今日我開始左對公司啲同事進行復仇大計: 第六十六節

由於Daisy尋日出手實在係太突然，我嘅腦袋對於佢突如其來提出嘅嘢一時間亦都未反應到。我尋晚完全訓唔到，我只能夠呆呆咁望住天花板咁嘗試去組織一下呢件事，由於苦思左好耐都諗唔到答案，我竟然喺whatsapp度將件事話左畀Miki知，求救於佢。隔左一陣，佢覆左個頗長的message話：「我相信你應該可以處理好件事暫時唔會畀Evans知道，至於之後點就之後先算啦。另外，以我同樣作為一個女仔，我覺得以我所認識嘅Daisy其實唔係一個可以單身得耐嘅女仔，佢自從畀佢個ex拋棄之後都好一排無拍拖啦。再加上你近排又咁忙成日唔搵佢，對住若即若離嘅你佢咪唯有主動出擊囉。點都好啦，James你好啲對人啦。Daisy都係一個好女仔黎，我都想你地開心。」我其實好有衝動想回佢，我都想Miki可以開心同幸福，奈何我知道佢嘅開心同幸福係建築喺一個對佢不屑一顧嘅男人身上，一諗到呢度，我就覺得好心酸。唔知點解，呢種心酸嘅感覺完全將我尋晚嘅所有甜蜜同幸福嘅感覺掩蓋左。喺訓下醒下嘅情況之下，我終於捱到天光，喺朝早八九點嘅時候，我收到我女朋友Daisy嘅message，哈，女朋友Daisy，我仲係覺得呢件事好無實感，喺message度佢話：「對唔住呀James仔，一早嘈醒左你。不過我今日好想你陪我去下街呀，你可唔可以陪下我呀？」其實Daisy叫到，唔好話陪佢行去街，佢叫我陪佢行火海我諗我都會照樣奉陪。

 

不過陪女人行街，某程度上真係可以慘過行火海。同Daisy首次拍拖嘅第一站，竟然係陪佢買衫，仲要唔係普通衫，係佢買黎著去人地婚禮嘅衫。「其實又唔係你結婚，求其著得得體啲咪得囉，洗咩專登買衫去呀？」Daisy扁一扁咀話：「死人頭，我地第一次拍拖，叫你陪我行下街你都有意見，我嬲你架。」「傻妹黎嘅，我邊係有意見姐，不過我天生好奇心重，同我關心你，想了解下你嘅心態咋嘛。你去人地個婚禮已經要畀七八舊水做人情架啦，而家仲要又置裝，好大投資姐。」佢咬一咬唇之後話：「你地男人唔明架啦。我結婚呢個朋友係我中學同學黎，好耐以前我地仲爭個男朋友架啦。就算佢結婚我唔會畀佢靚晒架，嘻嘻James仔，我係咪好衰呀？」咩你地啲男人唔明姐，我直頭係恍然大悟，即係明白晒成件事啦。我終於明點解Daisy會咁心急突然話要同我一齊啦，除左係因為我近排對佢若即若離之外，原來仲撞正佢中學時候啲敵人竟然爬佢頭結婚。睇佢一副如臨大敵嘅認真樣子，作為男人雖然我理解唔到呢種心態，不過我不得不承認呢一刻嘅Daisy係幾可愛。「哈哈，咁又唔算衰嘅，雖然已經係陳年舊事。不如我都去買返套靚老西，同妳襯埋一set咁去啦。」「你真係肯陪我去？你唔好誤會呀，我今日真係叫你陪我一齊揀衫，我想知你覺得靚唔靚架咋，我唔係要暗示叫你陪我去架，你唔想去可以唔去架。」我摸一摸Daisy個頭，之後同佢講：「你都唔嫌我甩皮甩骨唔見得人啦，我知黎緊喺公司我地要搞地下情已經委屈左你架啦，今次就等我陪你去融左隻魔戒……呀唔係，我意思係等我同你一齊去個婚禮啦。」Daisy甜笑住咁話：「咩魔戒呀，我都唔明你講咩，不過你個衰人肯定又係笑我啦。好啦本小姐就批准你陪我去個婚禮啦，但你到時記住要乖乖地，唔好亂講嘢呀知唔知道？」叫我唔好亂講嘢？我份人咁正經，講嘢又有分寸，Daisy嘅擔心真係多餘。

 

為怕畀公司同事，特別係Evans撞到，我同Daisy喺公眾場合度一陣都唔敢拖手。就連我地之後食飯都專登揀返去佢屋企附近食算，我仲記得上次黎呢度搵Daisy果陣，佢仲怪我唔知自己想要咩。唔知呢一刻，佢仲會唔會覺得我心中最著緊果個係Miki呢？一諗起Miki，我個心入面就泛起左一絲異樣，本身拖住Daisy嘅我不自覺地鬆開左隻手一下，Daisy即時好奇怪咁望住我，我回過神黎再拖住佢隻手之後話：「無呀，我就係想試下你啲反應有幾快咋嘛，哈哈原來都幾快架喎。」Daisy靜左一靜之後話：「其實我都一排無拍過拖，我都覺得我地一齊得太突然。不過老實講，我覺得你呢排成日都好似好忙咁，我唔搵你你又唔搵我，我怕如果我唔提出的話，你會畀人搶走。」我緬甸一笑話：「傻豬黎嘅，你當我係余文樂陳冠希咩，有鬼人同你爭我咩。我老實同你講啦，高層John Chong最近收左我做佢入室弟子呀，不過佢份人仲即興過我呀，成日失驚無神拉走左我…..」佢聽到之後好興奮咁問：「真架？James仔你好叻叻呀，你要加油呀。唔得閒陪我唔緊要，不過你記住記住要上進，唔好浪費左你自己呀。」我好想話畀佢知道，我其實群埋莊神度，都係貪玩為主，我依舊都係唔上進。不過為免破壞好氣氛，我只係走上前輕吻佢嘅額頭，之後同佢講話：「拿Daisy姐，你自己話架，我真係可能會隨時畀John Chong叫走架，到時你唔准嬲架。」佢走上前緊緊攬實我，之後略帶吃力咁屹高錫左我一啖，之後就話：「放心啦，我會識做架啦，你要加油呀。」