今日我開始左對公司啲同事進行復仇大計: 第六十五節

不得不承認，小弟James雖然智勇雙全，但喺感情事方而我真係唔太識處理。我雖然知道應該要去搵返Daisy，同為近排冷落左佢而道歉，不過我又唔知點開口好，亦因為咁我就一直拖住唔太敢搵Daisy，喺呢個惡性循環之下我就冷落得Daisy更加耐。終於，Daisy過左咁多日之後，忍唔住send個whatsapp黎話：「星期五放工食飯，無得推，唔聽解釋。」從佢咁決絕同堅定嘅語氣黎睇，我懷疑佢應該係想攤牌。不過為怕莊神今日又有嘢搞阻住我去搵Daisy，我先發制人打左畀佢秘書Alison問：「Alison，我想問你老細今日有無準時食藥呀？因為我今日有啲嘢做，唔得閒睇住佢呀，你記住要小心啲呀，如果畀佢咬到之後要打好多針架。」Alison聽到我咁問之後，忍唔住偷笑，過左一陣之後佢扮返正經咁話：「多謝你關心，我陣間直接駁你入房畀你同佢講啦，因為莊生佢一向無schedule，我都唔知佢幾時得閒幾時唔得閒架，但佢之前出左去兩日，我估佢今日都係想休息下陪下Queenie姐嘅，你應該可以放心。」「Alison你真係善解人意架姐，下次我上黎果陣買盒朱古力請過你食啦，不過你記住唔好畀我師父食啲朱古力呀，有啲畜牲例如狗，佢地食左朱古力會死架。」Alison一邊偷我一邊駁我入莊神房入面電話，莊神一拎起個電話就開始鬧：「你隻小畜牲，你果晚黎我屋企果陣係咪對我契媽始亂終棄呀下？佢自從果晚之後就好似好悶悶不樂喎，我警告你呀，搞咩女人都得，但唔准掂Jasmine。」「真係咩女人都得？搞你老婆得唔得先？師父，我覺得你老婆好賢淑呀嘻嘻。」「你頭畜牲真係死剩把口，再搞咁多嘢講信唔信我陣間就叫Robin上去你公司度拎啲工業用膠水封住你把咀。一早打黎係咪有所求呀？怕我今日又黎搵你呀？你行運啦，為師今日全日都好忙唔得閒應酬你呀，你自己寫好尋日個觀察報告聽日自動現身再畀為師過目啦。」好，就咁解決左莊神呢個麻煩友先，呢個時候，尋日毫不猶疑地出賣我嘅阿油突然出現喺我個方面前，而且佢手上亦拎住一啲嘢。

 

「James哥呀，對唔住呀，你尋日關心我行蹤我反而咁惡對你……」我故意好惡咁問佢：「咪住先唔好講呢啲嘢住，你頭先有無偷聽我個電話講咩，你快啲老實答我。」阿油本身對住我已經好戰戰兢兢，而家再畀我兇一兇之後佢好似驚到又想喊咁，佢好緊張咁話：「無呀無呀，我乜撚都無聽到呀，我乜撚都唔知架James哥，你唔好殺我呀。」我繼續兇神惡煞咁問佢：「真係無？」「我真係乜撚都聽唔到，乜撚都唔知架，我求下你信下我啦。」見到佢而家個反應，其實我真係好想大笑，不過由於唔想穿煲，我除左努力忍笑之餘，我仲要好努力咁擠出一個皮笑肉不笑，一睇就知係虛偽嘅笑容同阿油講：「放心啦，阿油，我確認一下姐，你都唔洗講晒粗口咁嘅。其實都唔係咩大不了嘅事，頭先個電話涉及少少我出面啲秘撈，所以我先唔想畀人知姐。唉真係麻鬼煩呀，我明明應承左個客今個月幫佢搵到十個……呀唔係，我意思係十件貨，點知幫我搵貨條友又唔夠交帶，竟然畀一個走甩左……呀我又講錯，我意思你唔見左一件貨呀。係呢阿油，你有無喺網上識到啲單身獨居兼無咩朋友，死左都無人知嘅IT宅男呀？如果有你不妨介紹我識呀。」阿油驚到個身都震晒，不過佢為左扮唔知情，佢好努力咁表現到好鎮定兼亁笑幾聲咁反問我：「我……我同阿虎一齊住，而且都叫有朋友，又有Miki，唔算係你口中講果啲死左都無人知嘅毒男呀呵？」我一邊陰陰咀笑，一邊由上而下咁打量住阿油，但不置可否，佢繼續講話：「James哥呀，其實我無乜毒男朋友架，不過我嘗試幫你物色下啦。」「物咩色姐，乜你講得咁奇怪嘅，我都係想交多幾個朋友姐，你講到我好似揀貨咁。點解你今日啲態度咁奇怪嘅，係咪發生過啲咩事我唔知架？」「無……無事發生過呀，我無知道啲咩呀……」我用疑惑嘅眼神望住佢，畀我咁樣望法之後阿油開始驚到標冷汗而且腳都震埋，良久之後，我用陰沉嘅語氣話：「最好就唔好畀我知道你喺我背後做過啲咩黎啦，我最憎畀人出賣架，我對啲二五仔真係唔會客氣架。」

