今日我開始左對公司啲同事進行復仇大計: 第二十九節

今日我未返到公司，已經被阿油不斷whatsapp轟炸我。佢問我喺對付Judy一事上究竟有咩進展，但我就選擇左完全唔覆無視佢。到我行返公司，我見到阿油已經一早喺樓下等我黎到嘅阿油，睇佢雙眼佈滿紅根，而且佢不斷好神經質地咬住指甲，睇黎佢精神狀況唔多穩定。我即時左顧右盼，望下阿虎喺唔喺附近，見佢周圍都無人我先敢行埋去。我未行到埋去佢已經撲左上黎捉住我，而我二話不說就好大力咁將佢推左落地，之後唔理佢繼續行入公司樓下大堂。佢即時起身從後扯住我唔畀我走，我回頭冷冷地同佢講左句：「你咪唔好放手繼續喺度發癲囉，陣間畀Miki見到你呢個衰樣係你自己蝕底咋垃圾，你咁想同我傾呀嘛，我地去後樓梯傾啦。」我一講Miki個名就成功令本身失去左理智嘅阿油突然醒一醒，樓下看更蕭伯見我地行去後樓梯都無過問半句，可能佢都對我地公司啲人行為古怪習以為常。 去到後樓梯阿油又開始失控，佢捉住我大聲鬧：「都係你辦事不力搞到Miki無晒心情，我情人節果陣喺佢屋企樓下等左佢成日呀，點知都係見唔到佢嘅蹤影，我打畀佢佢又電話都熄埋，一直到尋日返到公司佢先應我。我問佢果幾日去左邊佢又唔講，我本身買左一大堆禮物諗住情人節送畀佢，再順手向佢求婚架嘛。而家咩都畀你破壞晒啦……」「連你都唔知佢呢幾日去左邊？」「佢一定係因為畀Judy搞到好唔開心，去左搵個地方匿埋避世啦。唔係啦，既然你條廢柴都幫唔到手，我都係自己拎啲嘢去隊阿Judy啦。」我聞言之後二話不說地一巴升左落阿油度，無端端受我一記耳光嘅阿油萬分錯愕地望住我，我見佢唔出聲就開始講：「知唔知自己衰啲咩要畀我打你呀？首先你當你自己係我老細呀，點完我做嘢仲嫌我辦事不力？你條毒男唔好以為自己識得用電腦做埋啲陰質嘢就好巴閉啦，而家係你求我做嘢呀，分清楚莊閒先啦。第二：你搞咁多嘢唔係為左想追Miki咩，你而家發左癲咁上去頂證Judy有咩用，到時咪全世界都知你幾不擇手段，Miki仲點敢同你一齊呀。我而家同你講，Judy應承左我唔會再搞Miki架啦，你唔需要再擔心Judy。至於你話Miki呢幾日唔理你，你有無諗過Miki可能畀第二個男仔約左呀？」阿油聞言之後即刻無力倒地，坐左喺後樓梯一角，佢用類乎帶病呻吟嘅無力語氣同我講：「唔會架……Miki唔會有第二個男人架……」見到佢咁，我知道係我從佢口中套佢關於Miki嘅料嘅好機會，我即時坐低左喺阿油身邊，用溫柔嘅語氣問佢：「不如你話畀我知，你有無察覺到Miki呢排有無咩異樣？」「我已經日日跟住佢架啦，我都無見過佢同過其他男仔出入。我check過佢啲email架啦，佢呢排係成日同個叫Laura嘅人有email往來……另外都無乜見過佢email畀其他男仔啦，最多都係Evans咋嘛，佢唔會係同Evans有路掛。」「呢層我都唔知，如果你真係咁想知道佢係咪同Evans有嘢，你今晚就拿拿臨用你嘅超凡電腦技術去搵出佢地之間有咩關係啦。」講完之後我轉身就走，任由成灘爛泥咁嘅阿油留喺後樓梯到。返到入公司時，我見到Evans好緊張咁拉左Miki去pantry傾計。Evans好緊張咁捉住Miki對手講左一大堆嘢，好似向Miki要求緊啲咩，而Miki則面露難色，但從佢嘅眼神我感到一絲憐憫同無奈。而我好快就發現另一角有一個人同樣注視緊pantry中嘅兩人，果個人就係Daisy，過左陣Daisy察覺到我行左入公司，佢見到我猶豫左一陣，但佢都係決定行埋黎。我同佢兩個經過一陣尷尬的沉默之後，終於由我打開話匣子：「多謝你早幾日送畀我舊朱古力，同年宵果日送畀我個鎖匙扣呀。」Daisy聽到之後沉默左一陣，佢之後答：「咁你都有送嘢畀我啦，大家係朋友唔洗咁客氣。」當佢講朋友果兩個字時，佢嘅面容有啲痛苦，而且語氣都好唔自然，而我聽到朋友呢兩個字時，都同樣地感到心痛。喺雙方沉默左一陣之後，我決定改變話題，我問佢：「係呢，Evans同Miki兩個喺入面講緊咩呀，點解Evans好似咁激動咁嘅？」「我聽到好似話係Evans想見Miki嘅一個朋友，但Miki好似唔肯應承佢……係呢，尋日車你返黎果個女仔咁熟口面嘅，我好似成日喺Evans嘅facebook見到佢。」一聽到佢提Jasmine，我真係唔太識點畀反應好，我深呼吸左一下，之後同佢講：「係呀，佢係Evans嘅朋友黎，係Evans介紹佢畀我識架。尋日因為順路佢先車我返黎咋嘛，同佢揸住電單車，剩係坐到一個人，所以咪無車埋Evans囉。」Daisy聽到之後再次露出悲傷嘅神情，佢淡淡地講左句：「唔洗同我解釋喎，你交咩朋友都唔關我事架啦，好啦，唔阻你了，大家返埋去做嘢啦。」講完之後佢就唔理我返返埋自己個位，大慨佢唔會知道，喺佢轉身之後，我同佢亦露出左同一個神情，我同佢一樣咁難受 我成朝都集中唔到精神做嘢，為左打發時間。我不斷whatsapp Judy提醒佢記住幫我辦事。另一方面，我亦不停whatsapp Miki諗住探聽佢呢排搞緊咩，出奇地佢好老實咁答我：「我有外國朋友黎左香港探我，我呢排日日都忙住陪佢，唔得閒理你同公司啲嘢，無咩特別事唔需要話我知。」既然知道Miki呢幾日都會同Laura一齊，我決定親自出馬去揭開Laura嘅神秘面紗。