今日我開始左對公司啲同事進行復仇大計: 第六十八節

究竟莊神係一個鍾意觀察世事洞識世人嘅鬼才，定只係一個有太多時間剩又鍾意八卦人地的生活嘅變態佬，我到而家都搞唔清。不過唯一可以肯定嘅係，我地呢間分公司應該係佢嘅最愛。好難想像一個公司高層會對一間分公司嘅所有事都咁了解，佢平時一定用好多時間去收集有關我地嘅情報。而喺我地公司嘅眾多玩具之中，佢一直無乜提過最關鍵嘅幾位阿姐，不過到今日，佢終於對佢地出手了。我一直都估以佢嘅觀察能力，Judy曾經喺公司出古惑一定暪唔到佢，但我當時唔敢直接問莊神啦，好彩，今日佢將會親身解答我嘅疑問。平時少有出現喺我地公司嘅莊神，今日突然代替Sam姐出現喺我地公司。由於佢喺一眾高層之中算係最神秘果個，所以連平時最鍾意做到出面擦老細鞋嘅Valarie都唔敢同佢講嘢，當然我地其他一班同佢有的交嘅人都喺當眾都同佢扮到唔識咁，不過我都好擔心會露左啲咩端倪畀Valarie察覺到。喺呢個時候，跟隨莊神而黎嘅Robin突然畀阿油拉埋左一邊，見狀我即時高呼話：「Miki，你個阿油佢竟然三心兩意，佢明目張膽喺你面前溝女呀，飛左佢啦。」阿油聞高即時想回頭解釋，但我估佢都係比較擔心自己安危，所以佢都係決定唔理其他人眼光咁同Robin喺一邊密密傾。莊神見狀向我打打眼色，心領神會嘅我即時走埋去，阿油見到行緊埋黎嘅係我就即時收左聲。我故意先惡狠狠咁睥左阿油一眼，再扮到好緊張咁同Robin講：「呢個死毒男成日都好似未食藥咁亂講嘢架，如果佢講左我咩壞話都好，希望你唔好當係真呀。」Robin亦都交足戲，喺見到我行埋黎果陣扮到好似好驚咁，而聽到我呢句對白，佢又扮到口疾疾咁答我：「放心啦同事……我……我連你係邊位都唔知，點會記住你啲壞話呀。」在旁嘅阿油已經驚到連向我辯護都唔記得啦，莊神見到咁有趣，即時行埋黎參一把腳話：「呢兩位男同事，我知道我嘅助手係好靚，不過呢度係公司黎，麻煩你地唔好騷擾佢。」

 

我故作慍怒咁向莊神反擊：「先生你邊位呀，我知你好似係公司高層，但一黎到就侮辱我人格我真係唔認同。我對公事一向都好認真架，唔似得有啲人公器私用，出公司數請埋啲靚女返黎慢慢嘆。拿先旨聲明，我唔係話你呀，唔好炒我呀高層。」雖然係假戲，但我都決定落力地真做，而且仲打算借勢鬧返莊神夠本。佢為左貫徹佢世外高人嘅形象，故意不慍不火咁講：「各位好呀，我姓莊，叫John Chong，係你地公司嘅顧問黎，突然阻住大家做嘢真係唔好意思啦。」我用佢可以聽得唔太清楚嘅聲量搭咀話：「莊莊？咩名黎架，不過見你行將就木，好快就入得義莊架啦。」莊神睇黎畀我講到動左真火，佢即時黑住面問：「同事，你頭先講咩話？」我即時笑騎騎咁答：「無呀莊生，我話我估你喺屋企應該係排第二，所以咪叫諗緊你個乳名係咪叫二莊囉。」其他不知就裡嘅人，特別係Valarie同Judy，佢地好似屏息以待等睇我畀莊神炒，但其餘知情人士即一副無我地咁好氣嘅樣子，各自埋頭工作。由於平時都畀莊神恰得多啦，我決定襯住佢而家唔可以發爛果陣講多兩句。我繼續對佢窮追猛打問道：「阿莊生，平時喺公司都好少聽到啲人提起你喎，其實你啲咩顧問係做啲咩架？係咪平時開會提兩句意見就收得工架啦？我以為得我地啲但下層員工先有啲無謂人架姐……拿莊生我真係唔係話你呀，不過見你上左黎咁耐都唔知你搞咩，我好奇咋。」莊神做左個「Youare dead」嘅口型之後，就無理我轉身步向Valarie同Judy。呢個時候Valarie即時好熱情咁走埋黎話：「莊生，唔好意思呀，我地公司係有好多啲好低質素嘅員工，不過遲啲我會著手整頓下架啦。」嘩，條八婆真係當自己坐正左咁，遲啲整頓？佢當自己係咩身份呀？但莊神完全無視左佢，Valarie估唔到莊神會咁，即刻一臉尷尬咁自己收皮。

