今日我開始左對公司啲同事進行復仇大計: 第三十五節
喺尋晚，一臉驚慌嘅Taylor去到我屋企樓下求我救佢。由原本佢仲打算今日先黎搵我，定突然之間佢又改變主意連夜走黎求救，睇黎之前佢真係畀Valarie玩得好甘下。由於佢怕Valarie會搵到上門，喺佢苦苦哀求之下，我將佢安頓左喺旺角嘅一間賓館度。一上到去果間賓館啲工作人員都出晒黎同Taylor打招呼，細問之下原來呢度係Taylor以前嘅炮房黎。見到佢帶住我上黎，出面櫃台個阿姐細細聲問佢：「嘩張生無見你一排，轉左機黎咩？」而一臉惶恐嘅Taylor都無心情同佢講落去，好快就拉左我入房度。「我都知你之前受左好多苦，不過唔等於我會慰藉你架。」我試圖用講笑黎緩一下氣氛，點知佢呆左坐喺張床度無乜反應。我之後問多佢幾聲佢都係好似充耳不聞，喺度神遊太虛咁。我見咁落去就永遠都唔會知道我想知嘅嘢，所以就拉左佢起身之後一巴車去去度。佢畀我車完之後眼泛淚光，我無因此而停手，我指住佢鬧：「你係咪男人黎架，畀個女人仔恰到上心口都唔諗下點反擊，剩係識得逃避。好啦我而家出埋錢畀你逃避啦，但你都起碼話我知發生過咩事，等我可以幫你對付Valarie架。」Taylor聽到Valarie個名之後好似撞左邪咁，好驚咁坐返喺張床度想匿入張被，我嬲起上黎繼續鬧佢：「好呀，你唔講呀嘛，我而家就打畀Valarie叫佢上黎對質。」Taylor聽到我咁講即刻跪左喺度，佢一邊痛哭一邊話：「好啦，我講啦，不過你一定要幫我呀。」我聞言之後點一點頭，呢個時候Valarie竟然打畀我……
我叫Taylor等陣之後就行左出去聽個電話，Valarie劈頭第一句就話：「你知唔知你擅闖入我婆婆屋企，仲整親埋佢，我可以報警拉你架。」我聽到之後笑左一笑：「咁你又知唔知非洲禁錮好大罪架，再加埋人身傷害呀勒索呀……唔知如果你件西人洋腸知道你喺阿婆收埋左件好嘢佢會點諗呢？」Valarie聽到之後靜左一陣，佢之後話：「你好嘢呀，連Judy都企埋喺你果邊，不過我同你講阿Kate個位我坐硬架啦，到時你等住畀我慢慢玩啦。」講完之後佢就cut左線。雖然我未知道成件事嘅來龍去脈，不過我估我頭先講果啲禁錮呀勒索呀都應該中晒架啦。我轉過頭返返入份果陣，發現Taylor竟然唔見左。佢喺床上面留低左封信，信中大意係佢唔覺得我係會真心保護佢，所以佢都決定自己走佬去保護自己。不過佢都有喺信中略略咁寫到Valarie對佢做過啲咩。佢提到喺出去飲嘢果晚當大家都以為係Valarie飲醉畀Taylor帶走果陣，其實Valarie係扮醉嘅。Valarie之後畀左個地址叫Taylor送佢去，Valarie聲稱果度係佢朋友屋企。喺同Taylor搞完之後，Valarie就突然扮酒醒，佢之後仲指控Taylor借醉強姦左佢。Taylor當然係想走啦，點知喺隔離房走左兩個黑人大漢將佢制服，Taylor為怕Valarie真係報警，佢就提出佢肯答應Valarie嘅所有要求。Valarie同果兩個黑人大漢見狀即刻拎左幾支酒出黎，話因為Taylor之前灌醉左Valarie，所以佢地都要灌醉返Taylor，點知喺Taylor醒返之後，Taylor發現自己同果兩個黑人大漢都無著到衫，而喺一旁嘅Valarie就聲稱自己手止有一餅帶係詳細紀錄左Taylor飲醉左之後同果兩個黑人住嘅事，Valarie仲聲稱如果餅帶流出左佢包保Taylor呢一世都唔洗再出黎見人。就係咁Taylor就不斷畀Valarie威脅住做左好多嘢，包括服侍Valarie阿婆呀，幫Valarie跟蹤人呀咁……至於跟蹤咩人，Taylor就無喺信度提及過。由於我都唔知Taylor去左邊度，所以我唯有返屋企再慢慢思考下成件事係點。
