今日我開始左對公司啲同事進行復仇大計: 第五節
尋日我開始左針對Daisy嘅落藥行動，目標係令佢係無意之中幫我分化公司班女同事。喺開始講今日發生嘅事之前，我要簡單講下公司班女人嘅關係先。其實我 公司嘅女同事主要有我最大阿姐阿Sam，不過佢多數都係留喺總公司，一個星期只係黎我地公司幾次，所以嚴格黎講佢同我地公司其他女人都係單純上司下屬關 係，唔會特別熟。而喺我地分公司最大果個阿姐叫Kate，因為佢出左trip嘅關係所以一直未有機會出場，佢將會喺星期五返返黎。Kate喺我地公司一向 出左名無主見而且欠缺辦事能力，佢平時喺公司每做一個決定基本上都會問阿Sam姐一次，江湖傳聞佢同總公司某陳姓男高層有不可告人嘅關係先會上到位。事實 上阿Kate作為一個三字頭事業型女性黎講都算係dealable，啲同事成日話佢有幾分似阿姚子羚，我個人就覺得佢比較似立花里子，不過呢啲都只不過係 觀點與角度嘅問題。
而喺佢地之下，實際上最影響到我地公司日常運作嘅就係會計部阿姐Judy同Marketing阿姐Valarie，呢兩個女人為左爭上位日日喺度明爭暗 鬥。不過又精神分裂地鍾意喺閒時扮好姊妹，但實情係Valarie又會眼紅Judy靚過佢，Judy又唔抵得Valarie嫁完醫生又嫁鬼佬。佢地對對方 嘅妒意有時真係會露骨到連我地都聽得出，真係難委佢地平時仲可以扮野一齊行街睇戲食飯。以前公司其實仲有個叫Peggy姐嘅中女係同 Valarie,Judy三個三分天下，不過聽聞Peggy唔知撞左咩邪，話要尋找生命真諦，就無端端請左成個月假去歐洲進行Eat, Pray ,Love之旅。至於Daisy同兩個新同事Miki同Kathy其實都係出黎做野無耐，Daisy同Miki大家都睇得出佢地直頭係不知人間險惡啦，至 於Kathy我同佢無接觸過所以都唔太知佢底細。
工作上Miki係跟Valarie而Kathy係跟Judy，至於Daisy就係唔隸屬任何人嘅一人admin部門，講得好聽就係獨立運作，低實際上就係 無主孤魂。黎緊下個星期我地可能仲會多個新同事，以頂替辭左職嘅HR同事Sophia，Sophia就係我朝早向佢表白，佢晏晝就即刻辭左職果位同事。佢辭左職 之後，即日cut埋自己個電話，據聞仲不惜賠錢都要搵屋搬，不過我相信佢呢啲行為都係一連串非常巧合嘅個別事件，同我向佢表白應該無乜大關係。
入返正題，今日我繼續展開我對Daisy嘅落藥攻勢，我今日落重本喺茶餐廳買左個早餐畀佢食，不過基於本人有啲肚餓，碗火腿通粉我自己食左，剩係留返個奄 列同多士畀Daisy。返到公司我見到Daisy已經一早返到去，正當我心裡懷疑呢條女根本無返過屋企，直頭住喺公司，唔係有咩可能日日咁早返到公司之 際，我行埋去見到佢枱面有一大盒野，而且雙眼眼泛淚光。就好似每套九十年代機械人打怪獸嘅卡通片，主角喺出必殺技之前，都會好似思覺失調咁聽到把聲同佢講 機會黎啦。我二話不說就行埋去，之後萬梓良上身咁大喝一句：「Daisy，邊個恰你咁大膽？」佢先係呆左一呆，相信果刻佢都係畀我嘅霸氣震懾左，應該唔係覺得 我痴線嘅。
