由於全身乏力,我終於敵不過睡意,不知不覺間在船上熟睡。
 
似是一眨眼的時間,我們的船已經駛回中環碼頭,香港高樓林立的景色映入眼廉,我發現自己靠着南門蔚的肩膀睡了,她正在翻看一本古籍,看得入迷。
 
此時,手機傳來突發新聞的通知,是一個廣播通知,而這廣播是全港性,所有香港市民都能看到直播。
 
「各位香港嘅市民大家,而家係一個機會,畀你哋可以有機會長生不死。」
 
鏡頭前說話的,正是黑衣男。
 




「呢個方法係,殭屍。雖然好多人未聽過,但我可以同大家講,殭屍係存在,一個比人類更高等嘅存在。香港大部分人喺目前呢片土地都未進化成殭屍,而我哋好樂意將你哋融入殭屍國度裏面。殭屍擁有力量、超越人間疾苦。無生老病死嘅煩惱、殭屍無須同你嘅愛人分開,殭屍甚至唔使煩生計,只要我哋繼續去吸人血就可以。
 
只要加入成為殭屍,我保證香港人可以面臨一個無血無痛嘅大進化,一切都喺和平下進行。喺今晚十點前,我會各區擺設街站,只要所有人出街飲我哋所製嘅藥水,就會無痛變成殭屍,我保證你無任何財物損失,會變成黑殭,殭屍等級中較高等位置,但如果過咗今日,咁所有人都會係低等嘅白殭或者係⋯⋯食物,唔好怪我哋破壞一切。」
 
牠說畢,背後就有幾位高官出來,為其站台,大放厥詞,言說成為殭屍的好處說:「我哋可以保證,香港大部分人飲用完藥水成為殭屍,所有嘢都無變,甚至更好,因為我哋有殭屍嘅力量同不死身。」
 
「係大進化定大清洗,痴線。人類竟然吹奏殭屍,呢啲係咪『人奸』?」我說。
 
「黑衣嗰個講嘢嘅語氣同聲音好怪,唔似係一個人。」南門蔚說:「我睇到佢體內應該有好多鬼魂。」
 




「咩意思?」我問。
 
她再翻起古籍,說:「頭先你講完唐裝個老伯後我有查書。不化骨,係一種殭屍專門吸食怨靈而生,得到鬼靈至陰之力,超越好多同等殭屍,係唔少殭屍工會嘅死敵。聖經都有記載過一個人被材民隔離,因為佢鐵鎖鎖唔住、刀槍不入,仲四處吃人最後俾耶穌驅除,格拉森嗰個被鬼附嘅其實就係不化骨。」
 
「咁不化骨可以被幾鬼附?」
 
「聖經嗰次係二千。」
 
「二千隻鬼?!咁你睇到佢有幾多?」
 




「可能差唔多。」
 
「唔係咁大鑊呀,如果係咁⋯⋯點玩?」
 
二千隻鬼附是什麼一回事。
 
此時,一隻大輪船驀然在我們背後出現,與我們同方向往中環駛去,船上站著的一個個不動、面色青白的人,堆滿整艘船,應該是長洲來的殭屍。
 
「又話和平。」我說:「好明顯唔係咁諗。」
 
「殭屍係呢個世界最唔可信嘅生物,首船好明顯有政府背後支持,而家打風點會仲有船開。」南門蔚說。
 
「呢度有幾多隻⋯⋯」我望了一眼,數之不盡。
 
那大船急駛靠近,應該想撞向我們,但船家的技術倒也高超,馬上一閃,向右面急轉,一下避開。




 
「喂,我唔得啦。」船家說:「我喺碼頭放低你哋,但得十秒落船。」
 
「唔使十秒,近岸就得。」我說。
 
「吓?你點上呀。」他問。
 
「信我。」
 
我拉著南門蔚的手,在船快要到岸,相距不到半米之際,我們一跳,躍出幾米外,輕鬆落地。
 
南門蔚吃了一驚,問:「你幾時變得咁大力?」
 
「就係俾嗰隻嘢咬咗之後。」
 




此時那大船已靠岸,一群衝出碼頭,深入市區,另一大群殭屍凶湧而至欲圍堵我們,她拔出長劍,迎戰來的殭屍。
 
「妳得唔得㗎?」我問,她仍是高燒不退,情況不理想。
 
「可以。」她說。
 
白殭的動作比起黑殭不快,她起手就斬下數十隻,一時間屍氣蔽天,完全沒有殭屍能埋身,可是數目太多,始終圍成一團就等於死定,我們且戰且退,嘗試打開缺口,忽見路邊有一汽車。
 
「上車。」
 
我們跳上一輛汽車,那個司機未來熟睡,看我們無故闖入,本來欲大罵我們:「呢架唔係的士⋯⋯」但話未說畢,只見大群殭屍衝來,嚇得臉青口唇白,目瞪口呆。
 
「開車呀!」我大叫,他這時才反應過來,腳踏引擎,車急速駛走,把差點趕上的殭屍摔掉。