今日我開始左對公司啲同事進行復仇大計: 第三十節
喺尋日放工之際，我下定左決心打算跟蹤Miki從而去一睹Laura盧山真面目。但係喺落到公司樓下之際，我畀一個人大力咁扯左入後巷，正當我想掙扎同轉身睇清楚究竟係咩人伏擊我之際。我見到一個我都將近忘記左嘅面孔，呢個人竟然係久違了嘅Taylor。如果大家仲對佢有啲印象嘅話，當日我見到嘅Taylor係一個油頭粉面，身光頸靚嘅小白臉。但而家喺我眼前出現嘅Taylor雖然未至於爛身爛世，但觀呼佢無黎神氣嘅雙目、凌亂得黎又毫無美感嘅髮型、再加上佢面上久久未修理過嘅鬚根，我估佢呢排都唔慌過得有幾好。「嘩大佬你唔係而家先醒起問我拎返果日啲酬勞呀下，我而家都唔係幾想知你同Valarie發生過咩事啦，不過如果你收得唔太貴我都仲肯聽你分享下嘅。」我試探地問一下Taylor，我當然知佢絕對唔會無原無故咁搵我，但無端端畀佢拉左入後巷坦白講我個心都有啲怯。點知Taylor好似發左癲咁好大力推我埋牆，之後歇斯底里咁向我大喝：「收聲呀，唔好嘈呀。」我畀佢呢一下發左神經般嘅舉動嚇疾左，好聽話咁收左聲，佢繼續用好我大喝：「而家唔係我要搵你呀，我無事搵你呀。」睇佢講嘢無晒條理咁，睇黎佢曾經受過好大刺激黎，為怕佢一時癲起上黎拎把刀桶我，我嘗試安撫佢：「你慢慢講啦阿哥，唔緊要架，我唔趕時間，你話我知係邊個要搵我啦。」佢突然向我退左幾步，好似好驚咁，成個身都震晒，睇黎佢諗起幕後主事者嘅時候觸發到佢某啲心理陰影。望住驚到好似癲左嘅Taylor，我突然諗起大明，唔知大明果日畀我玩左鋪勁嘅之後，而家過得點呢，佢又會唔會好似我眼前嘅Taylor咁，一同人上床就驚到傻左呢？過左一陣之後，Taylor好似回復返小小理智，佢同我講：「總之係有人要我向你傳話，叫你呢幾日唔好搞咁多事……佢話你睇到我而家搞晒咁，就好應該明白佢認真起上黎你都惹唔起呀……」唯一怕我喺呢幾日搞事嘅人，只有一個，其實佢唔開名我都知佢係指邊個。「Miki仲有咩事係要托你向我傳話架？」Taylor聽到Miki個名之後，更加掩飾唔到自己面上嘅恐慌神色，佢震晒咁同我講：「我無講係Miki呀，我咩都無講過呀……一日都係你個仆街，搞到我預到咁嘅事，我出黎蒲左咁耐都未試過咁驚架，我畀你條仆街累死啦……」「究竟發生左咩事，不如你講出黎睇下我幫唔幫到你？」「我仲畀你害唔夠咩，總之要講嘅說話我已經講完啦，你好自為之啦仆街。」講完之後，Taylor就落慌而逃。畀Taylor咁樣阻一阻之後，我當然無可能再跟到Miki啦，我唯有寄望阿油會發揮到小小用處，我知道佢聽完我喺後樓梯講嘅一番話之後一定會去跟住Miki。
喺今日返到公司之後，我第一件事就係想搵阿油，點知條友又唔知為咩請左病假唔返工，我whatsapp佢又唔應我。滿肚疑問嘅我隱約估到Miki又唔知做左啲咩，而到我問Judy佢查到啲咩未嘅時候，佢都係答我尚在進行中。喺無計可施嘅情況之下，我決定主動走去挑釁下Miki，睇下佢會有咩反應。由於我知Miki同Evans Daisy三個人約左喺出面食早餐，我襯Miki未返到公司之前，將佢枱面上支hand cream吱晒出黎，再搽晒喺佢啲抽屜嘅手抽同佢平時用開嘅文具上面。我之後將佢枱上面用file整齊分類好嘅文件整亂晒，再喺中間攝左啲外賣紙，我又將佢電腦嘅Browser首頁換左做youtube上面嘅rickroll，即係阿Rick Astley隻Never gonna give you up，而我亦順手將wallpaper換左做一個赤裸上身嘅排骨仔，幅相我係喺某大以自貼相聞名嘅forum度搵返黎。