 

無視左Valarie嘅莊神急步咁行埋Judy身邊，之後用好溫柔嘅聲線話：「呢位咁美麗嘅小姐，我初初入到公司見到你果陣真係呆左呀，以為呢間公司仔點解會落咁多本買個希臘女神像返黎，唔知呢位小姐點稱呼呢。」Judy見到Valarie畀莊神當眾落面本身已經心頭大樂，而且莊神仲當眾讚佢，佢即時甜笑住答道：「我叫Judy呀，莊先生你好。」莊神呢個時候好滿意咁笑住話：「Call me John，大家個名嘅initial都係J, 你信唔信命運架？喺今日遇見你之後，我開始信啦。」我即時插科打諢咁話：「嘩叫James，initial都係J姐，阿John呀，話唔定我同你今日相遇都係命運黎架喎。」我其實心知莊神而家絕對唔係單單因為見到Judy見獵心喜，佢搞咁多嘢嘅背後一定係有目的。不過由於我真係睇唔通佢究竟搞緊啲咩，先忍唔住講多兩句提醒佢我嘅存在。莊神依舊係唔理我，繼續用一副含情密密嘅眼神望住Judy，之後當住咁多人面前話：「Judy小姐呀，你信我，我平時好公私分明，不過遇到你我覺得係我嘅destiny，唔知你肯唔肯賞面今晚同我食餐飯呢？如果你喺咁多人面前唔好意思答我都唔緊要架，呢個係我秘書電話，你陣間打畀佢再畀個答案啦。」Valarie不單畀莊神無視，而且莊神之後仲當住大家面去約佢宿敵Judy，唔洗問都知佢而家一定係心頭大怒啦。但包括我在內，所有對莊神有認識嘅人都好似對佢嘅行為摸不著頭腦，不過我可以肯定，如果Judy肯應承佢，我今晚就有好戲睇啦。







今次同以往兩次觀察活動有啲唔同，身在蝙蝠車嘅我，身邊嘅並唔係莊神，而係一直替莊神去行動嘅Robin，而莊神今次決定親自落動，成為喺螢幕上面畀我地監察住一舉一動嘅人。地點依舊係果間經莊神特別改裝過嘅餐廳，不過莊神應該叫人悉心將間餐廳製飾得grand啲同浪漫啲以迎合Judy呢條死港女。睇黎Judy喺一放工之後，就即刻返飛的返屋企打扮過下先出黎。佢一身白色deep v長裙，再加埋對高到嚇死人嘅high heels，客觀講句其實真係幾索，難怪佢可以橫行夜場食仔無數啦。莊神一見到佢黎到，就即刻行出去迎接佢，而且一黎就好熱情咁鍚Judy隻手，目睹呢個情景嘅我冷笑左一聲話：「老淫蟲又喺度諗埋啲咩觀察人類嘅理由，借機抽女人水啦。」Robin聞言之後即刻冷冷地望左我一眼之後話：「你個賤人自己立心不良，就唔當晒其他人都好似你咁cheap啦。莊生對你咁好，你仲成日喺背後講佢壞話，你呢啲人渣真係特別忘恩負義，都唔明點解莊生會收你為徒。」Robin喺提及莊神之時，雙眼流露住仰慕之情，睇黎佢除左當莊神係佢老細之外，佢仲當正人地係佢恩師咁。我亦都相信Robin由一開始就咁討厭我，係出於妒忌之情，有見及此我就即時答Robin：「係啦，莊神連我呢啲人渣敗類都肯收為入室弟子。反而你又靚又叻又盛都剩係當你係助手，哎喲喲，一片忠誠都不被重視，我係你都嬲嬲豬啦。」Robin嬲到面都紅埋地反擊：「莊生佢洗左好多錢畀我學嘢，佢一直重點培訓我……」「咁佢都算係個負責任嘅主人呀，我好多朋友養狗都唔肯洗錢去訓練佢地架，求其隻狗識得出街先屙屎屙尿佢地就算數。」Robin聽到之後二話不說地一拳打落我度，睇黎佢真係有練開武術，佢單單一拳已經痛到我標眼水，我痛到喘住氣咁反擊佢話：「你呢啲野蠻人真係民智未開，你估我真係唔夠你打呀。我係不屑好似你咁咩都用暴力去解決咋，而且你好彩呀，我當年喺學識左排雲掌之後，應承過我師傅我係唔會打女人……」點知我都未講完，Robin又已經向我轟出第二拳。

 

