[穿越][愛情][校園]重回青春時尋找當年失去的愛情: 第一次約會？

我看到眼前的這個男生，頓時一股怒氣從心底上起來，就想把大門關上。

「喂，阿晴你聽我講先啦。」男生慌忙推著門不讓我關上。

「去邊到都要見到你，真係煩死人啦。」

「阿俊同我講你病咗呀嘛，你有冇事呀，使唔使帶你去睇醫生？」男生關切之情顯而易見。

「關你咩事姐，你走啦唔想見到你。」我一下子就把門大力關上。



過了幾秒後，我卻突然想起甚麼便把門重新打開。

「阿晴，你？」

「攞碗粥嚟！」我伸出手來要求他將買來的粥給我。

他乖乖地把粥遞給我，可是我接過粥後就不理會他直接「嘭」一聲把大門關上。

「嘻！原來阿晴肚餓，好彩佢睇落總算冇乜事，send番個message 俾阿俊先。」那個男生在自言自語，不過我就再也聽不到。



「最衰都係嗰個賤人，搞到而家阿俊完全變晒，以前佢都唔係咁。」我一邊吃着粥，一邊心有不甘。

———

「喂？係咪Michael 呀？」

「阿俊？你搵我咩事？」

「阿晴佢病咗，你⋯⋯」我還未說完就被Michael 打斷了。



「咩話？阿晴病咗？佢咩病？有冇事呀？我⋯⋯」

「你聽我講埋先啦，你一輪嘴問我點答到你咁多，阿晴話佢發燒，你幫我去睇下佢有冇事。」

「好，但係佢屋企地址係咩？」

「佢住係xxx，係喎你記得買碗粥上去。」

「好。」

「唔該晒你，遲啲請番你食嘢。」

「得啦，你俾個咁好嘅機會我，我要多謝你先真。」

我把電話掛斷後，小彤卻掩著嘴地笑。



「你笑咩？」我大惑不解。

「冇呀，笑你原來都咁醒目識俾機會人。」小彤滿意地看著我。

「咁你幾時俾機會我呀？」我下意識地挑逗小彤。

「我唔明你講咩喎，我要返屋企啦，你送我返去啦。」小彤紅著臉地向前走。

「哦！」我心裏盤算著怎樣才可以和小彤有真正約會的時間。

走了十多分鐘後，我正想打算開口跟小彤說的時候，小彤卻拉著我衣袖到一間遊戲機中心門口。

「不如入去玩囉。」小彤指著那間遊戲機中心。



「咁你又話要返屋企嘅？」

「溫完書都想放鬆下㗎嘛，定係你唔想同我一齊玩呀？咁我返屋企囉。」小彤說完後便裝作一副想要離開的樣子。

「咁我哋入去玩啦。」我拉著小彤的手走進去遊戲機中心。

我們一進去先玩賽車遊戲機，途中小彤因為不懂得如何操作，令到我要捉著她的手教她。

「哇，真係好好玩呀。」當小彤發現遊戲完結後我卻還在捉著她的手就面紅耳赤，我卻全然不知。

「你放手未呀？都玩完啦！」小彤害羞地跟我說。

我急忙不好意思地放開小彤的手，而她亦低著頭去玩其他遊戲機。

「原來遊戲機中心都幾好玩，係呢小宇點解你識玩入面啲機嘅？你成日嚟㗎？」



「冇呀，阿明有嚟過，佢有同我講過入面啲機點玩，所以咪識點玩。」其實我懂得如何玩是因為未穿越前的我在長大後間中也有到遊戲機中心玩。

「不如我哋食埋嘢先返屋企？」我向小彤提議。

「原來都六點幾啦，好呀，你想食咩？」小彤看一看手錶。

「我知道前面有一間韓國餐廳幾好食，我哋去試下囉。」

「嗯！」小彤答應我。

於是我和小彤就到那間韓國餐廳，我們找好位置點完餐後，小彤去了廁所。

「你哋嘅嘢食嚟啦！」餐廳的侍應把食物送給到桌上。



「不如整蠱下小彤先，反正佢叫嘅嘢食係辣，佢應該唔知。」我把一些辣椒醬加在小彤叫來的食物上，然後再裝作若無其事地坐回原位。

「嘢食到啦？你可以食住先呀嘛。」小彤去完廁所出來對我說。

「我諗住等埋你先食，而家食啦。」

「等陣先，小宇你嗰碗好似好食啲，不如我同你交換啦！」

「咁樣呀？」

「你唔想？唔想就算啦。」小彤見我面有難色。

「咁你食我呢碗啦。」我心想只是加了少部分辣椒醬應該沒有事。

豈料我一吃下去時，卻發現辛辣無比，辣得我不停咳嗽。

「你有冇事呀？你食唔到辣野就唔好同我換呀嘛。」小彤擔心地拍著我的背部，嘴角卻被我捕捉到不期然地微微上揚。

「唔通比小彤發現咗？」我心中叫苦連天，最終我只是吃了幾口就和小彤離開了。

我和小彤一起走了十多分鐘後到達了她家門口。

「小宇唔該晒你呀，送我返嚟。」

「呢啲係我嘅份內事姐。」

小彤聽到我這個回答，臉上浮現一絲紅暈。

「我入去啦，你返屋企都要小心，返到去記住打電話俾我呀。」小彤走進她家的大門後跟我說。

「我會㗎啦。」