今日我開始左對公司啲同事進行復仇大計: 第四十二節
「你信唔信呢個世界有報應架？你好快就會信架啦。」再次喺我面前出現嘅大明輕描淡寫咁講，呢一刻嘅我被佢鎖左喺公司嘅雜物房入面，被迫同佢共處一室，自從上次同佢喺酒店房一別之後，我已經一排無見過佢。我原本以為佢唔會咁快搵我搵到上門，點知佢喺尋日搞完阿輝之後，咁快手已經到我。至於點解我會同佢共處一室？事緣就係咁嘅，我經過尋日件事之後，今日返到公司一直都心不在焉，我心不在焉嘅程度係去到我都唔記得左自己點解會被阿明鎖左喺呢度，係喎，點解架呢？正當我想開口問之際，阿明一腳踢左埋我度，我正想反抗之際，先發覺自己原來被佢綁住左。雖然被佢踢左一腳係好痛，不過我好努力咁回想今日究竟發生左咩事黎呢？我印象中自己好似喺臨放工果陣我被Sam姐叫我留喺度OT幫佢做啲嘢，之後喺所有人走晒之後，我見Daisy枱面有杯奶茶喺度，我以為係食tea果陣佢買多左，見飲得唔好晒我就飲左杯嘢，但飲左杯嘢之後，到而家就好似斷左片咁。唔通係大明喺杯嘢度落左藥？不過佢都無機會入公司，唔通係Valarie同佢裡應外合？雖然我好想問佢點解，不過我知佢一定唔會答我之餘，佢仲會踢多我一腳。正當喺我努力思考之際，大明無端端哄埋我度，睇佢神情佢睇黎精神非常之唔穩定，睇黎上次單嘢佢真係畀我玩到痴左線咁。佢哄埋黎望左我一陣之後，佢突然之間瘋狂大笑起上黎，佢一路笑一路講：「你係咪好驚呢？我對阿輝都玩到咁狠，你係咪覺得我對付你只會更恨咁呢？」無錯，我唔只係好驚，仲係好撚驚，不過就算幾驚都好，我都要扮鎮定，我鼓起左勇氣大返佢轉頭：「你以為你綁左我就有用咩？你以為你鎖住我喺度你就可以為所欲為咩？所以話人蠢真係無藥醫呀，唔洗好耐就會有人黎搵我架啦哈哈哈哈。」我努力企圖用笑黎掩飾我嘅恐懼，點知大明個癲佬見我笑佢又笑埋一份，笑笑下佢又一腳踢左埋黎。
佢今次用力咁踢落我個肚度，我痛到即刻笑唔出，仲差啲叫救命，不過我知就算叫救命都無用，仲反而會透露左畀佢知我而家係幾無助。大明走左過黎一手扯住我啲頭髮，之後又哄左塊面埋黎咁講：「你條友唔好扮嘢啦，你都無朋友嘅，我喺度殺左你都無人會搵你啦。」雖然頭先畀佢踢左第二腳之後，我痛到標眼水，不過我都係為左畀佢以為佢唔係掌握晒全局，我唯有繼續扮有計，我好辛苦擠出左個胸有成竹嘅神情，同佢講：「今時唔同往日啦大明，自從無左你條廢柴喺度阻頭阻勢之後，我同啲同事不知幾咁friend。新黎果個少爺仔呀，直頭當左我係佢黃紙兄弟咁呀，呢啲嘢你條擦鞋仔恨唔到咁多架啦，我平時開親OT佢地都會買宵夜返黎探班嘅，佢地好快就會上黎架啦。大明，唔好話我話你呀，你成日覺得自己係世界仔好識撈呀，挑，呢啲係你自己覺得架咋，你個人一啲性格都無，剩係得衰格，你見我而家都完全唔驚你就知啦。你最多咪好似尋日咁，拎碌木搞我後門咋嘛，你條友咁無創意，又無guts，慌你夠膽殺左我咩。」為左唔好畀佢看穿我有幾恐懼，我故意串返佢，其實我心底入面真係驚佢癲起上黎會殺左我，所以最後果句我係專登講黎試探佢反應。佢聽完之後若有所思左陣，就轉身行左出去。隱約間我聽到佢係應該出左去講左個電話，講完之後佢入返黎望住我諗左一陣，我見佢一開始有啲苦惱，但好快佢就開始奸笑起上黎，睇黎條仆街九成係諗到啲咩毒計打算拎黎對付我。佢走返埋黎同我講：「係呢，你係咪好鍾意果條Daisy架？」我聽到佢提到Daisy之後即刻心頭一震，正當我想否認之際，大明露出左一個非常下流嘅笑容。佢再哄埋黎同我講：「唔洗唔認啦，其實你唔洗咁驚喎，我同你仲有排玩呀，我今晚本身都唔諗住對你做啲咩嘅，我都好快走架啦，你唔洗驚呀。不過呢，你個Daisy就無咁好彩啦」
