今日返到公司之後,我留意四周其他同事有無咩特別反應,明顯地經過星期六一役之後,公司氣氛變得好怪異。

 

喺返上公司之前我,專登去左附近麵包鋪度買左件爛鬼西餅,件西餅除左樣衰之外,我仲懷疑因為係隔夜先賣到咁平。我襯其他人都未返到公司,得我同Daisy喺度果陣(因為佢住得遠所以通常每日都係最早到),行左去Daisy個位度畀件西餅佢。

 

佢初初好驚咁望住我,仲耍手擰頭咁話唔洗客氣,見到佢咁嘅反應我即時扮黑面,同佢講:「你唔食即係唔肯原諒我,唔想同我和解姐。」Daisy聽到我咁講,驚起上黎下唯有死死地氣哽左件爛鬼西餅。佢食到皺晒眉頭咁,睇得出個件餅應該幾難食下。同時我第一次有機會望真Daisy個樣,佢原來都幾可愛,仲有幾分似初初出道嘅應采兒。





 

佢食完果陣,我賴好咁放左杯暖水放左喺佢枱面,等佢可以濕下個口。 睇得出佢初頭應該好心寒,不過呢個動作令佢以為我真係有心向佢示好。而最後佢總算係稍為放低左對我嘅戒心,笑笑口咁同我講左句多謝。我亦隨即打蛇隨棍上, 好誠懇咁同佢講:「Daisy,你可以繼續喺佢地面前杯葛我,我唔會連累你。」聽到我呢番說話佢眼神閃過有一絲猶豫,我知道我呢一著應該無行錯,Daisy好快就會對我產生斯德哥爾摩症式嘅依賴之心。所以暫時我會日日幫佢買早餐,而且平時都會keep住喺whatsapp對佢喧寒問暖。我咁做唔係因為我對佢產生左好感,Daisy係我黎緊係我分化其他女同事嘅重要棋子,我係唔會對佢產生其他感情…最少我唔會容許自己對佢動真情。

 

每逢星期一我地GM阿Sam姐都會上我地公司開早會,我之前曾經唔小心得罪左Sam姐而令到我地關係一度變差,不過喺我曾經為佢出賣左自己肉體之後(呢件事詳情容許我先賣個關子),佢唔單止原諒左我,仲當正我係佢心腹。喺開完早會之後,佢叫我留低話有野問我。我同佢講等陣先我要返埋位拎小小野先,之後我就喺全 公司同事面前返自己個位度拎本簿出黎。

 





公司啲同事其實耐唔耐都會見我拎果本簿出黎寫,當我仲未畀人杯葛,而我同班同事仲有兩句果陣,佢地曾經問過我呢本簿係用黎做咩,我答佢地我只係用黎寫下 memo。但呢本簿真名叫其實叫小器簿,係我專用黎記低人地有咩得罪我,而寫完之後我會效發高登一代精神(病)領袖牛腩三號,返屋企用excel詳細記低晒所有得罪我嘅事項。

 

咁耐以黎,由我小學到出黎做野,我寫滿過無數小器簿,咁耐以黎小器簿都可以話係我最可靠嘅朋友。有次我前度女朋友見到我屋企收埋左咁多本小 器簿,佢話我好痴線,不過我知道痴線果個係佢唔係我,佢喺而之後佢亦隨即同我提出分手。當時我除左傷心之餘仲好不忿,所以喺分手之後,我用左三個月時間,一日打十幾次電話畀佢去證明我無痴線。最後佢同我講左句:「得啦你無痴線啦,我求下你唔好再搵我。」果刻我明白到我由頭尾都無痴過線,只係其他人理解唔到我,好似我前女 朋友咁,佢都要用三個月時間,經過咁密集式嘅溝通方法,佢先可以明白我理解我。

 

我知道我啲同事一直都有懷疑我呢本簿嘅用途,因為每次佢地對我單單打打或者無視我果陣,我都會特登用好大動作咁拎本簿出黎,喺佢地面前係咁寫,寫完仲會用怨毒嘅眼神望一望佢地先會笑返埋本簿。





 

