星期一例會之前,呢排同我關係搞到好彊嘅Sam姐嘗試提早上黎公司,同我修補關係,佢一上黎就叫左我入房,佢劈頭見到我第一句就話:「你嬲完未呀?男人老狗咁小器點得架,我第日有事點樣旨意你呀衰仔……」我聽到佢咁講之後目無表情,佢繼續話:「你係咪仲有咩唔開心呀,其實果件事你都唔係啱晒……」我唔等佢講完之後,就直接問:「Sam姐,你係咪準備要升Valarie?」「咁其實而家都未決定……」「一句講晒,係定唔係?」呢個時候佢突然面色一沉,之後話:「我都話未決定,你係咩身份,我點解要同你交代?」我聽到佢咁講都無同佢客氣:「我身份係你下屬咋,所以你無必要同我交代啲咩。不過你叫我做嘅嘢我樣樣都有做到足,就好似你想知邊個整走阿Kate呀嘛,我而家話你知,就係你個Valarie呀。」Sam姐聽到我咁講之後,沉默左一陣,佢之後神色略帶少少痛苦咁話:「總之你聽我一次,唔好惹Valarie住先,你信我一次啦,有咩我會盡力保住你架啦。」我聽完之後冷笑左一聲:「Sam姐,你明明係佢上司黎,但你而家呢番說話令我覺得,你可能連自保嘅能力都無呀。」Sam姐聽到我咁講之後大發雷霆:「你咁講係咩意思呀?你係咪恃住同我有啲交情講野就咁不分尊卑呀?」去到呢一刻,我認為我同Valarie都已經去到勢不兩立,有佢無我嘅情況,我決定盡全力押一鋪:「Sam姐我知你而家有痛腳畀Valarie揸住呀,你唔洗講咁多廢話啦,我可以幫你一把,到時大家都仲有好日子過。如果唔係你而家炒左我啦,反正我留喺度都只會畀個黑心女人迫死。」Sam姐靜左一陣之後話:「你畀我諗一陣,我放左工之後再同你傾啦。」果然不出我所料,早排我見到Sam姐無返屋企,之後返到公司同Valarie神色有異,再加上佢呢排對我態度突變,都係Valarie一手做成,我呢鋪總算無押錯注,希望好快就會見到成效啦。

 

由於尋日同Daisy咁樣不歡而散,我都預左今日同佢會面左左。點知Daisy除左扮無嘢之外,佢今日同Evnas仲要比平時行得咁埋,佢地成個朝早都喺度細聲講大聲笑。我看在眼內當然不好受啦,不過我留意到除左我之外,另一個睇到眼花爆嘅,應該係Miki。為左調整心態以應付大明同Valarie,我決定唔再理Daisy同Evans專心做下嘢先。正當我打算投入工作之際,我公司電話突然響起,我一拎起個電話聽筒,就聽到一把熟悉嘅聲音喺度奸笑。呢個人係阿油,雖然喺同一間公司,不過佢都選擇打內線都無親自行埋黎同我講嘢。佢第一句就話:「喂,我頭先喺公司e-mail搵到啲好得意嘅嘢呀。」「有嘢就請你快啲講,唔好浪費公司資源啦。」「你唔好咁囂張,陣間你聽完真係多謝我都黎唔切呀。我頭先check到有人send email畀我地全公司,入面個attachment係你無著衫畀個黑鬼抱住影架。睇幅圖又唔似係PS呀……不過你放心,我暫時幫你抽起左,其他人仲未睇到架,你要識做多謝我啦。」我聽到之後心入面暗吃一驚,我估唔到大明條友竟然咁無創意,佢以為呢招會影響到我咩?我聽到之後好淡然咁問阿油:「哦,咁你想我點多謝你呀?」「我要你陣間跪喺度同我講對唔住,等你條仆街平時成日恰我,之後再畀幾萬蚊我洗下,你知我早排喺澳門輸左幾多架啦…..」「你意思係我唔照你咁講,你就會畀晒全公司啲人睇我幅相,我有無理解錯呀?」「係呀,吹咩?你而家畀唔畀呀?一陣全公司都知你好果味嘢,仲要係同黑人,你一定唔洗出黎行啦。」「出唔到黎行咁咪坐企下囉,我而家就係偏偏唔畀錢,亦都唔會同你講對唔住架啦。」阿油應該估唔到我會拒絕佢:「你……你唔信我會做得出,我而家就畀晒全公司啲人睇。」

 

隔住個電話都聽得出佢呢一刻有幾憤怒,不過我只係繼續好淡然咁講:「你想唔想知我點解會影左呢啲相,而啲相又係邊個send返黎架,呢個人你都識架」阿油聽到我咁講之後呆左無出聲,我繼續講:「你諗下有咩人會有晒我地公司啲人嘅e-mail之餘,又會咁憎我?畀個提示你呀,你係佢下個目標,而且佢最憎果個應該係你呀。」我講到呢到,阿油已經開始驚到喘氣,佢隔左一陣,喺口中吐出兩個字:「大明……」「你覺得啲相影得靚唔靚呀?你就係下個男主角黎架啦,你呢排腸胃好唔好呀?」「咩…..咩腸胃好唔好?」「無,如果你腸胃唔好,我驚你到時整到人地周地都係呀,畀人通後門都幾痛架,不過睇你個樣你可能之前同試過架啦。」阿油聽到呢度,佢唔理自已身處公司,佢好激動咁話:「佢無理由知道單嘢我有份架!我從頭到尾都無出過面。」「唔好意思呀油哥,當日我畀佢捉住嚴刑迫供果陣,我唔小心爆左你出黎呀。不過其實佢唔迫供我都會照爆你出黎架啦,我同你一場老友,呢啲時候有難同當都好正常姐。」阿油聽完我咁講之後倒抽一口涼氣,唔敢再出聲,我呢個時候知道已經成功嚇到佢,我見機不可失,即時話:「不過如果你可以用你嘅方法搵到佢出黎,再叫阿虎去搞下佢,到時我同你都可能有救,如果唔係下次我地可能會肉帛相見架啦阿油。你都唔想第一次唔係畀Miki,而係畀左個黑人架……呀唔係喎,你早排叫過雞黎,你應該唔係青頭仔黎……」我專登大大聲咁講叫雞兩字,令到全公司啲人都望住我,雖然佢地應該唔知我同阿油講緊電話,不過我估阿油而家應該都係一臉尷尬。阿油自覺已經同我坐埋同一條船,無奈之後唯有答應,喺對大明一籌莫展之際,有阿油幫手答都算係好事黎。