到左今日返到公司，我由於尋晚一夜無眠，所以就變左最早到公司果個。我趁未有人返到果陣行左去Valarie個位度想搵下有咩線索。點知我背後突然有人將啲液體淋左喺我個身度，啲液體果種臭味大家去親公廁都會聞到。我雖然覺得十分反胃，但我更加擔心我背後嘅人會有咩進一步行動。喺我未黎得切擰返轉頭果陣，我聽到公司大門門口傳黎左一把熟悉嘅聲音喺度驚叫，而果把聲音係屬於Daisy嘅。到我擰轉頭果陣，我見果個手住膠樽嘅背影好似行緊埋去想對Daisy同緊接喺佢後面嘅Miki不利，呢個時候我都無時間去理呢個人究竟係邊個，正想衝上次救駕嘅時候。同Miki Daisy一齊返黎嘅Evans比我早一步英雄救美，佢一個箭步擂左喺Miki Daisy前面同果個人影正面交鋒。不過果個人影無同Evans糾纏，佢只係好大力咁推開左Evans之後就落荒而逃。Evans想追上前不過畀Miki拉住左，而一身都係尿嘅我，喺果刻除左英雄救美不成之外，亦猶豫緊好唔好追上去好。我果刻好肯定呢個人係衝住我而黎嘅，如果我落單果陣佢又藏有啲咩攻擊性武器的話，我都唔知點算。呢個時候Daisy好似想行埋黎睇下我點，不過佢應該係聞到我身上果陣尿騷味，所以佢同樣都係猶豫緊過唔過黎好。為免要大家尷尬，我主動開聲話：「我無事，唔洗擔心，你地有無嚇親呀？」佢地都搖搖頭，但好明顯大家都係驚魂未定，就連平時一向淡定嘅Miki都畀頭先件事嚇到有啲呆滯。我之後問佢地有無見到頭先果個人係邊個，定佢地都異口同聲咁話唔認得。由於我成身尿味，喺其他人陸續返到之後Evans車左我返屋企沖涼換衫。喺車上面果陣，我收到Miki嘅whatsapp，佢同我講佢其實見到頭先果個人係邊個，佢話頭先果個人雖然戴晒黑超同口罩，不過佢幾肯定果個人係大明黎…..如果係大明佢懷恨在心襲擊我其實又唔出奇，不過喺尋日我同Valarie衝突完之後佢就突然出現，時間性又未免太巧合。而Valarie以前同大明都叫有兩句幾friend下，我開始懷疑係Valarie指使大明黎整我。當我諗通左呢一點之後，我就比較安心左啲，當Evans問我要唔要報警果陣，我拒絕左佢，因為我認為如果呢件事涉及左警察調查，將會變得相當麻煩。
喺畀人淋到一身尿之後，大多數正常人應該都會為左自己安全著想，唔再搞咁多嘢。今次就話畀人淋尿姐，但下之容乜易係畀人淋啲腐蝕性液體架，再加上如果淋我尿果個真係係大明的話，佢應該對我恨之入骨，畀Valarie說多兩咀，真係拎把刀黎劈死我都唔出奇。喺尋日返屋企沖涼換衫果陣，我好迷茫，係咪應該為左自己人身安全就此收手呢？我足足沖左接近個半鐘涼，除左係因為我洗極都覺得我髮端之間嘅尿味揮之不去外，最大原因係我無勇氣行出廁所面對個世界。我如果而家黎放棄的話，我之前做嘅嘢就功虧一簣，試想下如果我唔係因為為左世界和平懲罰班賤人同事的話，我一早已經同Daisy開始左發展啦，如果順利嘅話，好可能而家已經進入左談婚論嫁嘅階段。諗到呢一度，我嘅不忿戰勝左我心入面嘅怯懦，我決定將軟弱留返喺個廁所入面，當我陣間返返公司果陣，我唔可以畀其他人知道我有幾驚，特別係所有敵人。
喺lunch time完左之後，著住一身Armani 黑色西裝嘅我喺眾人驚異目光之下再次喺公司出現。有人話西裝係男人嘅戰鬥服，既然我要去繼續同公司班賤人戰鬥，呢身行頭唔少得。平時返工都係求求其其嘅我仲專登gel好個頭，仲借埋阿妹男朋友放左喺我屋企果對意大利手製皮鞋黎著。Valarie見到我好似無事咁返黎之後好似有小小驚訝，不過轉過頭佢就無再理我繼續同果個唔知Katy同Kathy講當晚會帶佢去某間高級餐廳同朋友晚膳。我心入面暗地裡記低左間餐廳個名，我準備親自到場去娛下賓贈下興。Daisy同Evans見我返左公司之後有走埋黎問我有無事，我雖然猶有餘悸，不過礙於面子問題我當然話我無事啦。好返就到左放工時間，走果陣Evans怕我落單問洗唔洗車我返屋企，但由於我準備要去為Valarie助興一番，所以我婉拒左佢嘅好意。
