今日我開始左對公司啲同事進行復仇大計: 第五十四節
Daisy臨返黎之前，佢喺台灣機場度臨急臨忙打左個電話黎要我去接佢機。由於只喺得幾個鐘時間，我喺完全無準備之下就戇居居上左機場巴入機場。喺果程車上，我一直喺度諗既然都解決左大明，而家係咪同Daisy認認真真咁開始嘅好時機呢？我相信Daisy叫得我去接佢，而唔係叫Evans又或者其他男仔去接佢，我喺佢心目中嘅地位應該都算穩固，再加上佢之前都已經知道我係鍾意佢……但我到今日都諗唔通，點解佢覺得我係緊張Miki多過緊張佢？我一路諗一路望住窗外果條濕滑嘅公路，我始終都諗唔通，我什至畀呢個問題困擾到想架巴士發生意外等我唔洗煩。喺我望住窗下雨境獨自愁緒之際，喺我身後突然傳黎一陣嘈雜嘅電子聲，如果我無聽錯應該係黎自果啲手機game。我擰轉頭一望，我見到一個二十幾歲，染住金毛，相貌唔差但又帶有一浸濃濃嘅鄉土味嘅少女正喺度旁若無人咁玩緊電話。雖然佢身旁有一個Marc Jacob布袋，但佢果個痴滿惡俗閃石嘅電話殼同佢果啲搽左鮮紅色指甲油嘅指甲已經出賣左佢，佢就算幾努力想去扮一個MK妹，但佢都應該係黎自強國，畢竟有啲嘢真係基因黎，你點掩飾都好但細節始終會出賣左你。由於我已經畀Daisy同Miki呢兩個女人搞到我心煩意亂，但連想喺巴士靜下都畀呢件強國少女煩住，架巴士上層仲要係得我同佢兩個，我忍唔住用唔多純正，程度同古天樂先生相約嘅普通話問佢：「小姐，你知不知道什麼是耳筒呀？」突然見我同佢講嘢，原本專心打緊機嘅佢略帶錯愕咁望住我，之後用一把充滿風塵味嘅聲線，再加上一口充滿鄉音嘅廣東話反問我：「你講乜春呀？」見佢竟然識得講廣東話，雖然講得唔多正，不過我都打算嘗試同佢講下道理：「耳筒呀阿姑，即係戴喺耳仔度聽到嘢果啲嘢呢？你鄉下係咪無得賣呀？」佢又重覆返果句：「你講乜春呀？」見佢黎黎去去都係講住同一句嘢，我開始懷疑佢其實剩係識得一句廣東話，所以我決定雙語問佢：「係咪啲雞蟲剩係教得你一句廣東話呀？呀普通話點講雞蟲呢，呀，係，即係嫖客呢。不過唔緊要啦，我跟你說普通話好了。」
其實都唔知佢係咪剩係識得一句廣東話，因為佢又滿臉怒容咁重覆多次：「你講乜春呀仆街？」係，今次佢仲講多左三個字，不過識得講仆街都不足以證明佢係識廣東話。所以我為左保險，都係講返普通話：「如果你他媽的知道什麼是耳筒，為什麼不用呀？你知不知道你玩電話真是他媽的吵呀。操你媽的，你當這裡是骨場嗎，你知不知道你吵著我呀？」呢位強國少女正想反擊嘅時候，唔知係好彩定唔好彩，佢竟然要落車。佢雖然好似好想留喺度同我舌戰，但佢都唯有急忙拎埋啲行李落車，喺臨落車果陣佢轉身向我舉中指同我講：「你小心啲呀，唔好畀我再見到你呀。」我無動氣，只係面帶微笑咁同佢講：「咁你放心，我都唔叫雞嘅，我同你應該唔會有相見嘅機會啦。至於小心啲呢個忠告你都係留返果啲堅持唔戴套吹嘅嫖客講啦。」
無幾耐我就去到機場，喺Daisy未黎到之前，我決定參觀下啲空姐……呀唔係，我指機場，我決定參觀下機場。其實我又細到大都好鍾意去機場嘅離景大堂度，睇住啲人一邊講bye bye一邊喊苦喊忽。特別係仲讀緊書果陣，見到啲情侶有一方因為要去外國讀書所以被迫分離，見到佢地依依不捨咁話別我就通常喺心入面暗笑。挑，過多一兩個月你地咪又係散。當然人大左，就覺得呢啲別離情景更加可笑，如果唔係有Facebook，果啲你當年喺機場度攬頭攬頸，話咩友誼永固嘅朋友，喺佢地走左一頭半個月你都唔記得左佢啦，喺離景大堂度笑人地笑左陣之後，我就收到Daisy個電話叫我行去接佢……
見到Daisy一刻，我無我自己想像中開心，而佢亦無我想像中起勁。喺我一路幫佢推行李去行車站果段路佢都無乜出聲，為左轉換下氣氛，我問佢：「你頭先上機果陣肯定唔夠高放行李上去要空姐幫你啦。」佢終於露出笑容話：「係呀，我仲專登等個靚仔空少行過先叫佢幫手呀。」「挑，有男空姐幫手好叻叻咩，上次我坐飛機果陣我叫啲空姐畀填色簿同顏色筆我呀。」「上次你坐飛機果陣你仲係小朋友？」「唔係呀，舊年咋嘛，不過見悶悶地咪叫空姐畀本填色簿黎玩下囉，反正都唔洗錢緊係咩都問佢攞啦。」「你肯定係見到空姐靚想借頭借路同人講嘢咋嘛。」「咁又唔係喎，拎填色簿果陣我真係因為悶先出聲問；到之後扮遇到氣流，杯香檳倒濕晒條褲果陣就真係撩佢啦，不過佢唔肯幫我抹咋嘛。」佢聽到只係輕輕扁咀打左我一下，呢段無聊嘅對話總算令我同佢無咁尷尬。一直到去到佢屋企樓下之前，我同佢都只係講住無聊嘢，間唔中我又口花花撩下佢咁。或者係大家都有意識咁想迴避，我地始終無深入咁談及我地嘅關係，不過睇得出佢散完心之後可能真係諗通左啲嘢，佢對住我都比之前自然。我有同佢講已經解除左大明呢個威脅，同暗示我地應該可以一齊，不過佢都扮get唔到咁。到臨送佢返屋企之前，我忍唔住同佢講：「其實我真係唔知點樣去解釋我同Miki之間……」佢用隻食指輕按我個咀唔畀我講落去，佢之後話：「早排我可能因為啱啱同前度分手，我都唔知自己想點……我散完心返黎就覺得我地應該要慢慢再了解下大家先，我之前好似迫你向我表白咁，其實我唔係咁心急架，我果陣係好無安全感唔知自己想點咋。我知你而家有好多大事要做，我等你有時間之後先再慢慢去諗一唔一齊呢個問題啦，其實你好似今日咁陪下我我已經好心滿意足架啦。我頭先好開心，多謝你，不如我地維持住呢個關係，等你諗清楚先算啦。」我雖然好想同佢講我已經諗清楚，不如我地而家就開始一齊啦。不過喺講出口之前，心入面又有把聲音叫停我，要我諗清楚。就係咁，我又錯失左一個同佢開始嘅機會。