今日我開始左對公司啲同事進行復仇大計: 第三十四章
Judy喺起Miki底一事上可以話係一啲用都無，不過當對象係Valarie之時，佢又出奇地快手做到嘢。根據Judy所講，Valarie喺香港無乜屋企人，係有個阿婆自己住喺公屋。佢地兩婆孫感情好好，想知道多啲Valarie嘅嘢可以試下喺佢阿婆身上入手，由於以前Judy有個ex曾經喺Valarie啱啱同個醫生老公離婚果陣幫過佢手搬嘢去佢阿婆屋企，所以Judy連佢阿婆地址都有埋。由於我太急於喺Sam姐有咩決定之前對付Valarie，所以我決定拎日假去探下佢阿婆。
根據Judy畀我嘅地址，Valarie阿婆係住喺九龍區一條舊式公屋屋村，我知道要上去應該唔太難，樓下嘅保安應該都唔會阻撓我。到我喺朝早大約十點幾去到果陣，我發現個看更竟然日光日白都無左影，我諗左好耐嘅籍口都用唔著。好快我就上到去Judy畀我嘅地址，我諗左好耐我應該用咩身份去埋阿婆身好，思前想後我決定扮係Valarie老公果邊啲朋友，因為喺外國返黎想了解下香港啲舊式屋村環境，所以先專誠去拜會佢。喺我去到地址上嘅單位門口，正準備撳鐘時，一個六十有幾，身體健壯嘅阿婆已經喺單位裡面開左門。佢第一句已經聲如洪鐘咁問我：「你又係我個孫女叫黎架？」由於佢問得太突然，我一時間黎唔切反應，唯有點頭扮係。喺未證實我身份之前，佢已經急不及待開左門拉我入去……
同我想像中嘅獨居老人唔同，我眼前嘅呢位阿婆唔只身體健壯，說話清晰，而且佢間屋仲打掃到一塵不染。喺入門口果陣我留意過個地下，我發現間屋除左有阿婆啲鞋之外，仲有幾對男裝鞋，而且仲似係後生仔著開嘅鞋，但Judy明明話過阿婆喺香港除左Valarie之外無人無物架……而且頭先阿婆問我係咪佢孫女叫黎果陣，佢有講到個又字，即係Valarie之前曾經派過某個人上黎，而且果個人可能都有喺度住。我以為眼前呢個阿婆喺請左我入黎之後，會當我係客人咁好熱情叫我坐低，之後拎一堆嘢出黎招呼我。點知眼前呢個阿婆喺叫左我入黎之後，只係由上到下打量我，之後自言自語咁講左句：「阿妹豬係有啲計仔喎，不枉我含辛茹苦咁養到佢，話咁快就搵多件後生仔上黎畀我嘆 。」我見眼前呢個阿婆好似唔係幾對路，想轉身就走人，但又覺得既然都一場黎到，我無理由一無所獲就走左去。所以我決定留低，我鼓起勇氣開口問：「婆婆……」
點知我一講左婆婆呢兩個字，阿婆就一巴車落我隻手度，佢好嬲咁話：「婆咩呀婆，婆你老母呀，我仲好後生架咋，叫我姐姐得啦。周圍啲人都叫我美美姐架，你都跟住咁叫啦。」「哦……」「點呀，你又衰啲咩喺我孫女手上，搞到要上黎服侍我呀下？」我聽到之後即刻退後兩步，原來阿美美婆婆以為我係受Valarie威脅所以要上黎做佢阿四。我思前想後左一陣，決定做場戲黎呃阿婆套下料。「無呀我之前為左助養多幾個細蚊仔，所以過左大海諗住博兩鋪，點知貪勝不知輸，欠下一身賭債，好彩有Valarie姐仗義幫手。一日都怪我太有愛心，太想幫到多啲人啦……」「得啦，慳返你啲廢話啦，即係你係爭阿妹豬錢，無錢還要上黎錢債肉償啦。」