莊神老實不客氣地捉住坐喺佢對面嘅Judy隻手，一邊用溫柔嘅聲線問佢：「Judy小姐呀，你唔好介意我第識你無耐就咁唐突問你，但係你有無男朋友架？」Judy聞言之後即刻扮晒怕醜咁低頭嬌笑，隔左一陣先答莊神：「John你真係好直接架，呢個問題就等你自己去搵答案啦。不過我想澄清一樣嘢先，我平時唔係咁輕易同男人出街食飯架，特別你仲係我公司嘅人，我都唔知點解你一問到我我就會應承你呀。」嘩Judy姐，你同機場尿兜一樣，見盡各國各式嘅陽具啦，而家學人扮淑女？會唔會難頂左啲呀？不過莊神睇黎一樣入戲，佢竟然扮晒陶醉咁話：「所以我都知我同你嘅相遇係命運黎架啦，Judy，希望我地今晚過後會更加了解對方啦。我今日揸主意安排左啲特別嘢畀你嘗試，希望你會鍾意啦，我叫左開左支酒先。」莊神示意叫waiter行埋黎開酒，初初我以為佢準備左啲咩wine咁巴閉啦，但出人意表地佢倒左兩杯青色嘅嘢出黎，Judy見到之後同我一樣驚訝，不過佢無多問，佢只係靜靜地拎左杯野飲左去。莊神見佢飲完之後問佢：「呢杯82年　Bamboo啱唔啱你飲呀？」Bamboo?乜嘢bamboo呀？Judy睇黎同我一樣感到疑惑但又唔好意思話唔識，佢只係微笑住點頭。莊神之後話：「呢支bamboo大有來頭架，係喺我太婆喺山西鄉下個床下底搵出黎嘅，而且佢再加左隻老鼠入去釀酒，所以佢唔係一杯普通嘅竹葉青，而係一杯竹葉青老鼠酒，我都忍唔住幫佢改返個洋名等佢可以揚威海外呀。」Judy一聽到老鼠兩字已經想反胃，但奈何眼前嘅人係莊神，佢只好話托詞話要去廁所，我相信佢入到去之後都有排嘔。呢個時候我忍唔住用車上嘅國防級先進通訊設備-Nokia 3310打去畀莊神話：「師父，你都算玩得盡啦，畀老鼠酒件港女飲。」佢微微一笑之後話：「等陣間上左主菜你再黎崇拜我都未遲。」

 





睇黎Judy入到廁所果陣應該嘔得好勁，佢出返黎之後已經變到面都青埋。不過佢依然靜靜咁坐低，再硬擠個笑容出黎對住莊神。莊生突然好似好苦惱咁用雙手掩面話：「Judy，我頭先收到我老婆個電話，我同佢講左個大話，我話我而家見緊客…...不過你信我，我真係第一次呃老婆，我都唔知自己點解會咁，我一見到你就情難自控，對唔住我同你食第一次飯就講埋呢啲嘢，真係好過份。不過我真係好內疚，我生平最憎人唔老實架，以前有個員工試過喺公司出古惑畀我發現左，我由於真係太嬲，我除左搞到佢坐監，喺佢出返黎之後我仲搞到佢差啲家破人亡，人又無錢又無晒。我而家覺得自己真係偽君子，講一套做一套咁。Judy你會唔會好睇我唔起。」莊神果然係知道Judy有出過古惑，而Judy喺聽到莊神講完果一番說話之後，驚到有啲手震，佢用左一陣時間黎平伏自己情緒之後話：「John，咁人人都會犯錢架嘛，放心我會保守秘密……我有啲肚餓啦，不如我地食少少嘢先啦。」莊神聽到之後眼光有一絲笑意一閃而過，睇黎佢真係精心準備左啲嘢畀Judy食，佢示意叫waiter上菜，我估Judy以為呢度話晒都似係高級西餐廳，啲嘢食點都唔會出錯架啦。點知碟嘢一到，佢見到碟上有好多隻昆蟲之後即刻忍唔住驚叫，莊神好開心咁話：「Judy呢啲叫禾味龍呀，我專登吩咐個chef煮畀我地食架，快啲食多幾多啦，有好豐富蛋白質架。」Judy驚叫完之後望住莊神，好似想睇下莊神係咪整蠱佢，點知莊神一臉認真，仲開始自己食起上黎，Judy喺無奈之下唯有試食左一隻，點知佢都係放唔到入口，喺呢個時候佢終於忍唔住同莊神講：「John，唔好意思我好唔舒服，我要返屋企休息。不過我唔係想拒絕你呀，我其實同你相處都好開心，我過兩日再約你啦好唔好。」估唔到Judy畀莊神咁玩完都唔肯放棄，佢只係想選擇暫時徹退，勇氣可嘉呀。而莊神喺扮到有啲失望咁就送走左Judy，但臨走時Judy竟然上前擁吻莊神，睇黎莊神同Judy仲會有下集！