我呢兩日不斷咁嘗試想去搵Taylor,原因係我好想知道佢果晚同Valarie究竟發生左啲咩事。我call左佢好多次,其間亦多次留言同佢講我除左會畀車馬費佢之外,我仲肯畀多啲錢佢去知佢同Valarie究竟發生左啲咩事。喺留言度我由三百蚊起跳,一直叫價到二千蚊佢都係不為所動。呢條友平時都趙完唱開,明明連平時去clubbing呃完蝦條都會即刻上網打報告分享,今次有錢收佢就反而唔出聲,真係好奇怪。

 

返到公司我照常買早餐畀Daisy食,不過由於我仲未知道佢同Miki背後有無陰謀。所以我都唔太想同佢講野,只係打左個招呼放低個早餐,連佢都未黎得切應我我就行返埋自己個位,過左陣Daisy拎左碗啱啱煮好嘅麥皮畀我,佢遞碗麥皮畀我嘅時候,我察覺佢眼神有啲異樣,喺當中我見到有一絲難過同憐憫,佢同我講:「你原來一直腸胃唔係咁好,今朝我都係畀碗麥皮你算啦,你慢慢食啦。」講完之後佢就行開左,我聽到果陣大惑不解,無端端佢點解覺得我腸胃唔好呀?

 

公司同事陸續返到黎,我最在意嘅Valarie今朝請左病假,雖然女人間唔中請病假就唔出奇,不過加埋Taylor突然音訊全無,兩件事加埋就令到我好在意。阿油返到黎之後,襯其他人唔為意果陣行埋我度話:「James呀有啲嘢我細蚊仔果陣都試過,係有啲難堪架啦,不過過左去你就唔好介意啦。」我聽到之後真係心諗一句,幹什麼呢。謎底由大明返揭盅,阿油講完行開之後,佢走埋黎我果位話:「喂痴線佬,呢個世界真係細呀,原來我女朋友個妹係你中學同學黎架喎,唔講都唔知你中學時候原來已經咁出名,咁後生就失禁,間唔中會賴下屎。」我聽到之後真係好失望,我仲以為Miki安排左咩毒招陰我,原來只不係大明做埋呢啲小學雞式唱人賴屎行為。





 

係呀,我中學係試過賴過兩次屎,不過鬼叫朝早塞車咩,我又成日空肚食早餐,賴下屎有咩出奇姐。可能對於其他人,佢地聽到呢啲事畀人重提嘅時候,可能會覺得好瘀或者好介意,但對於我呢個成個中學都畀人叫做賴屎仔嘅人黎講,呢啲攻擊算係啲咩呀。我只係望住佢冷笑左一聲,之後(扮晒)滿不在乎咁答佢:「我唔屎賴你邊有野食姐,個世界係咁架啦,有你呢啲食屎狗咁大demand,我屙唔切都要賴少少去supply畀你啦,不過而家我又唔急屎,請你行返去你個狗竇等通知啦。」可能大明無預計過我嘅反應會咁,佢本身一心諗住黎攞采,但相反竟然又畀我奚落一番。突然我聽到啱啱返到嘅Judy尖叫左一聲…

 

我即刻行埋去睇下發生左咩事,我見到Judy拎左個無左個頭嘅Teddy Bear喺度喊,平時隻Teddy Bear一直放喺Judy張枱,據隻Teddy Bear係佢前男朋友送畀佢,佢一向對隻Teddy Bear都算幾珍而重之,其他同事想拎黎睇佢都會婉拒。說時遲那時快,我突然又聽到文員輝喺度嗌,佢話佢搵到個頭,原來隻Teddy Bear個頭竟然喺缸風水魚入面,而且對眼珠仲要畀人挑左出黎浮左喺水面咁,狀什恐怖。Judy見到呢個情況即刻失控崩潰,佢第一時間衝埋黎星左我一巴,接著大鬧:「等我呢兩日仲以為你都仲算係一個人,點知你無人性架。你平時整蠱我呀恰我串我都算啦,點解你仲要咁變態將我隻bear分屍呀,你知唔知隻bear對我去重要架。」阿Kate同Kathy見狀即刻過黎拉住Judy,不過Judy都仲係激動到好似想殺左我咁。我唔識畀反應,只係呆左咁企喺度,我想解釋辯駁,但連我都覺得我自己係最合理嘅兇手,除左我仲有咩人會有行兇動機呢?我即時望向Miki,點知Miki望都無望過我,只係行埋去安撫Judy。頭先畀我奚落左一番嘅大明當然唔會放過呢個機會,佢即刻走過黎捉住我,七情上面咁話:「你唔好走呀變態佬,我而家就報警去拉你...」我當時其實有啲想問返去,警察黎到果陣佢係咪打算話我謀殺左隻Teddy Bear,不過而家實在唔係串咀嘅時候。而被其他人捉住左嘅Judy,依然係一副衝出黎打我嘅模樣。突然,Miki行出黎話:「大家冷靜啲,我覺得唔係James做。」聽到佢講呢句說話,我相信場中最驚訝果個係我,乜唔係佢陷害我架咩?

 





「今朝早我同Daisy一早返到公司整野,當時都未有其他人返到,而當時隻公仔我印象中仲係完整無缺嘅。」下,乜今朝Miki都一早返到左?而事實上我今朝返黎果陣因為心亂如麻,都無留意到公司周圍係點…之後Daisy亦都幫口話:「James一返到黎就坐埋位食早餐,佢都無行開過,點會係佢做呀,我諗係其他人貪玩姐,你地查清楚先啦,唔好報警呀。」聽到Miki同Daisy咁講之後,Judy嘅神情由憤怒變成錯愕。大明即時反駁佢地:「唔係條痴線佬做唔通係我做呀?」Miki聽到佢嘅反駁之後,用好平靜嘅語氣咁講:「我唔否定有呢個可能性,因為喺你返到黎之後我無留意過你做乜,但James就有我同Daisy呢兩個目擊證人。當然我唔係話係大明你做,不過我只係想指出,就算大家對James有偏見,都唔應該喺無證無據之下去屈佢。」文員輝呢個時候亦都附和:「係啦,大明你唔好再成日屈人啦,周圍唱阿James中學賴過屎都算啦,而家仲要含血噴人,呢度仲有咩同事未畀你唱過屈過架。」

 

睇黎阿輝等左呢個反擊大明嘅機會好耐,原本明明我係眾矢之的,點解而家會變左大明幫我受?而Judy聽到佢地咁講之後,佢深呼吸左一口氣,用佢把仲帶點嗚咽嘅聲同我講:「頭先係我太激動,無查清楚就打左你一巴。我真心希望唔係你做嘅,如果係我怪錯左你嘅,sorry。」由於我自己都仲係如墜五里霧中,我點一點頭,行返埋個位度無再理佢地。而阿Kate亦都打圓場話就當係同事惡作劇,叫大家返埋位做野。而本身應該上黎開例會嘅Sam姐,佢今日話有啲事要處理所以唔得閒上黎,不過仲不安緊嘅我根本無心情去深究Sam姐有咩事要處理。

 

其實我寧願今次件事係我畀人陷害,起碼如果真係畀人陷害,我都仲可以自己耍無賴解圍,而且我仲可以鎖定兇手係Miki。但頭先竟然係Miki幫我解圍,如果真兇係佢嘅話,佢點解唔順手推舟等我做代罪羔羊呢?如果唔係Miki做嘅話,仲有咩人會對Judy狠下毒手呢?我嘅復仇計劃突然之間橫生左咁多變節,幕後黑手係咪就係Miki呢?