我聽到佢最後四個字之後即刻驚到叫左出黎，我即時答：「拿阿婆……呀唔係阿美美姐，此言差矣啦，我嘅肉償範圍剩係包幫你做下家務呀，修理呀電器咁架咋。」佢聽完之後一手拎起左枱上面嘅衣架係咁打我，估唔到佢幾十歲人都幾大力下，佢一路打我一路講：「而家係你條短命種爭我妹豬錢，你仲夠膽黎同阿姐討價還價，畀著以前你爭我錢唔還，我劏左你都仲得呀。」由於我唔可以還手，我唯有跪喺度哭求佢停手，佢見我都喊晒口咁，好滿意地放返低個衣架同我講：「都唔知妹豬喺邊識埋咁多打壞返黎架，我同你講呀短命種，阿姐我食慣好嘢架，你想掂我我都未必畀你掂呀。」我聽到之後大喜，好開心咁答佢：「多謝女俠饒命呀。」佢聽到之後又隨手拎起個梳一嘢掟埋黎，怒喝道：「乜而家要你掂我好難委你咩，而家啲後生一個二個都係咁未識貨，果件乜鬼梯拿又係咁，叫佢陪我訓好似叫佢去死咁。平時做嘢又鬼叫慢，我頭先叫佢落去幫我買支痔瘡膏買到而家都未返黎，陣間你幫我好好地搽呀。」雖然阿婆最後果句說話令我差啲嘔左出黎，不過佢口中果個梯拿如果我無估錯應該係Taylor，究竟Taylor條友衰左啲咩喺Valarie手上搞到佢要上黎做奴隸呢？為怕陣間真係要幫阿婆搽痔瘡膏，我決定等Taylor一返到上黎就拉佢出去將呢件事查過究竟。
喺Taylor未返到上黎之前，為怕阿婆等唔切要我服侍佢，我唯有主動話幫佢洗廁所以拖延時間。入到廁所果陣我本應想即刻反鎖度門等Taylor返黎先開，點知仆佢個街佢度門原來係無鎖架，咁我唯有硬住頭皮幫佢刷個廁所啦。刷刷下我感覺到有隻手喺我背脊到慢慢咁上下移動，正當我控制唔住自己打算拎起個鮑魚刷轉身就車埋隻手個主人度果陣，我聽到開門聲，估唔到Taylor成為左我嘅救星。Taylor一開門行入黎見到我嚇到目瞪口呆，我一手推開左企住喺廁所門口嘅阿婆，之後就衝埋去Taylor度諗住拉佢走。阿婆見狀即刻拉住我唔畀我走，佢大聲叫：「短命種你想逃走，信唔信我叫妹豬起你釘呀拿。」喺同阿婆糾纏期間我忍唔住大喝一句：「你仲唔放手，信唔信我遲啲幫你起棺材釘呀拿。」阿婆畀我嘅霸氣震攝左即刻放手，佢開始坐左喺地下扮死狗，佢喊住咁講：「阿婆幾十歲人你都恰，你個短命種不得好死呀。」我聽到之後即刻扯火，拎返起佢頭先掟我個梳黎掟佢，之後指住佢大聲講：「我就算不得好死你都唔會見到啦，相反你就就黎時辰到啦。」講完之後我就拉住Taylor行出去，但Taylor好似唔係好敢走人，我就同佢講：「唔洗怕呀，而家我又有Valarie痛腳喺手，我可以照住你呀。」佢聞言之後，行返埋去吐左啖口水落阿婆度之後就跟住我走左。
我同佢一直博命咁跑，直到去到村口果間士多先停低。驚魂未定嘅Taylor仲一路問我係咪真係可以幫到佢，雖然我根本無咩把握，不過我當然呃住佢話我一定可以照住佢先啦。之後我喺士多度請佢飲左枝汽水，諗住等佢將佢同Valarie啲嘢一五一十咁話畀我知。點知佢話佢而家好亂，佢想返屋企休息下，之後聽日再黎搵我話我知。我睇佢個樣都應該一排無返過屋企，再加上佢而家有求於我，我唔怕佢會走左去唔話我知，所以我就放左佢返屋企。由於頭先太過驚險，其實我自己都有啲受驚，所以我喺附近藥房買左盒保嬰丹，打算啪完之後返屋企訓陣先。