聽到佢咁講之後，急怒攻心正打算撲上次咬佢，不過睇黎佢早有防備，佢講完之後縮得非常快，佢縮開之後連隨又補多腳，今次佢呢一腳真係踢到我差啲吐血，我忍唔住訓左地下度呻吟。佢踢完我之後笑得好大聲，佢之後扯住我啲頭髮話，格硬迫我望住佢話：「睇下你呀，一講起Daisy就發晒矛咁。仲想扮唔係鍾意佢，我可能同你講下笑姐，我未必真係會搞佢架嘛，係咪？我想搞佢都搞唔到啦，我畀你玩到我唔敢再扑嘢架啦。」講完之後佢又開始狂笑，一路笑佢啲口水就噴晒落我度，笑到咁上下，佢繼續講：「不過呢，我搞唔到姐，不過我可以搵人搞佢架係咪？你唔洗咁驚喎，我講個可能性你聽姐，未必係真架嘛，係咪？」喺又驚又怒之下，我差啲又忍唔住想鬧佢，不過我剩餘嘅理智話畀我聽，我一定要迫自己保持冷靜，我深呼吸左一下之後，問佢：「你雖然係性無能姐，但你都仲要生活落去架嘛，乜你唔驚我之後會報警咩？」佢聽到之後，冷笑道：「你咪報囉，不過你覺得警察會信你咩？我果陣畀你玩左鑊之後，都打算報警拉你條仆街架，但正當我想打999之際，我問自己，我究竟應該點同警察解釋發生左咩事。如果你之後諗到點同警察講，又覺得佢地會信你，你咪即管講囉。我都唔怕同你講呀，就算之後畀人拉左我都唔緊要。對我黎講，怕左扑嘢真係慘過去死呀，我而家都係活死人黎架啦，我唔怕坐監架。不過，我而家暫時仲未玩夠，仲未可以去坐監住，喺畀你玩完，我睇左幾個醫生之後佢地都話唔識醫我之後。我就開始plan點樣去對付你地班人渣，你而家諗到嘅嘢我一早已經諗到。到就算你想報警，警察要搵到我都唔係咁易架。」喺講完呢番說話之後，佢又開始笑得好開心。我都唔明白，只不過係性無能姐，但呢條友又發到件事咁大，講到不惜坐監都要報仇咁，而家啲人真係鍾意小題大做。
佢笑完一陣之後，又開始講：「喂你唔洗扯開話題扮唔緊張Daisy啦，我繼續講下啲可能性你聽啦……」「得啦唔洗講咁多啦，你條友咁無創意，仲要係不舉嘅，你仲可以做咩姐？都不外乎係搵人打佢呀姦佢呀咁。唔洗講啦，一陣有人上黎救左我之後，我就會即刻知道佢發生咩事。你條仆街好快啲走呀，如果唔係一陣有人上黎即刻報警拉左你之後，你就咩都唔洗搞，慢慢入到去被班倉友搞啦。」點知佢聽到之後又開始開懷大笑，笑左好耐之後佢先話：「講樣嘢你知呀，聽完你一定會覺得我好有創意架。你信唔信呢度係我專登整到同公司個士多房一模一樣，但呢度其實唔係喺公司度架呢？如果呢度唔係喺公司黎，你果個一心等救兵嘅計劃咪涷過水囉？」不得不承認，我真係無諗過佢有此一著，不過對我黎講其實都無乜分別，本身話咩等救兵嘅計劃其實都係單純用黎大佢。不過如果呢度唔係公司黎又會係喺邊呢，為左爭取時間去思考同應變，我唯有講啲廢話去爭取時間，我同佢講話：「挑，咁樣叫有創意咩？咁樣叫多次一舉咋，不過你係不舉嘅，我係咪應該話你多此不舉呢。拿，等我話你知咩叫創意啦，你而家即刻放左我，仲要畀五舊水我坐車就叫有創意啦……」大明聽到我講廢話不單止無嬲，佢相反仲笑得好開心。佢笑笑口咁話：「而家諗唔到自己喺邊唔緊要呀，你有一晚時間去諗呀。」講完之後，佢又開始陰陰咀笑，佢喺我耳邊講：「你今晚仲可以慢慢諗住Daisy究竟會受到咩遭遇呢？剩係諗住呢樣嘢，都夠你不安同難受啦哈哈。可能喺你被我囷喺度果陣，佢畀緊成十幾二十個麻甩佬招呼緊呀。不過你只可以喺呢度乾等，唔會知道實情係點，想救都救唔到呀。你記住呀，佢今日發生嘅所有事呀，都係你一事做成，佢有咩事都係被你害到咁架，你要負上全責架。」講完之後，佢又行左出房，過左一陣之後，佢拎左啲嘢入黎……
