今日我開始左對公司啲同事進行復仇大計: 第四十節

喺尋晚放工，我預左阿Kate出去食飯。喺未知Sam姐呢一刻究竟搞緊咩之前，我認為阿Kate會比Sam姐有利用價值。由於我本身同Kate姐真係話熟唔熟，我又喺咁短時間之內約佢去食飯，我本身以為佢多數會拒絕我，不過或者係人皆好奇啦，所以阿Kate都係有應到約。為免畀其他同事撞到，我地專登去左啲非旺區地方食飯，但又因為我而家係同Miki有合作關係，我又有一樣安排需要用到佢，所以我都有話左畀佢知今晚嘅我會同Kate黎過晚飯之約。當同阿Kate坐低左之後，佢比我更加心急，喺求其點左啲嘢食(真係好求其，佢望左個menu都唔夠三十秒就求其點左幾樣嘢)之後，佢就單刀直入咁問我：「你搵我究竟係咩事？我都就黎唔係呢間公司嘅人，我諗我幫唔到你啲咩架喎。」佢嘅快人快語省卻左我好多麻煩，我本身仲擔心同佢要傾啲咩黎做開場白，因為我對佢真係無乜認識，再加上我又驚講錯嘢得罪佢。既然佢咁直接問到，我即時答佢：「我知道你點解要辭職，而且我亦知道左係邊個喺背後想整走你。」佢聽完之後大吃一驚，不過佢都盡量扮到平淡咁話：「我唔知你喺邊度聽左咩流言啦，不過今次我走單純係自己決定……」由於我知道如果我唔盡快講啲嘢黎停止佢嘅　bullshit，佢將會遊花園遊好耐，我用好肯定嘅語氣同佢講：「係Valarie向某人嘅太太報你串架，呢件事係Sam姐叫我幫佢查，而且我都有方法去證明。」我當然唔會神奇地變到啲證據出黎啦，所以我嘅所謂證據其實都係將啲半真半假嘅嘢混為一談，再加埋其他人嘅證言配合，但其實到最後，我都係買一鋪大細，不過我相信自己贏面應該都係大，因為我覺得真兇又真係我估果個。我同阿Kate講：「你唔信可以叫阿油喺佢部電腦度搵返啲蛛絲馬跡你睇，而且阿輝呀Miki呀Judy呀佢地都有聽到Valarie曾經周圍打探你果位高層個太太嘅嘢。」由於我相信呢啲醜事阿Kate都應該會係寧被人知莫比人見，佢唔會走去周圍同人求證，更況且我相信我口中嘅人都會配合我。所以我亦都叫左Miki同定阿油講，叫佢諗方法偽造啲證據出黎，等到時阿Kate真係要求證我地都可以有嘢畀佢睇呀嘛。

 

喺沉默左一陣之後，阿Kate問：「我點知你地係咪夾埋想整走Valarie…..」我聽到之後即刻從容不迫咁答：「乜你覺得以我喺公司嘅人緣，同Valarie相比，啲人會選擇幫我唔幫佢咩？就當Judy同佢而家係勁敵啦，但Judy咪一樣咁憎我，我同Valarie一樣都係佢嘅對手黎架咋。」佢聽完又沉默左一陣，佢之後再問：「你初初點解會懷疑係Valarie做？」呢個問題係好關鍵，對我黎講亦都係好危險，因為我將會又買多鋪大細。仲記唔記得果晚飲嘢之際，阿Kate喺接到個電話之後就早走，雖然我唔知個電話係邊個打黎，不過以我推論就應該係果位已婚男高層啦。所以我諗左一個應該係最make sense嘅故仔出黎，我答佢：「喺你出完trip返黎果晚，我地去左飲嘢果陣，你收到個電話之後走左無耐，Valarie都跟住走左，佢果晚應該就係喺跟蹤你果陣搵到證據。」阿Kate一路聽一路露出恍然大悟嘅神情，睇黎佢都算buy我呢套講法。我繼續講：「我知道你就走，決定邊個做繼任人亦都唔係由你話事。我專登約你出黎講亦都唔係出於好人想你死得眼閉。我好老實話你知，我講畀你知係想跟你把口傳畀果位男高層，至於你講唔講，唔係我可以控制。」我一路講一路留意阿kate嘅神情，我睇得出佢好明顯有啲忐忑同不知所措。跟住餐飯好快就食完，因為大家都知道已經完成左呢餐飯嘅重大任務，喺臨走果陣，阿Kate同我講：「其實我一直懷疑係你做，因為當年將呢件事唱開走果個係你。不過經我觀察之後，我覺得你無必要對付我，你頭先講嘅嘢我會慢慢考慮下，點都好，多謝你。」原來呢個女人都慒唔晒。

 

喺今日返工之前，有一個人一早返左公司等我。呢個人就係去左澳門一轉，差啲返唔到黎嘅阿油。佢一見到我就指住我話：「你個人渣呀，你唔驚我畀人斬死架咩？」我強忍笑意，扮晒無辜咁話：「當時Miki打黎同我商量點樣救你，但我同佢得幾皮嘢喺身，果日銀行又無開。我地諗過求助於Evans架，不過你知啦，Evans知即係公司知。更何況如果Evans真係肯出手幫你，到時Miki一定會當正佢係英雄架。所以我先忍痛要你喺果邊留多日，果班人有無要你錢債肉嘗呀？」聽到我講最後四個字果陣，阿油突然淫笑左一下，佢用把猥瑣語氣話：「佢地知我星期一過到黎就有錢畀佢地之後，果個炳哥又見你條仆街咁對我佢唔只帶我去食豬扒包，佢仲帶我食葡國雞呀。」講葡國雞三個字果陣，佢同我打眼色，好似驚我唔明當中含意咁。我即時話：「哦，你死啦，走去學人叫雞，信唔信我報你串畀Miki呀？」佢聽到Miki個名之後，一臉春風得意咁同我講：「尋日Miki知我返黎之後，專登黎左探我呀，你都唔知佢幾緊張呀。喺by the way，Valarie單嘢我會幫手諗計架啦，多謝你幫我睇住Miki喎，估唔到你條仆街雖然又口賤又衰格，但有喺事上黎都幾有義氣，第日我同Miki生左仔之後最多畀你做契爺啦。」我一路要忍住笑聽佢喺度自吹自擂真係好辛苦，如果唔係有求於佢，相信Miki對阿油哥嘅關心都只係知道佢嘅死活就夠。仲話咩第日生仔喎，如果佢真係同度Miki生仔，我做個BB嘅契弟都無所謂啦。喺臨講完之前，阿油仲有個驚喜畀我，佢竟然拎左啲澳門手信黎畀我。嘩畀貴利挾返香港都仲有閒情去買手信，阿油哥都算係高手，睇黎我放心將佢畀啲紋身大漢看管左一日，仲可能令佢識到啲新朋友，我都算係日行一善呀。