【穿越/愛情】《我同鍾意咗十一年嘅人表白，佢竟然跳海死咗》: 五十六

（五十六）
根據小女孩的描述，我讓小女孩騎在我的膊頭上，三人一起走過了一次小女孩與父母還有一個尚在BB車上的弟弟曾經到過的地方。
可是因為一路上一無所獲，所以我們三人又嘗試向長洲警署方向走，可是到了附近依然未見小女孩父母的蹤影。

「悅悅，係咪都未見到爸爸媽媽啊？」「悅悅」這個名字，是小女孩在路上告訴我和阿晴的。
悅悅在我背上搖搖頭，算是回應了阿晴。
「咁就奇怪啦，行過嘅地方都無......」其實這一來一回我們已走了差不多十五分鐘，但卻依然未有所獲，這令我也不禁有點擔心。
這時候，我突然感到頭上有點濕濕的，似是有雨點灑落頭頂。
當我聽到微細的飲泣聲時，我便知道是悅悅在哭了。



我把悅悅從肩膊放回地上，讓她坐到路邊一旁的石壆上。
看著悅悅低頭哭泣的樣子，阿晴臉上也是擔心與憂慮的表情。
「你哋又話我諗住見翻爸爸媽媽就會夢想成真嘅，但係而家都未見到......我會唔會以後都見唔翻爸爸媽媽㗎？」悅悅斗大的眼淚驟然落下。

「悅悅，你而家係咪好擔心啊？」阿晴這時向悅悅柔聲問候，悅悅含著淚點點頭。
「其實晴姐姐我以前都試過好似你咁擔心㗎，你想唔想聽下我嘅故事啊？」阿晴一邊說，一邊屈膝坐到悅悅的身邊。
悅悅止住了哭聲，用一雙大眼睛看著阿晴，似是一個準備就緒的聽眾。
「悅悅，你有冇翻學㗎？」阿晴微笑望著悅悅，而悅悅則點點頭。

「晴姐姐仲係十三歲嘅時候，我試過好驚翻學㗎。因為嗰年，晴姐姐要轉去一間新學校讀書。要讀新學校，就代表我完全唔識身邊嘅同學啦，老師啦，所以呢件事就令我好擔心啦。」


「嗰一年晴姐姐讀緊中學二年班，當我第一次走入去一個新班房嘅時候，入面嘅同學我一個都唔識，呢樣嘢令我好緊張。當我求其搵個位坐低咗之後，我都唔敢同側邊嘅同學傾計。之後，我聽到有啲同學講，話將會有一個好惡嘅老師成為呢一班嘅班主任喎，悅悅，你估下嗰時阿晴姐姐嘅心情係點嘅？」此刻阿晴像是那些「午間家長講故事」的家長義工，熟練而溫柔地向悅悅說著故事。

「好驚？」悅悅能作出回答，證明她也投入在故事當中了。
「悅悅你真係聰明啦，一估就估啱咗！」阿晴輕輕拍手以示欣賞，然後把故事續說下去：「嗰時嘅晴姐姐好驚，好怕會有一個好惡嘅老師入嚟班房。就係呢個時候，晴姐姐身邊有個人突然間對我講咗一句：『你好似好緊張喎。』我望住呢個人，我唔識佢，但見到佢笑笑口咁望住我，所以就問翻佢一句：『我哋嚟緊嘅班主任係咪好惡㗎？』呢個人笑住咁答我：『如果你想有個好嘅班主任，咁你要快啲祈禱許願啦，仲有十分鐘班主任就嚟㗎啦。』」

「我嗰時以為呢個人喺度講笑，所以就無理到佢。點知呢個人見我無理佢，佢又講多咗句：『唔夢想，邊得嚟夢想成真啊？試下許願啦！』嗰時我聽到呢句嘢，我淨係覺得呢個人好古怪，但係唔知點解，我個心又真係跟住佢所講嘅嘢去做，靜靜地許咗一個願望。」
「結果，十分鐘後，我嘅班主任嚟啦。悅悅你估下，我嘅班主任係好嘅定係惡嘅？」阿晴又笑著向悅悅發問。

「我估係好嘅！」悅悅側著頭思考的表情實在可愛極了。
阿晴聽了，笑著搖頭地說：「好可惜，嗰一年我嘅班主任係一個超惡超鍾意鬧人嘅老師，聽講仲係全校十大最惡老師嘅第一位啊！」


「吓！」悅悅一時間由興致勃勃變成了失望的表情，「咁咪即係夢想唔會成真囉。」
阿晴這時候溫柔地摸著悅悅的頭髮，笑著說：「咁又唔係喎。因為晴姐姐嗰時喺心入面許嘅願望，其實唔係想要一個溫柔嘅老師。」

「咁係咩啊？」悅悅一雙大眼睛變得更大了。
「其實晴姐姐嗰時最擔心嘅，係要自己一個人上堂、過小息同埋食飯。所以，我嗰時嘅願望係，希望可以喺呢間學校入面，搵到可以陪我嘅好朋友。而結果，我喺嗰一年搵到四個好朋友，而其中一個......」阿晴說到這裡，把眼光投向了我，「就係嗰一個鼓勵晴姐姐要許願，仲成日笑嘅古怪同學。」
說完了這一段，阿晴再次轉向望住了悅悅：「所以呢，雖然每個人都有擔心，但只要相信自己許嘅願，夢想就會成真㗎啦。」
當我看見悅悅重現笑容地用力點頭的一刻，我就知道阿晴這故事奏效了。