喺入返會議室之前,我專登等其他人喺行返晒出黎,先喺佢地面前拎埋本簿先行返入會議室。佢地見我拎住本簿入去即刻好緊張,不過佢地又苦無對應方法。入返去 之後Sam姐問我做咩要拎本簿,我答佢陣間佢有咩事吩咐我我都可以寫低,佢哦左一句就無再理過我本簿。佢叫我留低其實只係為問我annual dinner食咩好同有無興趣陪佢去睇一代宗師,我同佢約左星期六去睇戲之後就走返出去。喺我行出會議室之際,我專登煞有介事咁望晒佢地全部人陰陰咀笑, 再賴係小心翼翼喺佢地面前咁收埋本簿喺褸袋。喺經過Daisy個位果陣,我專登用佢隔離位個Valarie (即係就黎同鬼佬結婚,邀請我去佢婚禮點知話下次先果個)都聽到嘅音量同佢講左句:放心呀Daisy我唔會畀你有事架。Valarie聽到之後先係好驚訝 咁望一望我,之後再用狠毒嘅眼神黎望住Daisy,我無理佢地,就咁吹住口哨施施然咁行返埋自己個位。

 

返到埋位果陣我見到Valarie拎左部電話出黎,似係想whatsapp同其他人報料,有見及此我就專登提高聲線話扮自言自語:「頭先Sam姐話最憎人喺辦公時間玩電話喎…」Valarie聽到之後就即刻淆底收埋部電話,繼續扮做野。跟住一路到食lunch果陣我都睇得出大家都好不安,平時佢地同事之間都會吹下水,不過今日佢地一粒聲都唔敢出。

 

到左lunch time,大明貫徹佢嘅扮大佬作風,拉大隊去食lunch。不過佢指名道姓咁叫阿文員輝唔好跟埋黎,文員輝雖然預左大明條友會咁做,不過佢聽到後 都表現得相當不忿,咬牙切齒想衝埋去打阿大明一身咁。等所有人都走左,剩返我同阿輝果陣,我拎個飯盒遞左畀阿輝,拍下佢膊頭叫佢唔好難過,我同佢講我畀人 杯葛慣,都好明白你感受。成餐飯阿輝都無乜同我講過野,我都無主動去拉攏佢,我知有啲野急唔黎,我唯一有同阿輝講:我頭先無同Sam姐講過你任何壞話,你 可以放心。而阿輝聽到之後點一點頭。阿輝而家成隻驚弓之鳥咁,我知道佢雖然無出聲,但同理心使然佢應該當左我係佢盟友。食完佢講左聲多謝,再行埋黎拍下我 膊頭就返返埋自己個位玩電話。睇死條咸濕佬都係因為唔敢再用電腦上141而改用電話上啦,雞蟲真係叫少陣雞都唔得。

 

Lunch完左之後大明一行人返返黎,我估頭先餐飯佢地應該食得唔太愉快,大部份人個樣都死晒狗咁。特別係Daisy,佢眼眶好似有啲紅,而且佢明顯地同 Valarie保持左一段距離,佢地平時明明係最friend,但Valarie就同大明行頭而且不斷密密傾,而Daisy就畀Judy同 Kathy(Miki以外另一個新同事,八婆格,不過我仲未同佢深入了解過)夾住,阿油就同Miki殿後。阿油同Miki自從無左文員輝呢個障礙之後感情 好似突飛猛進左好多,而我亦都留意到阿輝喺望向佢地果陣眼神充滿左妒火同怨恨。





 

見到呢個情形之後我偷偷地whatsapp左阿油,同佢講:「放心頭先我無出賣你,不過如果方便嘅話你可唔可以話我知Daisy做咩呀。佢好似咁唔開心,我同佢啱啱先和好,我都好關心,佢唔想佢唔開心。」阿油隔左陣之後回我話:「佢地以為Daisy係你果邊啲人,Daisy用左好耐先說服到佢地,佢解釋話只係怕左你 先假意同你扮下friend,但Valarie唔信佢仲鬧左佢兩句,而阿Judy同Kathy之後都繼續有向Daisy扮晒friend咁套佢講野,唉阿 James你地啲事我唔多過問啦,你自己小心啲啦,btw我同Miki今日多左好多野講呀,多謝你之前幫我手。」

 

一直由lunch到放工呢五六個鐘,公司都靜到好似墳場咁。我當然唔會放過呢個機會去騷擾其他人,我將我部手提電話個ringtone set左做Gangnam Style,我個人認為呢個世界應該無野比outdated左嘅野更令人煩厭,而每隔十幾分鐘我都會偷偷地用另一部電話打畀自己,但由扮忙住做野唔聽電 話。喺五六個鐘內不斷聽到Gangnam Style都咪話唔煩,而且我仲要專登較到部電話最大聲,確保公司內每個人都聽到,無視我呀拿,我就睇你地無視得幾耐。