放工之後我即刻去到果間位於中環嘅高級餐廳，雖然一個人喺呢啲高級餐廳食飯好異相，不過我要為自己出返一口氣，所以畀人笑就畀人笑啦。由於我今日著到身光頸靚咁，所以就算我係Table for one，啲waiter都無乜點留難我。我坐左喺一張可以望到門口嘅枱，方便我一見到Valarie同佢老公入到黎我就可以恃機而動。不過好快我就遇到第一個難題，呢間餐廳除左點菜要同waiter講英文之外，連個menu上面全部都係英文。我一見到咁本身真係怯一怯，不過好彩而家啲smartphone好犀利，除左可以幫我即時翻譯到之外，仲會教埋我點讀。但有個小小問題，就係部smartphone唔識幫我聽英文，所以喺個waiter問我嘢果陣，我咩都剩係識點頭。就連佢拎左支要千幾二千蚊嘅house wine出黎問我試唔試果陣，由於佢係用英文問我，所以我都剩係識點頭話好。而又由於我嗌左steak黎食(因為個steak字易讀)，我預計到佢會問我食幾成熟，所以我嗌果陣就同左佢講50% burn steak，個waiter雖然好似聽到一頭無緒，不過佢都係點頭無追問落去就走左。好不容易捱過左點菜過程之後，我就見到我嘅目標人物Valarie出現左，不過同佢一齊出現嘅既然唔係佢件洋腸老公，而反而係果個出左家嘅醫生前夫，個醫生前夫雖然仲係光頭，但睇到佢一身打扮，佢好似仲還左俗。
佢地喺我遠處坐低左，當時佢地好似未見到我。喺一旁嘅我留意左佢地嘅神態好耐，雖然佢地無乜親暱舉動，不過見到佢地兩個互望嘅眼神含情脈脈，如果話佢地無路我就真係點都唔信。過左一陣我支wine黎到之後，我就拎起左支wine行埋去佢地張枱……
「嘩Valarie呢個世界真係細，估唔到咁都畀我撞到你喎。喂乜你老公唔係洋腸黎架咩，點解呢位先生係中國人黎嘅。喂唔係喎望真啲，原來你係佢之前個老公黎，乜你唔係出左家入左少林寺練童子功架咩？畀方丈知道你唔係童子所以踢左你走呀？」Valarie見到我雖然略顯驚訝，不過佢又無我想像中咁意外。反而阿光頭醫生畀我一輪搶白之後，就有啲尷尬。佢話：「我果陣諗唔通啲嘢短期出家姐，而家我都返左出黎執業架啦……」Valarie目無表情咁望住我，好似期望我會自己行開。而我就完全無視佢，同阿光頭醫生講：「出完家之後即係可以犯酒戒啦，我嗌左支酒飲唔晒呀，不如一齊飲啦，好嘢黎架。」講完之後我就高呼waiter同佢地講：「I change table to here, give me glasses and chair」在場其他貴客聽到我啲地道英文之後均為之側目。而我就笑騎騎唔理Valarie反應坐左落黎……
「係呢Valarie姐姐呀，點解唔見你個洋腸未婚夫嘅，你約會舊情人佢會唔會嬲架。」Valarie聞言之後理都唔理我，一路喺度玩電話。我擰轉頭同阿醫生壓低把聲，但又知道Valarie都一定聽到嘅聲線講：「喂你係咪傻架，上左山之後都未看破紅塵咩？明明脫離左魔掌，而家你又想返返黎？唔好呀，我係你就寧願食長齋啦。」「我地出黎聚下舊姐。」「小心啲呀，飲大兩杯之後就好易出事架啦，Valarie姐啊？」Valarie聽到之後怒啤住我，終於開聲講：「你可唔可以埋單走人呀？我地有啲嘢講。」雖然Valarie已經講到咁唔客氣，不過唔代表我就就咁行開。我同Valarie講：「如果我唔走又點，你會唔會搵兩個黑人大漢黎的我走呀嘻嘻。」Valarie聞言之後話：「你唔走都無問題，我叫Waiter送你出去啦，而家我覺得你阻住我食飯呀。」我聽到之後嬉皮笑臉咁話：「好啦我走啦，聽日見啦。喂張單你唔介意幫我埋埋架呵呀Dr.光頭佬?正所謂醫者父母心，老豆請個仔食返餐你唔會托手踩架下話。」一臉尷尬嘅光頭佬無奈點頭，而我就好開心咁揚長而去。