佢出左去原來就係為左拎部notebook，佢將我的左起身安置左喺張櫈度，為左確認我唔會郁到之後，佢仲將我連人帶櫈綁住左喺碌柱度。之後佢又拎左張櫈將部notebook放左喺我面前，之後搞左一輪，佢擰轉頭同我講：「今晚流流長，我仲準備左啲根嘢畀你慢慢睇，部notebook而家夠電播七八個鐘架，你慢慢欣賞啦。放心啦，聽朝早我會黎放左你架啦，啲時間好快過架咋，你慢慢享受下啦。」講完之後佢就行左出去，與此同時，部電腦開始播片啦，正當我以為佢會播啲咩變態片黎折磨我之後，我呆左一呆，仆你個街，竟然係蒼井空黎嘅？我知啦，佢梗係要我一路聽咸片，但又唔畀我打飛機黎折磨我，佢都算陰損啦。不過都好，好過佢播埋啲唔知咩片黎將我精神污染，咁我見都無嘢做，又甩唔到身，咪唯有睇下咸片黎解悶囉，谷住咪谷住囉，呢個時候我需要啲嘢黎分心，等我唔好諗住Daisy。正當我睇左套片睇左大約十分鐘之後，開始入到戲肉之際，我都開始左有啲生理反應，但正當慶起之際，鏡頭突然一轉，我眼前嘅蒼井空變左某位老牌女歌手，而個背景亦都由睡房變左做演唱會現場。我眼前嘅女歌手開始用把猶如鬼哭神號嘅聲線唱：「祈求天父，做十分鐘好人……」原本正喺度陶醉喺蒼井空對美乳嘅我，一下子由天國跌到落地獄，可能係我唔識欣賞音樂啦，我聽到呢首歌個頭就開始痛，但耐何我全身畀人綁住，連想掩耳都做唔到。如是者，喺唱完之後，個畫面又會開始去返播咸片，但到左咸片入面啲前戲完左之後，佢又會開始播歌，但啲歌全部都有個共通點嘅，就係啲歌都係香港樂壇入面比較另類同難接受嘅歌曲，但唯一嘅小小安慰就係，當中夾雜左幾首我偶像Tommy仔嘅歌。
原來睇咸片剩係睇前戲真係一件好折磨人嘅事，同大部份嘅男人一樣，平時大家都係fast forward去到戲肉，所以我根本無諗過原來咸片都可以有劇情架，而且有啲咸片製作仲要幾認真，啲編劇應該真係花過下心思，不過我而家當時無心情去欣賞啦，好快喺習慣左眼前影像嘅pattern之後，我就開始放空心思去思考一下而家應該點樣脫困。由細到大，睇啲電視劇呀電影呀漫畫呀，主角畀人捉左之後，都總有方法可以甩身走人。不過原來喺現實中，無計就係無計，我喺諗左好耐都搵唔到脫身良方。而原來喺現實之中，同樣唔會發生啲主角嘅朋友巧合地救左主角嘅情節，啲中狀元救老母，時間啱啱好嘅事情，同樣地無喺我身上發生。喺漫漫長夜入面，我就算點努力逃避都好，我都係不可避免地會諗起Daisy。喺知道大明點對付阿輝之後，我真係信佢咩都做得出，諗喺Daisy因為我而家正可能身陷險境之際，我開始後悔自己一直以黎選擇搞咁多嘢都唔佢好好地相處。一念天堂，一念地獄，如果當初我收左手開始追佢，我同佢而家可能仔都有個……呀好似又唔係，應該未咁快生到仔住。不過如果Daisy真係有咩事，我一定會幫佢報仇，而就算佢無事都好，我都會幫佢報仇。諗下諗下我又由諗點樣脫身同點救 Daisy，變左點向大明報復。佢而家都畀我搞到不舉，如果我可以令佢再舉得返起之後，又搞到佢不舉多次就正啦。不過點樣先可以妙手回春呢？可能女人搞佢唔起，但男人得呢。正當我諗得興起，我望一望電腦個鐘，原來已經不經不覺過左幾個鐘。呢個時候大明入返房度，佢手上拎住杯嘢，佢咩都無講就灌我飲左杯嘢，而喺飲左杯嘢無耐之後，我又開始不省人事。