今日我開始左對公司啲同事進行復仇大計: 第二節

今日一早返到去襯無人果陣，我扮神秘傾慕者送朱古力畀全公司女同事，但唯獨Judy我就擺塊鏡喺枱面。而為左扮唔係我做，派完朱古力之後我就去左食個早餐先再返公司。

 

果然不出我所料，當啲女同事返到去見到有朱古力食都好雀躍，佢地不斷估究竟係邊個客送黎，唯獨Judy一個就黑晒面唔出聲。我之後所以咁做係為左要落Judy面之外，我仲係要佢對其他女同事生妒忌之心。

 

Daisy今日返到黎見到個紙箱同白信封果陣，本身真係驚左一驚，不過佢發現唔係畀人炒之後佢就即刻鬆一口氣，而好快佢嘅不安情緒就畀收到朱古力呢件事掩蓋左。今日Daisy醒目左，佢無再上FB玩電話。佢成朝都剩係專注做公司野，但佢乜都唔知亦唔代表我無野可以整到佢。





 

我今日專登較到電話ringtone同佢一樣，連whatsapp個notification同較到同佢一樣。之後每隔一陣我就用另一部電話打畀自己同用whatsapp自己，從而令到佢不斷以為自己有電話，平時電話不離手嘅佢，今日為左唔畀我捉到，所以仍一直忍住手唔敢玩電話，但成日聽到好似有人whatsapp而佢又無得睇，佢開始表現得好焦慮。除此之外，今日Daisy每講一句野，我都會細細聲重複佢句野一次。重複到咁上下佢終於忍唔住轉身鬧我:「玩夠未呀痴線佬！」當然我喺repeat完佢呢句之後就無再應佢，我只係陰陰咀笑之後繼續做自己野。Daisy畀我咁煩法真係開始頂唔順，放工果陣我見佢自己一個人好嬲咁走左，就連同其他同事都無講byebye。

 

另一方面我為左幫阿油救出佢個Miki BB，等佢唔洗再成日畀文員輝抽水，尋晚我打左去我老細Sam姐度投訴話文員輝成日喺返工時間度上141網。

 





之後老細一返黎就捉左阿輝入去鬧，鬧完出到黎就同我地成班人講:「我地發現有啲男同事喺返工時間上埋啲色情網頁，雖然你地私生活公司係無權干預，不過喺返工時間大家就注意下啦。」

大明為左明哲保身同扮大佬，佢當住眾人面前指住文員輝話:「阿輝呀都叫佢你唔好成日去嫖架啦。就算要嫖都放左工自返屋企上網揀女啦。如果畀其他女同事見到你上埋果啲網站，實會令班女同事好不安。我覺得你真係好唔尊重班女同事囉，你知唔知人地可以告你性騷擾架。」

 

阿輝想反駁但又開唔到口，大明呢條友無論喺落井下石同搶佔道德高地方面，都可以話係世界級］，佢唔入明肛社真係浪費左佢。Miki 喺聽到文員輝係咁嘅人之後，明顯對佢有左避忌，而且佢亦轉左去痴埋阿油到同佢傾計。文員輝畀人知道左係嫖客之後，佢自己成日都唔敢同女同事講野，呢個時候我知道我下個拉攏目標就係文員輝。