Miki返到黎之後，好快就察覺到我做嘅所有嘢，但係佢無發脾氣之餘，相反仲向我報以微笑。佢喺用濕紙巾抹返晒佢畀我整污糟嘅嘢之後，就繼續做嘢，好似咩都無發生過咁。我雖然唔信Miki真係可以咁冷靜，對我做嘅所有嘢都處之泰然，不過奈何喺今早我實在有太多工事要辦，搞到我無機會去親身睇下Miki究竟喺處於一個點嘅情緒。喺lunch果陣，Evans走埋黎話有啲嘢想搵我傾，本身想走去試探Miki嘅我，就咁畀阿Evans拉左出去。Evans帶左我去公司附近一間比較靜同高格調小小嘅餐廳，坐低左之後，我仲懶佻皮咁同佢講：「我唔係咁隨便架，唔好以為請我食餐好小小嘅我就肯同你上床呀。」點知Evans一臉認真咁話有嘢想同我講，當我以為係佢想同我講關於佢同Laura嘅事之際，點知我估錯左……
「其實你同Jasmine搞咩呀？如果你係想認真同Jasmine發展，that’s fine, you have my blessing，但就算係你都最好同Daisy講清楚先啦，佢係好女仔黎架。」Evans一輪咀咁講左呢堆嘢，但我就聽到一頭無緒，我一臉無辜咁答Evans：「佢地兩個都係我朋友黎姐，我絕對唔係想玩弄感情。點解你會突然之間問我啲咁嘅嘢，係咪發生左咩事呀？」Evans聽到之後略帶激動咁答我：「你知唔知Daisy今朝幾唔開心呀，Miki一睇就知佢係為左你而唔開心。我當你係朋友先唔想你錯失左呢個好女仔呀，你知唔知錯失左一段愛情好痛苦架。」講完之後Evans露出左痛苦嘅神情，睇黎最後果句佢唔係想用黎教訓我，佢反而似係想搵我訴苦。我即時反問佢：「喂Evans哥，你係咪有心事呀，睇黎你似係有事果個喎。其實我都收到風你個ex返左黎香港，你係咪仲未見到佢呀？」Evans沉默地點左一下頭，我繼續講：「一場老友，不如我陪你去搵佢呀，佢係咪同Miki住埋一齊呀而家，係我可以同你一齊殺上去架喎。」Evans聞言之後都係無乜反應，良久之後，佢先答我：「睇下點先啦，總之你好好處理你同Jasmine Daisy之間嘅事啦，唔好傷害到佢地呀。」呢一刻我覺得眼前嘅Evans又婆媽又懦弱，同佢果幅青年才俊嘅外表好唔襯。食完晏返到公司之後，Miki走埋黎同我講：「睇黎你有排煩喎，身陷喺三角中間，估唔到你咁利害喎。我估你都仲有排煩架啦，有時間唔好拎黎惹我啦，你慢慢諗下點樣呵返你個Daisy先啦。」睇黎Miki頭先係覺得我會因為Daisy而煩惱，所以覺得自己勝左一仗，但我估佢點都諗唔到我對佢嘅執念，一早已經超越左我對Daisy嘅思慕之情。我無應佢返左埋個位，我決定左無論點都好，我都要拉Evans去搵Laura，佢越唔畀Evans見Laura，我就越要畀呢件事成事。