[穿越][愛情][校園]重回青春時尋找當年失去的愛情: 海洋公園的回憶

我跟小彤道別後，在街角卻遇到一個意想不到的人。

「呠！」一道汽車喇叭聲從我前面傳來，可是車頭燈卻太亮令我看不清到底是誰坐在車子裏面。

「咦，uncle你係度嘅？」坐在車裏的正是小彤的父親。

「阿俊，你入嚟，我有啲嘢想同你講。」小彤爸爸讓我坐在車子裏的後座。

「哦。」我坐進小彤爸爸的車子裏，心裏卻猜度著小彤爸爸的用意。





「阿俊呀，你係咪同緊小彤拍拖？」

「係呀！」難道小彤爸爸要怪責我？看到小彤爸爸我就想起上次的那個夢境。

「你哋就快考公開試，我唔係幾想你哋拍拖，不過我又唔想我個女唔開心，記住對我個女好啲呀。」豈料小彤爸爸沒有如我想像中對我破口大罵。

「我明㗎啦uncle，我應承你我哋拍拖唔會影響讀書。」

「嗯，得閒多啲嚟我屋企食飯啦。」





「好。」說完之後，我就離開了小彤爸爸的車子。

在餘下的暑假日子中，我大多數都是和小彤在圖書館溫習，而阿晴有時也有找我，不過被我以各種理由推搪過去。

「各位同學，今年係你哋係呢間學校嘅最後一年，希望你哋可以好好準備DSE之餘亦都享受埋中學最後嘅時光。」我們班的班主任在我們中六的開學日說。

我和小彤在開學之後退出了所有課外活動，準備全力應戰DSE。

「阿俊，你下個禮拜六得唔得閒？」小息的時候阿明過來找我。





「應該得嘅，做咩？」

「我同阿欣諗住去海洋公園萬聖節嗰活動，想問下你同小彤一唔一齊去？」

我一聽到『海洋公園』這四個字頓時就想起我在未穿越時和小彤做的一些傻事。

———

「阿俊，你下個禮拜得唔得閒⋯⋯不如我哋一齊去海洋公園玩輕鬆下。」當時的小彤和我只是普通朋友的關係。

「哦⋯⋯好呀！」我回答得十分靦腆。

在約定的那一天，我卻沒有把事放在心上。

「阿俊你到未呀？我到咗啦。」小彤在約定的時間打電話給我。

「唔好意思呀，我嚟緊啦，你等多我一陣。」其實那個時候的我因為遲起床還在家裏。

最終我比約定時間足足遲了差不多一個小時才到海洋公園。

「小彤對唔住呀，我遲咗嚟。」我去到海洋公園後小彤只是一言不發，也沒有太大的情緒波動，只是把手上的門票塞給我。

之後我和小彤去看熊貓以及海豚表演，她才提起一些興致，似乎忘記了我遲到的事。

可是就在之後我做了一件十分愚蠢的事。

「阿俊呀，不如我哋係到影幅相囉。」我和小彤臨走前打算在海洋公園的門口拍照留念。

我答應後小彤就找了一個人來幫我們拍合照。

在合照的時候小彤故意向我走近一點，但是我卻因為害羞而與她保持距離。

「咔嚓！」最終那張合照就成為了我銀包中唯一的照片。

那次去完海洋公園之後，小彤對我的反應就時冷時熱，直到之後那件事關係更降至冰點⋯⋯

———

「喂，阿俊我問緊你嘢呀，你呆晒咁嘅？」阿明的聲音將我從回憶拉回現實。

「冇，我諗緊啲嘢姐。」

「咁你同小彤去唔去？」

「話唔定今次有埋阿明同阿欣去可以有啲出其不意嘅變化。」我在心裡盤算著。





「好，預埋我哋。」

阿明離去後，小彤就回來課室。

「頭先阿明搵你咩事？」小彤問我。

「佢諗住約我哋一齊去海洋公園，阿欣都會去。」

「你應承左啦？你知我嗰日又會得閒？」

「身為你嘅男朋友又點會唔知。」不知道我說這句話的聲浪是否太大令到週圍的人都看過來。

「喂邊個叫你咁大聲？」小彤面紅地扯著我的耳朵。





「對唔住囉，放手先啦。」我拍著小彤的手。

「哼，我考慮下先決定去唔去啦。」小彤表面上和我賭氣，但是實際上我怎會不知道她已經答應。

———

我看著阿俊和楊小彤打情罵俏的情景，心裡就莫名一陣火起。

「唔使咁嬲喎，我諗緊辦法㗎啦！」黎楓芷走過來跟我說。

我握緊拳頭，希望楊小彤快點離開阿俊身邊。