今日我開始左對公司啲同事進行復仇大計: 第九節

返到屋企之後，我一直訓得好差，面對住Miki呢個我對佢幾乎一無所知嘅對手，其實真係好有壓力。原來我今日約左Sam姐去睇一代宗師，不過又攰又燥，我 諗我都係無乜心情去睇戲。我諗我真係要做啲體力活動去減壓呀，所以我whatsapp Sam姐同佢講：「不如唔好睇戲，我地去老地方等呀，我無乜心情呀，我好想同你做下運動發洩下啲精力呀。」無幾耐Sam姐都回左我：「OK，我沖定涼等你。」

 

臨出門口之前，我whatsapp Daisy問佢尋晚幾點返屋企，點知佢回我：「尋晚我最後上左Miki度訓呀，你知我屋企住得幾偏遠(天水圍)架啦哈哈。」我聽到之後心頭一驚，乜 Miki同Daisy私底下好熟架咩，呢方面我真係一無所知，我好擔心Miki尋晚會襯機落左咩咀頭…我即刻打畀阿油問佢知唔知Miki同Daisy平時 相處係點，阿油應該對Miki私生活都係所知不多，但阿油話聽聞Miki同Daisy平時會約埋去街同玩art jamming。我聽到心裡暗叫不妙，而且亦開始重新思考今個星期所有事嘅脈絡。

 

因為我見平時Miki喺公司唔起眼，亦都唔會成日搵Daisy傾計，我就從來都無assume過佢地會係朋友，但私底下佢地係點其實我真係一無所 知。我一直自以為利用緊Miki去控制住阿油之時，對方會唔會同我做緊同一樣嘢呢？如果Miki係有心攝合我同Daisy從而去利用我，假設佢心思真係咁 細密，佢無理由會畀Miki同阿油漏到半句口風畀我知架？又假設如果真係Miki慫恿Daisy埋我身，但又有咩誘因令到Daisy會對佢言聽計從呢？面 對住Miki呢個我對佢一無所知嘅對手，我不禁產生左滿腦子嘅疑問。





 

早排我為左接近Sam姐向佢道歉，我周圍同人打探Sam姐有咩喜好，打算投其所好向佢賠罪。經我查探佢唯一嗜好就係做Yoga同做GYM，自此之後我就用 左一段時間日日跟住佢去做GYM，雖然係男人老狗，但就連佢做高溫Yoga Aerobic都照死跟去做，其實聰明如佢一早知我做咁多野出發點都係想討好佢，不過佢見我咁有恆心所以都畀我照跟，而且當佢屋企需要人水電維修我都隨傳 到隨到，佢先畀我誠意感動左肯同我做朋友，呢段期間我真係慘過賣肉。

 

Sam姐雖然30有幾，不過可能keep住成日做運動，佢身材fit到漏，全身一肌膚亦都算係緊緻嫩滑。啲計佢著運動裝果陣，以佢年紀黎講佢真係算 keep得好好。但正當我對佢見獵心喜，想再同發生進一步關係之際，佢同我講佢根本唔鍾意男人，不過佢另一半唔係大家想像中果啲TB，相反佢另一半仲係個 同佢年紀相若，但面容都叫幾清秀嘅長髮中女，但礙於工作關係聽聞佢成日唔喺香港。

 





我同Sam姐所謂嘅老地方其實只係去做GYM，當去到同佢做左成個鐘Yoga之後，我啲神經真係放鬆左少少。做完GYM之後我同佢去左中環食cake，估 唔到過左十幾個鐘之後我又返返黎呢度。基本上Sam姐認為無必要避嫌同我交朋友嘅最大原因除左係我同佢無可能過電之外，仲因為佢覺得自己係一個好公私分明 嘅人，平時佢絕對唔會同我談及公事，佢亦都唔會畀我講公事。佢雖然心知我都係一個搞屎棍，不過佢選擇唔理我喺公司做咩，亦都唔會過問我同其他人嘅人事關 係。不過佢今日比平時有啲唔同，我見佢好憂心忡忡咁，問多兩下之後佢忍唔住話我知我地分公司好可能會有人事上嘅變動，會再有新同事加入,我問佢係咪HR終 於請左人佢又話唔關事。我心諗一個Miki都已經夠我煩，而家仲要再加多個無知數落黎？但我就算點追問都好，Sam姐都唔肯透露呢個人會做咩位。相反佢就 問我覺得阿Kate算唔算稱職，平時佢為怕利益衝突佢唔會問我對其他人嘅意見。唔通佢地終於頂唔順阿Kate咁無能，想搵人坐左佢個位？