餘下的殭屍見唐裝黃殭已死,立時群龍無首亂成一團,我沒多經思考,因為時間不多,使勁
的跑往海灘,跑着跑着,只覺身體輕盈易動,比剛才的感覺更強烈,一步十行,迅間便由碼頭來到海灘邊。我對自己身體的狀況更多是害怕,到底我是不是已成怪物?
 
可是跑得再快,時間還是晚了些,已是十點十八分,只見有一小船仍在泊灘邊,引擎正動,隨時候命。
 
「開船!」我喊道。
 
我一跳上船,船便馬上開動,餘下所有殭屍在海灘,追又不是,手足無措。
 
「你趕到!」南門蔚興奮得緊抱我一下,頃刻便笑容漸退,又回復常態:「我以為你會死。」




 
「妳擔心我呀?」
 
「無人擔心你。」
 
「佢擔心到你死,差啲想衝出去搵你。」船家一邊駕船離開,一邊插嘴說。
 
「妳擔心我咪講囉,我又唔會講出去。」我說。
 
「無人擔心你呀,我不知幾想開船。」她說。




 
「十八分。」我把手錶展示給她看。
 
「你個嘢壞咗。」她說。
 
「你老尾,你兩個情人有無理我嘅存在?」船家說:「我好歹都係冒住生命危險救你哋出嚟嘅人喎,多謝都無聲。」
 
「多謝你。」我們異口同聲地說。
 
船乘風破浪駛離長洲,在風雨交加下,我們被吹得滿身濕透,卻比剛才多一份安全感,我倒在船上,呼了一口大氣說:「我原本都真係死硬㗎,仲遇到之前高街隻黃殭。」




 
「黃殭?」
 
「無錯,我終於知點解佢會控制到人嘅幻覺,原來係屍鬼一體,好似胡新海件事咁,但只不過今次唔係怨靈主導。」
 
「我有聽過高等嘅殭屍係可以控制鬼,只不過近年喺香港都少見,如果係咁就會更麻煩,吸取怨靈嘅邪氣,就會變得比同等嘅殭屍更難纏。」她說。
 
「無錯,佢非常難打。」我說。
 
「咁你點解會嚟到嘅?」她問。
 
「關於呢點,我都好想問妳。」我說。
 
我把剛才在海灘的所有一五一十告訴給南門蔚,包括展示殭屍咬我的傷口,奇怪的是牙印全都消失。
 




南門蔚一直默然聆聽,待整個故事完結後,她仔細無遺地檢查我的全身,說:「睇落唔似有屍氣。」
 
「的確無,我都覺得好奇怪,會唔會係我對世間無任何執著?」
 
「你無?」
 
我思索一番,瞥了一眼她,說:「應該唔係,我估唔係呢個方向,佢死前好似講過⋯⋯我係咩⋯⋯殛。」
 
「殛?」
 
「妳有無聽過。」
 
「無⋯⋯我知少少,但呢樣要問更有經驗嘅老前輩。」她眉頭深鎖,神情仿佛告訴我,她知道些什麼,卻不願透露,肯定不是好消息。
 
「我到底係咪怪物?」我問,她只是沉默不言。




 
烏雲被我們拋在身後,回望長洲,這小島連同三萬隻殭屍已消失在我們的視線。