 

阿油見勢色唔對，即刻將手中嘅物件遞上前畀我話：「James哥，為左表示我尋日態度差嘅歉意，呢一部平板電腦係我送畀你作為道歉架。雖然開過黎，不過唔係因為係二手嘢，而係我幫你裝過啲程式方便你用咋。」阿油可能唔知，由佢上前遞部平板電腦開始，除左佢隻手不停咁震之後，而且佢好明顯係排練過好多次佢嘅對白。佢好努力想釋除我以為部嘢會係二手嘢嘅疑慮，但又偏偏暴露左佢怕我起疑心係因為部嘢佢曾經做過手腳，睇怕佢為左自保，一定喺拎部平板電腦裝過唔知啲咩黎反監控住我。原本都算係一條好計黎，但佢拙劣嘅演技出賣左佢。我繼續一臉陰沉地問佢：「以前你試過上黎幫我整電腦但又竟然出古惑，我怕你今次又係咁。好啦份禮物我用之前會搵人check下先架啦，如果畀我發現到有啲咩，你唔好怪我唔客氣喎。」阿油聞言即刻一手搶返部平板電腦，之後硬擠一個勉強嘅笑容話：「呀，我真係大慒啦，呢部嘢係阿虎架，我拎錯左，我下星期先送部畀你啦。對唔住呀，突然醒起有嘢做我返返埋位先。」喺阿油拎住部平板電腦跑返返自己個位先，我見到有一道水痕沿住佢嘅褲管喺地上劃過，如果我無估錯的話，阿油頭先應該驚到賴左尿。







到左放工時間，我同Daisy好有默契地前後腳走人。去到公司樓下果陣，我撞到同樣係放工走人嘅Miki，佢問我：「陪莊神玩左咁多日，有無啲咩得著咁呀。」「有呀，莊神傳授左一套心法，係專用黎呃你上床架，好快你就會見識到架啦。」Miki只係白左我一眼，之後講左句：「玩還玩唔好唔記得你仲要幫Evans呀。」之後就揚長而去，本身好緊張地盤算緊要如何同Daisy解釋嘅我，唔知點解同Miki只係短短講左兩句嘢，我嘅心情竟然有啲放鬆左。我突然覺得，如果今晚同我共晉晚餐嘅係Miki的話，我應該會好開心。不過點都好啦，我對Daisy的確係有所虧欠嘅，喺去晚飯地點嘅途中，我一直撫心自問自己究竟仲係咪真係鍾意Daisy，我喺諗左好耐之後，發覺我的確仲係對Daisy好有好感，亦都真心想佢幸福快樂，不過我真係唔知自己係咪畀到幸福快樂佢嘅最佳人選。但係點都好啦，如果Daisy今晚係要選擇攤褲，想斷絕來往的話，我都唯有要接受。由於Daisy畀我早喺公司度走，所以佢亦都畀我早到達間餐廳。原本以為Daisy見到我會一臉不高興，但相反佢一黎見到我就甜笑住話：「我好肚餓呀，乜你咁遲架。好啦就罰你請完我食晚餐之後仲要請我食甜品啦。」乜我地唔係出黎攤牌架咩？面對住Daisy出乎意料嘅攻勢，我真係招架唔住。而且佢甜美嘅笑容同佢清純得黎又帶點可愛佻皮嘅語氣，將我果顆鐵石心腸完全融化左。我相信如果呢一刻Daisy要我畀晒成副身家佢，我都可能會乖乖答應。我望住眼前甜美可人嘅Daisy，內心不禁泛起起絲絲內疚，我真係唔應該冷落左佢架，不過唔緊要，我會用之後嘅時間對佢好好黎補償。

