今日我開始左對公司啲同事進行復仇大計: 第五十五節
自從Evans入左黎之後，我已經唔知幾耐未試過同Daisy單獨食早餐。我望住眼前食緊腸仔嘅Daisy，不禁想得出神，我喺度諗喺呢件事完左之後，我就可以日日過住餵Daisy食腸仔嘅生活啦，但唔知點解諗到呢度，我完全唔覺得有幾幸福，相反我仲覺得有啲若有所失嘅感覺。呢個時候Daisy無端端拍一拍我，將我拉返黎現實。佢扁住咀咁問我：「乜同我食早餐好悶咩？」「唔係呀……」「咁你做咩唔出聲，仲要諗嘢諗到皺晒眉咁。」佢唔講我都唔知自己原來係皺緊眉，我唯有硬擠返個開心樣出黎答佢：「哦你食緊腸，我費事同你講嘢搞到你哽親咋。我有心理陰影呀，好多女仔同我食腸果陣都會因為太心急搞到哽親，你知啦太大條腸都係麻煩架啦…….」Daisy聽到我又喺度講無聊嘢，佢不但唔嬲仲要笑返，佢大發嬌慎咁話：「你把口真係好衰呀，你再係咁我唔睬你架。」「咩呀，我講緊德國大肉腸咋嘛，你諗左去邊呀。我本身唔支持婚前性行為架喎，不過如果你堅持的話我都唯有奉陪啦。」Daisy起身行埋黎作勢扮打我，而我又交足戲咁扮避開佢，喺追逐之間佢唔小心跌左入我懷中，我下意識地諗都無諗就攬實左佢。就喺呢個時候，Evans同Miki行左入公司，佢地正好目擊住呢一幕。唔知點解，喺我同Evans Miki有眼神接觸一刻，我心入面有一絲罪疚感，所以我無乜多諗就推開左Daisy，又可能係我推開Daisy果刻我推得有啲急同粗暴，Daisy喺畀我推開之後向我投以惡狠狠嘅眼神。我唔敢再望Daisy，我亦更加唔敢望向Evans同Miki，呢個時候我唯有好似畀人捉黃腳雞，默默低頭祈望佢地會唔再提呢件事。Evans喺呢個時候好勉強咁笑出黎話：「你地兩個真係呀，咁大個人都仲好似小朋友玩到咁癲，小心撞親呀。」佢講完之後就急急腳咁返埋自己個位，剩低左我，Daisy同Miki三個喺度。
Miki呢個時候行左埋去Daisy身邊，喺佢耳邊講左兩句，之後Daisy點一點頭就跟左Miki行出去。我一邊目送住佢地行出去一邊喺度諗Miki究竟有咩想同Daisy講呢？喺百思不得其解下我再望一望Evans，不過Evans只係喺自己個位度埋頭苦幹，佢無再望過我地幾個。不過佢嘅反應已經證實左佢鍾意嘅係Daisy。我開始擔心，如果我同Daisy一齊左，Evans喺無晒推動力之下會唔會又做返隱世高人不問世事，咁Valarie到時就無晒對手可以坐正啦……為左唔好令到前功盡廢，我喺心入面暗下左一個決定，暫時我都係同Daisy保持返啲距離會好啲。無幾耐Daisy同Miki兩個就入返黎，佢地行入黎嘅時候顯得有啲面左左，我估佢地頭先就算無鬧交，但最起碼都唔係談論啲咩愉快嘅話題。無幾耐啲人開始陸續返黎，我不經意地望到我一排無理嘅Judy，佢今日打扮得尚算性感誘人，應該喺放工之後佢又準備去獵食。可能因為我呢排忙到唔得閒招呼佢，佢以為已經解除左我呢個威脅，所以佢又變返果個自信心爆棚嘅Judy。不過佢今日唔好彩啦，撞正我心情煩躁，為左挫一挫佢銳氣同抒解下我心頭悶氣，我決定過去招呼下佢。我喺扮拎文件去佢個位果陣，故意誇張地望住佢胸前條深溝，佢即時以手遮住，細細聲話：「你想點呀？你話左唔會搞我迫我同你上床架……」我奸笑道：「唔係呀Judy，我唔係因為咸濕先睇你對乳房呀。不過我頭先係好奇想搵下你條事業線上面啲老人斑同摺紋咋嘛。」Judy對住我唔敢發嬲，佢唯有無奈地細細聲轉移話題問：「阿Kate就黎走啦喎，你對付Valarie件事搞成點呀？真係畀佢上到位我地就大鑊啦。」「我唔怕呀，有咩事我都仲有你啲罪證黎向高層保命投誠呀，不過你就真係大鑊啦，佢上左位第一個唔係對付你我就真係跟你姓都得呀。」Judy好驚咁望住我話：「我已經咩都照你吩咐去做架啦，你點先肯放過我呀。」我拍一拍Judy膊頭同佢講：「你落力啲諗計整走Valarie，唔只可以自救，到時你係我恩人呀。到你做左我恩人，我就算唔以身相許報答你，都最起碼唔會害你呀。」其實我唔洗多講，Judy一早已經係復仇者聯盟嘅穩膽黎，佢只係需要多啲推動力。
Valarie一直望住我同Judy喺度傾密計，而我喺返埋位之前亦故意行去佢個位身度，大大聲問佢：「喂Valarie，我早幾日撞到大明呀，佢好似變左好多咁。聽聞你同佢好friend架，佢辭職之後搞咩變到咁呀。」呢個時候全公司都望左過黎，而阿輝喺聽到大明呢兩個字之後，用住最恨毒嘅眼神望住Valarie睇佢點答，Valarie硬擠左個虛假嘅笑容話：「我同佢其實都唔係好熟……」「唔係喎，有人見到你同大明成日喺公司附近傾密計喎。老老實實啦，你地兩個係咪想私下出黎搞生意飛起我地先，有好路數唔益我地，我嬲你架。」「可能係佢地睇錯姐，我都好耐無見過大明……」見到Valarie一臉尷尬但又唔可以向我發作，我忍唔住笑左出聲：「呢排真係多人睇錯你呀Valarie，我識得有人早排話見到你同幾個黑人喺棟唐樓附近出入，仲好似好親密咁，我都話實係佢地睇錯啦。Valarie姐出左名守婦道，點會出去同人勾三搭四先。講真呀Valarie姐，如果你今次同阿鬼佬都係結唔成婚，我James自己出錢幫你打造個貞節牌坊，以紀念你呢個女性典範。」Valarie終於忍唔住黑面，佢話：「同事我要做嘢啦，你唔好講無聊嘢阻住我啦。」「Valarie姐你真係勤力工作呀，喺呢間公司真係浪費左你呢種人才，不如你出外發展啦，我地一班同事都會好支持你，唔信你望下佢地。」在場嘅所有人，除左果件唔知係Katy定Kathy嘅不知名生物同埋頭苦幹嘅Evans外，大家都係一副幸災樂禍嘅表情，Valarie呢一刻應該明白到咩叫大勢已去。