今日我開始左對公司啲同事進行復仇大計: 第四十七節
「我地都一排無傾過計啦James，我聽聞上次Sophia單嘢你係畀Valarie屈，估唔到佢係啲咁嘅人。」一排無同我交流過嘅Evans今朝突然約我食早餐，佢睇黎好似有嘢想同我講，不過唔知點解，我覺得我同佢中間好似有左度無形隔膜咁。「係呀，真係估唔到佢係啲咁嘅人，唔好講埋啲衰嘢啦，飲啦，呢round我嘅！」「下…飲咩呀？」「我地兩兄弟一齊乾左呢杯奶茶去，陣間再嗌多杯涷華田再劈過，拿陣間大家不醉無歸呀下。」其實我呢刻望住Evans，就會諗起佢平時同Daisy幾咁親密，為左唔畀佢知道我點諗，我唯有亂講嘢黎敷衍佢。不過Evans都唔係傻得晒，佢都睇得出我係有啲嘢，佢無理我啲胡言亂語，一臉正色地道：「James呀，其實我真係真心當你係朋友，我見你呢排好唔妥，我好擔心你。」「你唔好借頭借路想扮關心我，之後灌醉我喎，我唔係咁隨便架。」「我認真架James，你係咪發生左啲咩事黎呀，自從上次你畀人淋尿，早排又開開下OT玩失蹤，我同你一場朋友，有咩事我一定會幫你。」望住眼前古道熱腸嘅Evans，我睇得出佢真係一片赤誠想幫我，Evans真係一個好人，好朋友。「放心啦，有咩事我會話你知，我應承你我如果第日爭人錢第一個搵你幫我找數啦。」Evans聽完之後，繼續用果道誠懇嘅目光望住我，一直咁樣畀佢望住，唔知點解我覺得好自慚形愧。為左唔想佢再追問，我唯有改變一下話題：「喂你條友仔話晒都係人事部呀，不如你幫我打封信升左我職同加我人工算啦。」Evans聽到之後，原本一臉認真嘅佢終於笑左出黎，佢話：「其實早幾日返屋企我daddy都有同我講呢件事，佢問我想唔想試下坐阿Kate個位去做下management…」「你個社運仔成日要維護公義，唔使問你都一定係拒絕左你老豆啦。」「咁又唔係喎，我話我會考慮下，自從知道Valarie係啲心術不正嘅人之後，我都怕佢會坐左阿Kate個位。」
其實我心裡暗暗地盤算一下，Evans坐阿Kate個位真係最好嘅選擇，Evans份人出晒名好，而且又係公司入面嘅blue blood，佢肯做其他人應該都無乜異議。不過我係有啲奇怪一向與世無爭，唔多理公司嘢嘅佢，點解會突然咁進取？不過我無開口問佢，同樣身為男人，我自己心入面大慨都有答案。一個男人無端端想認真對侍事業，應該都係佢想成為一個可靠嘅人，令到女人放心投身於佢。諗到呢度，我腦海再次浮現左Daisy個樣。點解我眼前呢個咁值得深交嘅朋友，咁值得支持嘅未來波士，要同我鍾意埋同一個女人？諗到呢度，我忍唔住開口嘆一句：「點解Evans你要鍾意女人呀，你鍾意男人咪一天都光晒囉。」Evans聽到我呢句突然冒出嘅說話，好驚訝咁問我：「其實James……你唔好介意我問，你成日同我講同性戀話題，你係咪鍾意左我呀？」我估唔到Evans竟然會有啲咁嘅誤會，心裡暗覺好笑，不過見佢咁認真，我又忍唔住玩下佢：「咩呀，明明係你鍾意我畀signal我先嘅，你唔係鍾意我點解要對我咁好呀，喂你係一定零黎架？」Evans急住澄清話：「我剩係鍾意女人架咋，我有意中人架啦。」唔洗問都知，佢意中人係邊個。原本想玩落去嘅我，一聯想到佢同Daisy之後發展會有幾順利之後，我就無晒心情。Evans見到我一臉落寞咁，佢誤會左我係因為畀佢拒絕而唔開心，佢即刻話：「不過我地仲可以做朋友呀，我唔介意架。你知啦性取向呢啲野真係無得勉強架嘛，我都唔係想拒絕你hurt你，不過我怕你浪費時間喺我身上咋……」見到佢咁認真，我都忍唔住沒好氣地講左句：「Evans哥，我有時真係唔知你係真係豬咁醒定係扮豬食老虎架。」
一返到公司樓下，我就見到阿虎，我使開左Evans之後走埋去問佢點解會喺公司出沒，佢話：「老表他叫我保護他，他要我護送他回公司，他真是他媽的神經病，那個大明也怕。」「阿虎哥，不如我畀多幾舊水你，你喺附近幫我留意下見唔見到大明呀。」「你也是神經病的，咱們一場兄弟，你要我幫手，不用給錢也成啦。」「咁唔該晒你啦，我返上公司先啦。」「先不要走，雖然我們是朋友，我是可以不收錢去幫你，不過今天我沒帶錢包出來，可不可以先給我幾百塊。」仆你個街，明明都係睇錢份上，但硬係要同我黎呢一套浪費我時間。
阿油好似隻驚弓之鳥咁，一見到門口有人入黎，佢就會即刻起身望下係邊個。我入門口之際，佢見到係我先放心坐返低，之後我行左佢個位問佢：「點呀網絡福爾摩斯，有無整到啲咩咁呀，你個華生而家畀我老點做警衛，我警告你唔好無用過佢，點都交小小貨黎好呀。」「喂你估真係好似電視劇咁，我睇一睇佢ip就搵到佢喺邊咩，你當我CIA呀。」「咁即係無料到啦下話？」阿油突然好有自信咁笑一笑，佢話：「咁又唔係喎，我搵到佢曾經化名Petbe send過好多email畀Valarie？Petbe喺埃及神話入面係復仇之神咁解……」「妖！啲龍友真係痴線，中二病咩醫好呀，復仇之神。不過你都不愧為死毒撚，咁樣你都知，肯定又係打機學返黎架啦。」「咁又唔係，我都係上wiki查姐。」「咁啲email入面講啲咩？」「啲email入面全部都係暗號黎，我仲未解讀到。」雖然阿油講左好似等如無講咁，不過知道左大明同Valarie之間真係有關聯都算係個好開始。