 

我一坐低左，正想同佢道歉之際，點知佢先發制人，比我更早話：「對唔住呀James，我呢一排成日都唔知點咁，無乜關心你又好少搵你。」下？點解啲嘢會調轉左黎講嘅，正當我懷疑佢係咪食錯藥之際，佢接住話：「早排Miki同我講，話佢覺得Evans鍾意左我，佢提醒左我要小心啲，唔好因為想同你發展而離間左你兩兄弟啲感情。我一直喺度諗應該點處理，所以亦都因此而唔係好搵你，sorry呀……」本應想道歉嘅我，反而做左被道歉嘅一方，我一時之間都唔知應該點處理好，佢唔畀我反應，繼續講：「我諗左好耐，我都係想同你發展下，所以我早幾日都向Evans暗示左我係比較緊張你，我知佢有同你講過呀。先旨聲明我唔係怪你唔搵我呀James，我係想暗示畀Evans知咋。」我知道Daisy都開到口話想同我發展，我估我地今晚應該都可以順利開始，不過唔知點解我忍唔住問Daisy：「其實你鍾意我啲咩呢Daisy，我真係好想知我初初對你咁衰，但你又點解會鍾意我？如果單單係因為斯德哥爾摩症，我怕你會後悔呀。」Daisy呢個時候又甜笑。頂！一見到佢甜笑我就心跳加速，完全招架唔住，佢諗左一陣話：「我都唔排除一開始係因為你一時對我好衰，一時又對我好先會令我在意你。不過相處落之後，我覺得你好特別，我覺得我一世都唔會遇到其他好似你咁奇怪嘅人。」「你真係傻豬黎架喎，奇怪你就鍾意，你之前啲男朋友係咪喺馬戲團搵架？」佢扁一扁咀話：「關你咩事姐，其實你都好衰呀，我唔搵你咋嘛，你唔識自己黎搵人地架咩。」「我……我以為你心情唔好，所以唔想打擾你姐。其實我都有掛住你架Daisy。」「我唔理你呀衰人，今晚你要帶我去食好食嘅甜品補數呀。」「哦……你話點就點啦，唔好話食甜品呀，我估而家你叫我帶你要食和牛，我都會即刻飛去日本捉隻畀你食架啦。」「咦，口甜舌滑。成日都係得把口。」

 





其實我唔知係咩令到一直猶豫不決嘅Daisy下定決心，會喺今日變得咁進取。可能係我近排無乜理佢，令到佢以為我移情別戀，佢覺得受威脅所以先要主動出擊掛。其實一涉及感情事，我就真係無乜頭緒，但呢一刻望住眼前甜美可人嘅Daisy，我已經諗唔到咁多嘢，我剩係好想保護佢同畀幸福佢。Daisy見到我望佢嘅眼神，大慨都諗到我應該係想同佢認真發展，呢個時候佢突然一臉正色咁問我：「Evans方面你打算點算呀？如果而家佢知道我同你一齊，會唔會影響你工作上嘅大計架？」我一念及Evans呢個問題就覺得頭痛，我都唔知應該可以點處理，好彩Daisy亦都明白到我嘅苦處，佢主動提出話：「其實暫時短期內我唔介意唔公開先，不過暫時架咋，啲事情一上左軌道之後，我就唔會再接受地下情架啦。」既然連Daisy都肯屈就同我唔公開住，去到呢一刻，我又的確再諗唔到啲咩理由去拒絕佢。喺感情上，我雖然通常都會比較畏首畏尾，但呢一刻我再控制唔到自己了。就係咁，我同Daisy就喺呢一晚，開始左我地嘅地下情。