之後佢同我講佢前男朋友今日一早約左佢喺公司附近，歸還返Daisy遺留喺佢屋企嘅嘢。相信大家都知道，男人老狗會突然之間對前女友咁決絕，有99個 percent嘅機會係被新女朋友迫佢擺姿態。呢個道理Daisy當然同樣明白，不過俗語有云鳩硬無親戚，佢個ex又點會仲得閒顧佢感受呀，唔洗問都知道 頭先個交收過程Daisy應該受左唔少委屈。任何正常男人喺呢個時候見到Daisy呢個楚楚可憐嘅模樣，都應該會打從心底地想保護佢同安慰佢。可惜我呢個 背負住復仇宿命嘅人，係唔可以容許自己對佢動左真情。我深深咁吸左一口氣，放低個早餐同佢講話：「Daisy，你係好女仔黎，唔值得為左呢啲男人唔開心架。乖乖地食左個早餐再專心做野啦，我知道你食唔晒成個早餐，所以將個火腿通畀左個賣紙皮嘅老婆婆食，希望你唔好介意。放心，你有咩唔開心可以隨時 whatapp我同我傾訴，大家一齊努力工作啦。」
講完呢番我自己聽到都會打冷震嘅說話後，我就返返埋自己個位度安排我今日嘅復仇大計。我之前講過我下個目 標係Judy，自從我果日送左塊鏡畀佢之後我就一直思索緊究竟點樣先最有效去對付度呢個女人，一個三十有幾，未婚，有幾分姿色但又自視太高嘅女人表面上好 似滿佈罩門，但睇佢喺江湖上行走左一段日子，正所謂乜撚都試過嘅佢，又點會咁易被人玩到。要對付佢，我就一定要借助佢嘅命中宿敵Valarie。
Valarie呢排好鍾意周圍畀人睇佢同 佢個鬼佬老公嘅婚紗照，我留意到Judy每次睇完都會表演得好戥Valarie開心咁勁讚啲相，但當Valarie一行開Judy就會即刻黑面。當然我自 己就覺得Valarie專登成日都拎埋去畀阿Judy睇其實都係想潤下佢，而Judy呢啲老江湖應該都深知Valarie嘅手段。喺其他人未返到之前，我 襯阿Daisy仲埋頭食緊個奄列果陣，我偷偷地將Valarie本婚紗相薄放左喺Judy張枱度，而喺本婚紗相薄上面我仲要放左幾張speed dating同婚姻介紹嘅傳單。我知道佢未必會覺得係Valarie做，不過我只係志在撥下火，提醒下佢喺愛情路上可以話係輸晒畀Valarie。就算佢 覺得係我搞屎棍都無所謂，喺佢嬲我嘅同時佢係唔會因此而無咁妒忌Valarie。
果然喺Judy返到公司之際，佢見到枱面上嘅嘢即刻面色一沉。不過佢不愧為老江湖，好快佢就硬濟左個笑容出黎，拎返本相簿畀阿Valarie，仲要笑笑口 咁話佢大頭蝦啲嘢亂咁放。正當佢返埋位之際，突然有人送花上門，仲要係佢件觀音兵次次都指定係送畀佢嘅白玫瑰，佢即刻滿心歡喜咁想行上去收花，點知扎花竟 然唔會送畀佢，而係送畀Valarie嘅。張卡上面無署名，只係寫左You’re my everything，呢首歌係Valarie同佢件鬼佬未婚夫嘅定情歌曲，所以大家都即刻聯想到扎花係阿洋腸兄送畀佢Valarie嘅。但聰明嘅各位應 該已經估到，扎花其實係我送嘅，至於點解我會連Valarie同洋腸兄嘅定情歌曲都知道呢。咁係因為喺我同Valarie仲未反面之前，佢曾經叫我幫佢搵 定隻歌黎喺婚禮上面用，不過我估佢自己都未必計得佢拜託過我。Judy見扎花唔係送畀佢之後就嬲爆爆咁行左去廁所，而Valarie就拎住扎花，一副勝利 者姿態咁喺公司行黎行去，周圍問人扎花靚唔靚。如果有個外人喺呢個時候行左入黎，應該會以為有件中女痴左線喺度扮港姐冠軍繞場一周。