唔到心靈創傷!」我此刻已很清楚他們擺明就是在說當年我與芊彤告別後整個暑假都把自己關在家裏一事。 

「咁我都放低咗以前啲嘢啦!」在那天之後,我再也不用在人前裝作無恙,能夠真正豁達地說出我放下了四隻字,因爲昕昕似乎把我內心的空洞都填滿了。 



「果然係男人,有條新菜就唔記得嗮以前啲嘢。」他們接近異口同聲地說道。 

「喂!係有新女嘅,send張相出嚟開心share 啦!下次或者可以帶埋阿嫂嚟㗎!」

 「哼!真係睬你哋都嘥氣!」我裝作瀟灑地回應。我只是對昕昕有少許好感而已,怎能稱得上男女朋友?

 就算她是我女朋友又如何,我也不能見到她的樣子,挽着她的手逛街,對於其他人來說,她只是個不存在的人。

 儘管如此,聽到有人認爲昕昕是我女朋友時,我總是忍不住抿嘴一笑。若然此事能夠成真,該會是多好呢?



 在恢復體力後,我上了居民巴士,便立刻跑回家裏。 

「嗄......嗄......昕昕.......遲咗返嚟唔好意思呀!」我在客廳喊話,希望房間裡的昕昕聽到。 

「喂!死仔!嗌緊邊個呀?做咩成晚唔返嚟呀?」母親突然從廁所走出來。

 「你......唔係要返工咩?」我疑惑的看着她。 

「衰仔個身成陣酒味嘅?連呀媽今日放假都唔記得喇?」 



「你仲細,唔好飲咁多酒喇!飲到腦都壞埋,一翻到嚟就唔知嗌緊邊個。」她滿臉嫌棄地走回房間。

 我沒多管她便把沒電的電話充電,再走回房間帶上耳機。

 「喂!做咩成晚唔返嚟喎!你知唔知會好令人擔心㗎!」連母親都還沒責備我,她竟然搶先一步罵人了。

 「對唔住呀昕昕!我尋日斷咗片,所以先冇返嚟,我唔係有心㗎!」我安撫着惱怒的昕昕。

 「我都知尋日留咗你響度成晚,搞到你好唔開心㗎喇!不如我帶你出街賠罪啦!」耳筒的另一端仍是鴉雀無聲,只怪當時的我實在不懂得向女生賠罪。

 「喂!你唔係收埋咗個女仔喺屋企呀?你留咗邊個喺度成晚呀? 出嚟!」母親忽然破門而入。 

「我冇呀!你.......一直偷聽緊我講嘢呀?」我縱使驚訝,仍是乖乖的走出房間,反正她也不會在我房間裡搜索到任何收穫。 

房間只有寥寥數十尺,所以她很快便搜索完畢,並驚慌的走出來。



 「仲以爲你金屋藏嬌,點知宜家仲大獲!間屋有鬼呀!!!!」她就如我一樣天生有點撞鬼的基因,只是她從來不把鬼魂看作自己的朋友。

 「你知唔知呀,我呢條鏈好靈㗎!一感應到啲污糟嘢就會發光㗎!你睇?」若她不是把錢財花到手腕上形形色色的水晶鏈,也許我們生活就不至這麼拮据。 

「是但啦,係又點唔係又點。」

 「搞錯呀?你真係飲酒飲壞腦喇。你唔記得細個嗰陣你比鬼上身嗰次呀?呢啲嘢好危險㗎!」她眼眸反映着懼怕的眼神,而我也略知爲何。
已有 0 人追稿