廟街有殭屍（已在各大書局上架）: 第四十四章

我們奔到大街，殊不知數十隻殭屍已經逃到內街，到處咬人，各人嚎叫四散，亂得一團，被咬者又變殭屍，再四出咬人，人傳人，屍咬人，瞬間大街亂成一團，哭泣聲不絕，頓成地獄。
 
「佢哋唔係已經有預感會做殭屍？」
 
「佢哋預係一半人，無諗過會有山墳殭屍咬人令最後全部人變晒殭屍，嗰個黑衫人呃晒所有人。」
 
「即係佢⋯⋯根本一早已經想將呢度所有人變成殭屍？」
 
「係，而家超出傳染基數，我哋再滅屍都無用。」她說：「呢度無救，衝出去。」她說。
 




此時碼頭一班船正開走，大量人湧上船，連船頭都擠滿人，迫得要命，船急速駛走，有些人因站在船邊，失足跌進海裏。
 
「點算？」我問。
 
「AV仁佢哋？」南門蔚。
 
「應該上咗船。」我說。
 
此時碼頭亂得不可開交，屍橫遍野，再說也有數百隻殭屍，再留下也沒有用。
 




「我哋搵一個地方。」她說。
 
我們一路上斬殺了好幾隻殭屍，仍然被無數的殭屍追趕，長洲各處已淪陷，所有人變成殭屍只是時間的問題，我們邊走邊戰，殺出重圍，好不容易走到教堂路，進去其中一間教堂。
 
一進門，便是一隻神父殭屍，牠見我們來到就撲上來，我急步向前，左手擋住牠的口，右手貼符在牠頭上。
 
「對唔住，神父，借你個地方一用。」南門蔚說。
 
我們把所有的門口都封上黃符，算是暫時頂住牠們的攻勢。
 




「點算呀出面地獄咁。」我說。
 
她呼了一口大氣，倒在地上。
 
「妳無事嘛？」我問，扶她坐在椅上。
 
「無，只係頭先用得太多墨氣。」她說，面色虛弱。
 
我打開手機一看，新聞正報導有強烈的颱風正往香港襲來，規模之大是十年一遇，但除了颱風之外，就再沒有其他新聞，絲毫不提長洲的現況。
 
「係政府唔知定點？」
 
「應該唔係，係各大媒體都被人封嘴。」
 
「弊，如果普通人唔知，入咗嚟咁點算。」




 
「你應該問，如果有任何一班裝有殭屍嘅船出咗去點算。」
 
「但而家打大颱風，應該無船再入。」
 
「希望。」
 
「長洲有二萬人，如果有二萬隻殭屍出去，都唔惹少。」
 
「你計漏咗，仲有墳地出嚟嘅殭屍，嗰度應該都有萬幾⋯⋯呢招係好古老嘅黑道術，究竟係咩人會咁做。」她一邊沉思，卻不得答案。
 
「三萬？」我問。
 
「三萬個都夠香港淪陷。」她氣若柔絲地說。
 




她的臉色一白再白，看來所用的墨氣實在太多，至少從震撼的效果來計算，越強大的東西所要付出的代價越大，所以承受的自然更多。
 
「你都係抖下先啦，呢度由我睇住得。」我說。
 
夜晚，她開始發起高燒，幸好教會的後堂有充足的食物和水，夠我們在這裏一段時間休養。我不斷替她換濕布降溫，只是沒有什麼好轉。
 
她這副模樣，是不太有機會衝出去。
 
她昏睡的那段時間，我收到AV仁他們的電話，他說他們平安到埗，但所有的船停駛，他們也沒有機會回去。
 
「癡線，長洲發生咁大件事但係政府竟然可以一句都無講過，竟然只係報颱風嘅消息，我哋好似活係平行時空咁樣。」AV仁激動地說。
 
我想起在高街時，那殭屍所說的話，就是政府也是一直大力將殭屍帶入香港的原兇，這次發生這麼大的事其實背後有否政府的意思，也是未知之數，但從這樣的態度來看，應該也是有份參與其中。
 
忽然傳來：「畀我聽！」然後就是一陣雜音，之後就是呂子璇的聲音，應該是她搶去電話。




 
「你哋而家點？」
 
「我哋而家喺教堂避緊，應該冇乜用。」我說。
 
「我鬧爆AV仁佢哋，竟然丟低你地就咁自己返嚟見死不救。」她激動地說。
 
「咁佢哋喺度都幫唔到咩手。」我說。
 
「我唔理啊，你一定要同我安安全全咁返嚟。」
 
「呂子璇。」
 
「咩？」
 




遲疑半晌，我說：「無嘢，你哋記住買多啲食糧，留喺屋企，香港可能會淪陷。」我鄭重地說。
 
收線後，我嘆了一口氣。
 
望著外邊屍橫遍野的街道，我不禁打了一個大冷顫，如果真正殭屍病毒大爆發，是如此束手無策。
 
一直以來，都是南門蔚保護我，這次該換我了。