今日我開始左對公司啲同事進行復仇大計: 第一節

事緣我早排差唔多得罪晒全公司啲女同事,畀人杯葛左成個月,返工返到好似變左透明人咁。

 

我唔係未試過向佢地道歉認低威,我試過拎打西餅打算同佢地和解,點知佢地無人理我，搞到我要自己食晒成打西餅。平時喺公司佢地又完全唔會同我講野，係有時公事上被迫過黎先會講兩句,佢地仲會盡量簡短咁同我講。

 

經過左呢個月，我終於明白左人善被人欺呢個道理，我決定要各向佢地所有人報仇，我唔會畀佢地好過。





 

我第一個復仇對象，就係坐我隔離做admin果個矮妹Daisy。之前因為唔小心話佢似哈比人而得罪左佢，自此之後佢就一直當我係透明人咁，返工我同佢打招呼佢都唔多理我。

 

Daisy返工有一個壞集慣，佢可能以為自己坐死角位無乜人會為意，佢一日到黑都喺度上Facebook同玩電話。有見及此，我今日返工專登拎左個 stopwatch返去。由一朝早返到去開始，我每次見到Daisy唔係做緊公司野果陣，我就會拎起個stopwatch，喺佢側邊一路計時一路望住佢陰陰咀笑，到佢停果陣我就會大大聲報返個時間出黎。可能你地會奇怪我點解唔拎電話黎計時算，不過我覺得傳統stopwatch先會營造到個壓力出黎。

 





佢初初都想好似平時咁無視我，但如是者過左幾次之後，佢終於忍唔住話佢喺公司做乜關我咩事。今次我調返轉唔答佢問題，只係陰陰咀笑住咁返返自己個位。之後我會拎本簿仔出黎寫，一路寫一路讀出佢喺咩時間做過啲咩。

 

玩玩下佢終於忍唔住走去同其他同事行入pantry打算訴苦，點知我拎住個stopwatch跟埋佢地入pantry，佢地無計之下唯有被迫散水。

 

最後Daisy頂唔順，放工兩個鐘前早退返屋企。而我喺臨放工果陣，專登拎左個紙箱放左喺daisy個位同擺左個白信封喺佢張枱，等佢聽日返到黎以為畀人炒左。





 

我公司其實仲有幾個男同事，有個叫大明，佢成日扮大佬，亦都鍾意對我單單打打。為左討好班女同事，大明對另外兩個男同事施加壓力，要佢地一齊唔理我。

 

另外兩個男同事一個係IT毒撚阿油，因為佢成面面油，所以畀大明改左呢個花名。佢本身就對我無咩野，不過佢好怕畀人杯葛埋一份，所以喺公司佢唔敢同我講野。阿油佢份人其實幾內向，佢以前同我講過佢中學果陣成日畀人恰，所以佢好怕得罪人。

 

另外一個叫文員輝，佢同班女同事本身關係ok。不過以我所知佢其實相當咸濕，佢好鍾意借機向女同事抽水。新黎有個女同事叫Miki，佢份人好似蠢蠢地，成日畀文員輝抽左水都唔多覺咁。以前文員輝同我仲有兩句果陣，佢同我講佢成日畀啲女同事搞到慾火焚身，食lunch果陣頂唔順去附近撳鐘仔，不過喺其他女同事眼中文員輝都算幾斯文同幾friendly。

 

到左夜晚，我用whatsapp不斷轟炸阿油企圖去拉攏佢。我對佢動之以情，同佢講我畀人杯葛真係好慘，亦因此成功勾起佢自己中學果陣畀人恰嘅回憶。佢最報肯喺其他人唔知嘅情況下同我保持聯絡，不過佢要求我唔好喺其他人面前同佢講野。另外我發現原來阿油對新年果個傻豬妹miki有意思，我應承佢我會幫佢手阻止文員輝對miki施以毒手，而作為交換阿油答應會幫我收風，佢知道有咩事發生就會同我單聲。